Read Pochuri Naga ISAYA 51 Bible Online

ISAYA 51 - Pochuri Naga bible

ISAYA 51

¹Hi vü kümrheke luo, nohri küvizhu zhekütseri, nohri VÜWA phakütseri; noh khiela nüh ta jam nüh jüla nüh lokrü wa noküze luo, thi loküchüzhupe khiela nüh noh chühzhu nüh jüla nüh noküze luo.

²Noh pa Abraham thi noh küwuowa Sara noluo; küpakenühnyunü ma tüpehthuoh thitü ma mpa küsa vü hi nüh maji, thi hi nüh ma siatsü taji ma tü khielo ta küsara,

³küpakenühnyunü VÜWA nüh Zion luoveh sakürüzi na küveh kenüh; ma nüh ma zhie jakümri aveh luoveh sa kürüzitsü naveh, thi ma tsama tü Eden kümjie satsü naveh, ma shünyizari tü VÜWA phari kümjie satsü naveh; loküzhe thi aloküwie tü ma vünüh ngu naveh,

⁴Eh zhü viluo, eh nyiri, thi hi vü künaluo, eh kuoh ri; küpakenühnyunü khonyo küsü hi vünüh shuwa na saküveh kenüh, thi eh kümshowa tü anyiri vü aküwie küsü sanaveh.

⁵Eh küvizhuwa tü shinyi shenyi tsethuoh, eh küülolerawa tü tsezhu tewa thuoh, thi eh pie tü nyiri takrü naveh; nyuo nato zhihri tü hi huo veh, thi eh pie kenüh mari tü luozhe veh.

⁶Atülüri vü nohri notha toke luo, thi azhih kükhu vü noküze luo; küpakenühnyunü atülüri tü anyikhu kümjie ram naveh, azhih tü thsü nyawa kümjie sepham naveh, thi jüla kürhori tü wiezüpoküruowa kümjie siekhehm naveh; thitü eh küülolewa thuoüji küsuokürho wie thuoh, thi hi nüh küvizhu thuoüji apote küsawa nyu.

⁷“Hi vü kümrheke luo, nohri künyitsa küthsü ri, aluoveh lovü eh khonyo küpeh nyiri; anyiri nüh küüjo mükrie tümluo, thi mari nüh küüjozhü ri kenüh luoveh mzah tüm,

⁸küpakenühnyunü mütharü nüh thsünya wa kümjethuo kümjie jümari müjethuo naveh, thi aloji nüh külovü kütsa kümjie jümari tsanaveh; thitü hi nüh küvizhu thuoüji küsuokürho naveh, thi eh küülolera tü awule aveh vi peh naveh,” ta küza.

⁹Süraluo, süraluo, akükhra vikevü luo, O VÜWA apiewa; süraluo, khana rülo vü üta, khana teküwa vü wuhleri Rahab tehnya kümwa tü noh nyu ülo, samza küshüwa noh nyu ülo?

¹⁰Juhküji saküüwehwa tü noh nyu ülo? khielota küsheh ajuhri; juhküji küshehri sajakümwa rhehsakümri küükari nta küsawa nyu ülo?

¹¹Thi VÜWA thuokütsü tü sheleru naveh, thi azah sanü Zion vü ru naveh; küsükürho loküzhe tü malüri rügi vü peh naveh; mari tü loküzhe thi aloküwie ngunaveh, thi luovehküna thi küsahzhile tü tewa naveh.

¹²Hi noh luoveh saküürüziwa tü hi, hi ta küwa wiethuoh; noh tü thawa nü anyiküsüra wa krü veh lo, anyira tsa apra kümjie sakütsüwa,

¹³Thi VÜWA, noh küsawa kümamthuoh, ma nüh atülüri shohküüta thi azhih wa ajupe ri saketsü, thi kümrüwa aheküze kenüh arülo aveh vü akükrü tü mükütuo, ma mpa nüh zorie nta sakesa wa tü thawa lo? thi kümrü ahe küzewa tü khiela pehveh lo?

¹⁴Küngie kütsuowa tü pre nü küüshum naveh; matü küsüwa nyu thi küphieke lovi tekütuwa nyu, jü mpa mkünyu ma shie tü küsazih wa nyu,

¹⁵küpakenühnyunü hi tü VÜWA noh Saküüwuowa wa ma nüh juhküji küke küsühra nü ma küshieh tü akhikhu, Kümsietsa VÜWA tü ma nyo.

¹⁶Thi hi nüh eh zhüri vi noh po lovü thsetsü thuoh, thi noh vi eh ke kükho vü küthim thuoh, atülüri lerie vü azhih wa ajupe sake, jütisanü Zion vü noh tü eh nyiri ti küza.

¹⁷Noh mpa nüh thorü luo, noh mpa nüh thorü luo, tsieluo, O Jerusalem, noh VÜWA ke, ma rükümtho ahuo vünüh kümshewa, küpuolepuoza kalekhuwa khah zhu kümshewa.

¹⁸Ma nüh kühuo atsari aveh azhie vü nyi küsü nga ma küjotsü na küsa münyie luo, ma nüh saküükhruo atsari aveh azhie vü nyi küsünga nüh ma kesi na küsa münyie luo.

¹⁹Zanyo hamasü noh vü terumthuoh, thawa nüh noh sie lorüna lo? zorieja thi küzoriezosa kümkhuojih thi anyuchuwa; thawa nüh noh luoveh sa kürüzi na lo?

²⁰Noh tsari tü thasü mthuoh, ale nato aveh vü mari tü pekheveh amüsü aneh lo tie küsa kümjie; mari tü VÜWA rükümtho nüh proveh, Saküüwuowa shüke nüh küphra.

²¹Jükenüh hama künaluo, noh münomnaküm wa, müshekümwa, thitü akhah vünüh nyu nüh:

²²Noh VÜWA, ma nyiri kenüh kükhuo wa, VÜWA noh Saküüwuowa: Halie, hi nüh noh ke vünüh küpuo le puoza ahuowa vim thuoh; nohtü eh rükümtho kalekhuwa küzhu lewa nyu thuoh;

²³Thi hi nüh jüma vi noh sakümnomna ra ke vü thse naveh, “Kükie tsuo luo, noh tü kariwa ra na küsa kenüh; ta küza; thi noh tü noh seru vi azhisa kümjie thi mari küükari na küsa kenüh lekhuji kümjie samthuoh,” ti küza.