Read Pochuri Naga ISAYA 56 Bible Online

ISAYA 56 - Pochuri Naga bible

ISAYA 56

¹VÜWA nüh hakümjie küza veh: “Kümshowa saluo, thi künyitsa saluo, küpakenühnyunü eh küülolera wa tü shita ru na küveh kenüh, thi eh küvizhuwa tü kütsa küngietsü naveh.

²Hama küsa anyiwa tü akütsia küvüwa, thi jüma küüjehphoke anyi tsawa, kümnyi kümzhewa, jüma samkümne nüh, thi ma ke tü kümsü küsü nga müsanüh küsa wa,” ti küza.

³Alienyiwa ma mpa nüh VÜWA sie mküperütüm, “VÜWA nüh hi tü ma nyiri vünüh sa küpa tsam wie naveh,” ti müküüza tümluo; thi müjazakümüwa (eunak) tü, “halie, hi tü atshoh küsü,” ti müküüza tümluo,

⁴küpakenühnyunü VÜWA nüh: Eh kümnyi küsawa müjaküzawa (eunak) vü, eh küloküsa zanyori kürükawa thi eh kütsathuo küüjeh phokewa,

⁵Hi nüh eh zheh vünüh thi eh zieri azhie vünüh tsü naveh atsa nyimpari thi nyimzari anyieh vünüh kümhie kümsheke zanyo thi anyo küsü; Vimküjara küsükürho anyo küsü hi nüh vi tsü naveh.

⁶Thi alienyiri mari mpa nüh VÜWA sie nü ma nasa tsü nta, VÜWA nyo kümze nta, thi jüma samkümne nüh, thi ma sieperi sa nta, kümnyi rülo küsari aveh, thi jüma samkümne nüh, thi eh kütsathuozhü küjehphoke,

⁷ hi nüh hamari eh kümtse aküzhi vü sieru naveh, thi eh kükhuo zheh vü mari tü lozhe naveh; eh kükhurüpe rügi vü küvi ke sanaveh; küpakenühnyunü eh zheh tü nyiri aveh kenüh kükhuo zheh küsü ta jina küveh kenüh.

⁸VÜWA Saküüwuowa nüh Israel zhezhukümri kasazuhwa nüh hakümjie küza veh, sazhuh küsari nyieh vünüh hi nüh küpari nga ma vü sazhuh naveh.

⁹Ato vü samwari aveh ra nü shohriemluo, reza vü samwari aveh.

¹⁰Ma künotenyiri tü küjum, mari aveh tü zanyoküthsü münyie luo; mari aveh tü akhi mkükhura ashuhri kheh, mari tü müti ra; moh nü zeh veh, küzheküngu veh,

¹¹Ashuhri tü avo rümake veh; mari tü küwale münyie. Nyihzhükühuori nga küthsükümshi münyie luo; mari tü mari mpa mari lehkhuji vü küreletewathuoh, papara kümshe vünüh tewa le thuoh, nyi küsü vünüh aveh nga.

¹²“Raluo,” mari nüh, “Kürü akhah zhu ünüh, akhah kümzho vi nü hiri mpa hiri saküüpro ünüh, thi thuotü tü nosü kümjie küsanaveh, müküütekhera anyiehvü aküji,” ta küza.