Read Pochuri Naga ISAYA 59 Bible Online

ISAYA 59 - Pochuri Naga bible

ISAYA 59

¹Halie, külole na küsa kenüh VÜWA ke tü sakümlu müsa, nyutü ma khüna tü thachü nü müküüna ra müsa;

²thitü nohri künakhieri nüh nohri thi nohri Saküüwuowa azhie vünüh sa küpamthuoh, thi nohri kükhiemuori nüh nohri vünüh ma nyieh küthim taji mükünara nüh samthuoh,

³küpakenühnyunü noh keri tü azhüh nüh sakümnemthuoh thi nohri tüjü tü künakhie nüh sakümnem thuoh; nohri mizhi nüh kümsüküsa phrasa saveh.

⁴Nyi küsü nga müsho taji mütu, nyi küsü nya nyitsanü akhonyo vü müwa; mari tü loküzhe vü rüngake ke ti, mari tü sakümsü moh nü künakhie vi shushuti.

⁵Mari tü asuorie rüji hiehieti, mari tü sarülie thsothsoti; jümara rüji kütsari tü sümümti, thi sanyakümwa vünüh aresü khuzhuzhuti.

⁶Jümara sarülie tü athsü üta samtsü ra; anyiri tü mari nüh küsa vi mari mpa nüh mari müküzhu ra mari küüroh tü künakhie küüroh, thi küvürie küroküsa tü mari ke vü peh veh.

⁷ Ma jihri tü kümsü vü zhüwa veh, thi mari tü mükünakhiera züh küthü nta prelepreza nü sasati; mari kümshe tü künakhie kümshe, küpoka thi küzorie tü mari rieji vü pehveh.

⁸Mari tü kürükümhie aleh müthsü, thi mari lekhuji vü kümsho münyie luo; mari tü mari lehkhujiri saküükhuhmthuoh; jüla küwari nyi küsü nga luovehkürüzi müthsü.

⁹Jükenüh kümshowa tü hiri vünüh kietuom, thi künyitsa tü hiri mpha nüh sam; hiri tü aküwie no, thi halie, aküzo ngu, thi küwierake no, thitü kütsozom vü tse.

¹⁰Küüjuri kümjie hiri tü azie vü rüpa, anotha mükünyieri kümjie rüpa; küzoriezorü vü kümjie hiri tü rünyiküzeto vü müshu, akükhra küprori azavü hiri tü aküsüri kümjie.

¹¹Hiri aveh nga awie kümjie khuveh, thi mükhrietü kümjie lüchih; hiri tü kümsho no, thitü küsü nga münyie luo; küülolera no, thitü jüma tü hiri vü nüh kietuom.

¹²Küpakenühnyunü hiri küphrürie tü noh tüvü saküzhi kümthuoh ke, thi hiri kükhiemuo nüh hiri povü samthuoh; küpakenühnyunü hiri küphrürie tü hiri vü pehkümthuoh kenüh, thi hiri tü hiri künakhieri thsü veh:

¹³phrürie thi VÜWA kürü veh, thi Saküüwuowa sekünyi vünüh sühle tewa, kümrü thi küproluo phrahte, luoveh lovü nüh akürie zhüri moh thi phrahshu.

¹⁴Kümsho tü sühle tewa thuoh, thi künyitsa tü kületsuo vü tewathuoh; küpakenühnyunü küzhütsa tü müza nyula ri vü tsuotsake te küwa thuoh kenüh, thi kümshowa tü müturura nüh samthuoh.

¹⁵Küzhütsa tü zülam, thi kümsü vünüh te küwa watü ma mpa nüh küüprü küsü sasati. VÜWA nüh jüma ngu nü kümsho mü künyie kenüh ma lomküzhe sasati.

¹⁶Ma nüh anyi münyie ta küsa ngu, thi nyi küsü nga küsathuotü mükünyie kenüh ngo; jüti sanü ma mpa ma pie nüh kükhrara ma vü viru, thi ma künyitsa tü tüso kühiete küsü kümjie vike vü, thi ma lü rügi vü küülolera theku vike vü; matü amüthohküsa thsünyawa vi thsümnyisa, thi athsü üta ma mpa ma küzhute.

¹⁷ Künyitsa vi ma tüso kühiete sa, thi küülole vi ma lü mürükhu sa thi azhoküthuo nüh vi ma satsa küüzhusa, thi kütsaza vi makru küüzhutesa.

¹⁸Mari küüroh müzhe nü ma nüh thuotsüle naveh, ma küruohluori vü arükümtho, ma mükünongüri vü thuole naveh, Nyuo nato zhihri vü ma nüh thuole naveh.

¹⁹Jükenüh mari tü zhietu vünüh VÜWA nyo krü naveh; küpakenühnyunü ma tü akuza lizhuküru kümjie runa küveh kenüh, jüma tü VÜWA mürhü nüh mürhü küzezeti.

²⁰ “Thi ma tü Kürhesawa üta Zion vü ru naveh, Jacob vü mari küphrürie vü nüh küüreleri vürie naveh,” ta VÜWA nüh küza.

²¹“Thi eh kenüh thuoüji, hamatü mari sie eh kütsathuoh, ta VÜWA nüh küza: eh sietse noh vü küpehwa thi eh zhü wa po lovü thsekümri tü noh po vü nüh teküwawa nyu, nyutü noh tsara po lovü nüh teküwa wa nyu, ta VÜWA nüh küza, tsotho hala nüh wa sehkhesehkhe küju nga,” ti küza.