Read Pochuri Naga ISAYA 57 Bible Online

ISAYA 57 - Pochuri Naga bible

ISAYA 57

¹Künyitsari tü pokamümti, thi nyi küsü nga jüma vi luoveh lovü müthse; kümtsekükhruori siete wa thuoh, nyi küsü nga müküthsü vünüh, küpakenühnyunü künyitsari tü küpoka vünüh vitewathuoh,

²matü luovehkürüzi vü tetu ti; kümsho vü kütseri tü mari aze vü münyiete wawati.

³Thitü nohri thuoh üji havü shenyi raluo, tümakürho atsari, küüphroküphrieri thi muomuokürho tsatori.

⁴Nohri tü thawa sie saküzhie veh lo? Nohri tü thawa vü nohri apo ka müzha thi nohri mizhi shiehzhu veh lo? Nohri tü küvüriera tsa, Kürieriekhriera tsatori nyu ülo,

⁵Nohri tü nguzheza vünüh nongu nü tsoküvehri, athsoh kümzhi aveh kükhu vü; anyuori vünüh nohri atsa kürehtheri, alokrü kükhu vünüh kürehtheri.

⁶Anyuo vü aloh küüzhuri aza vü tü noh suope; jümari, jümaritü noh tokütsü; mari vü noh nüh aküzhu kütsü küshoke tsü; noh nü ahieküto viru. Zanyo hamari kenüh hi tü alosakütura naveh ülo?

⁷Aküzhi kümsie vünüh noh tü noh ze sakemthuoh, thi jüla nüh noh tü küsahthuo tsü nta khru.

⁸Mükhie thi mükhietovü asevü nüh noh tü noh thsoshi sakhemthuoh; Küpakenühnyunü, hi jam nü, noh ze mü hiele thuoh kenüh, noh tü jümawa vü tekhru thuoh, noh nüh jüma sa kümzamthuoh; thi noh tü mari vü noh mpa nüh aküsheh sathuoh, noh tü mari aze lo noh tü anyiju no.

⁹Noh tü avüjuh vi nü Molek vü aküzehwa thi noh kürhenga saküzhi; noh nüh noh zhüvü ri kületsuo vü küzemthuoh, thi küsürazhie küjie wie nga küzemthuoh.

¹⁰Noh tü noh lehkhuji alehküsuo kenüh münomthuoh thi noh nüh, “Jüma tü küluozhe münyie luo,” ta müphrahte; noh tü noh kükhra kenüh akürho kürüthe phahrathuoh, jükenüh noh tü nojimta.

¹¹Noh tü thawa krüshike thi krü nü riemthuoh lo, thi hi mümsheke nüh samthuoh lo, küsükeri kümshe vi hi mütsü nüh sam lo? Hi nüh tsotho hothake wie nga küüzoh küm kenüh, noh tü hi mükrü nüh sam ülo?

¹²Hi nüh noh künyitsa thi noh nüh saküvehri küza naveh, thitü jümari tü noh küükra wa nyu.

¹³Noh nüh kükrie vü, noh nüh küvizhuh anguori nüh noh küüvizhu luo! Amürhü nüh jümari mürhü tewa naveh, rütho küsü nüh jümari vitewa naveh. Thitü hi vünüh kümnyieri thuoüji azhihwa mükara naveh, Thi eh kümtsewa aka vira tsü naveh.

¹⁴Thi ma nüh, Saluo, saluo, lehkhujiwa küche luo, eh nyira lehkhuji vünüh küruohte vijam luo, ta küza.

¹⁵Küpakenühnyunü rho küpeh huozhih thi kümsiewa, ma nyo tü kümtsewa nüh hakümjie küza veh. “Hi tü kügih thi kümtse azhie vü rho veh, thi mavü luovehküna thi sietse kürünyieri rho veh, kürünyiera sietse sakürho nta, thi luoveh sakürhonta.

¹⁶Küpakenühnyunü hi tü küsuokürho küürükhrüluowa nyu, nyutü hi tü arüshu küpehuowa nyu; küpakenühnyunü hi vünüh sietse shuwa küveh kenüh.

¹⁷Ma müngu künakhiewa kenüh hi nüh arüküshu wie, hi nüh ma kürhietsü, hi nüh eh nyieh küthi thi arüshu; thitü ma tü ma mpa ma luoveh lehkhuji vü asevü tseketewa.

¹⁸Hi nüh ma lehkhuji ngu, thitü hi nüh ma sakümhie tsü naveh; hi nüh ma lehkhuji küjotsü naveh, thi luoveh saküürüzhiwa vi nü ma thuotsüle naveh, ma kürümuori kenüh apomie vi saküpetsü naveh,

¹⁹ Luoveh kürüzi, luovehkürüzi, kületsuori vü nga thi küshenyiri vü nga, ta VÜWA nüh küza: thi hi nüh ma sakümhietsü naveh.

²⁰Thitü kümsüküsari tü juhküji küshüh kütse kümjie wie thuoh; küpakenühnyunü jüma tü mükümnyie kenüh, thi ma juhri tü anyuohnyi thi kümne küüthuzhu.

²¹ Kümsüküsarii kenüh luoveh kürüzih münyie luo ta Saküüwuowa nüh küza,”