Read Pochuri Naga ISAYA 54 Bible Online

ISAYA 54 - Pochuri Naga bible

ISAYA 54

¹ Reihi luo, O küvükre, atsa müküsawa; azah sazhu thi zie kümsie luo, noh atsa küna müküsawa! küpakenühnyunü küüzoküza atsari tü münyie nü atsa küpehri tsa nyieh vü nüh zhi na küveh kenüh, ta VÜWA nüh küza.

²Noh juhtshiezheh azhie saküji luo, thi noh kürhope küzieteri saküütaluo; müshohte tüm, noh kuleri saküsuo thi nothsoshieri sakümzho luo.

³Küpakenühnyunü noh nüh kümzhumzhie sakümza küükra zhu na küveh kenüh, thi noh mükate thi nyiri nüh küüzoküm nyujiri mükate naveh.

⁴Mükrütüm luo, küpakenühnyunü noh tü küüzükrü wa nyu; mürüzarüpuo tümluo, küpakenühnyunü noh tü küzükrü vü küütuwanyu, küpakenühnyunü noh tü no küviza vü küzükrü kümam na küveh kenüh, thi noh kütü nyi saküüzükrü kümsheke wa nyu wiethuoh,

⁵küpakenühnyunü noh küsawa tü noh vüpa wiethuoh küsa kenüh, ma nyo tü VÜWA; thi Israel kümtsewa tü noh kürhehsa wa, azhih ajü Saküüwuowa ta ma tü ji.

⁶Küpakenühnyunü noh tü kuleküm vüvüh küsü kümjie vünüh thi sietse vü asheküsü vünüh VÜWA nüh noh küjira kenüh, shefüra vühri küsü zhe jakümri kümjie, te noh Saküüwuowa nüh küza.

⁷Sütsuo kümlu küsü kenüh hi nüh noh kulem, thitü hi nüh rüthaküna aküji vi nü noh vizhuh naveh.

⁸Sütsuoküsü kenüh kümzhiechü rükümütho vünüh eh nyieh noh vünüh küthim, thitü küsü kürho akülo vi nü hi nüh noh vü rüthaküna peh naveh, ta VÜWA noh kürhehsawa nüh küza,

⁹ “küpakenühnyunü hamatü eh kenüh Noah rülo vü kümjie: Noah juhri tü wiethuoh ta hi nüh küüshie üta, Jüta, hi nüh noh vü arü küshuwa nyu thi noh vü küshükewa nyuta küsa hi nüh küshiemthuoh,

¹⁰küpakenühnyunü aküzhiri tü tewa mükie veh, thi küzhihori tü vijam mühie veh” thitü eh mükükho phrükhale küümze thuoüji noph vünüh teküwanyu, thi eh kütsa thuo kütsathuozhüwa tü viküja wa nyu, ta VÜWA noh vü rüthakünawa nüh küza veh.

¹¹O münomnakümwa, tsohmrhü nüh he, thi luoveh samküürüziwa, halie, hi nüh noh loh tü aweloh nüh sake veh, thi noh jupe tü khremsithe ri vi nü khake naveh.

¹²Hi nüh noh lokütsu ritü noh küüzih nüh vi sanaveh, noh kheriri tü akürheloh kümru ri nüh vi sanaveh, thi noh khithuo aveh tü akürhe lohri nüh vi sanaveh.

¹³ Noh tsa nyimpari aveh tü VÜWA nüh sosie naveh, thi noh tsara kütsarhie tü ji naveh.

¹⁴Künyitsa vünüh noh tü sazhu naveh; noh tü kümrü vünüh letsuo naveh, küpakenühnyunü noh tü kükrüwa nyu; thi kümzhoh vünüh letsuo naveh, küpakenühnyunü jüma tü noh shenyi küruwa nyuthuoh kenüh.

¹⁵Mükütüküzhü nyi küsü nüh küsaluo kü kezhu wie nga, jüma tü hi vünüh nyu; thari nüh no siesaluona nüh mari külum naveh.

¹⁶Halie, hi nüh amürüküsawa anyihie anyih kümwa saküje, thi jüma küsa kenüh rietsokrü vizhu. Zoriena küsa kenüh hi nüh küzorie ri nga saküji;

¹⁷Noh sie kürünyuo nta rietsokrü küüdeh küsü nga kütsarhiewa nyu, thi ashihküsa vü sühra nü noh sie küwuluo amizhi aveh noh nü thsütoh naveh. Hamatü VÜWA siepera akawa thi hi vünüh mari kümsho VÜWA nüh küza.