Read Pochuri Naga ISAYA 6 Bible Online

ISAYA 6 - Pochuri Naga bible

ISAYA 6

¹ Kajiwa Uzziah küsü mahvi vü hi nüh VÜWA tü kükajipe küsü rügivü küshupeh hi nüh ngu, müsie thi khake kürügi; thi ma satsa küüzhuthsü nüh kükhurüzheh pro.

²Ma nyieh vü kürhosa tsiepeh; jümari tü aküsa türoro pe: künyi nüh ma nyieh hiete, thi künyi vi ma jih künyi hiete, thi künyi vi prü, ti sa.

³ Thi mari küsü nüh küsü ji taji: “Kümtse, kümtse, kümtse VÜWA tü; azhie ajüke aveh tü ma kütholathovü nüh pro,” ti sa.

⁴ Thi aküjiwa jikhi nüh akheji küsakewa tü viküzetewa, thi azhehwa tü nyikhu nüh protewa.

⁵Thi hi nü, “Amngu kümsüwa tü hi! küpakenühnyunü hi tü kümiemthuoh; hi tü apomie mükümtse nyi küsü küsa kenüh, thi hi tü nyiri apomie mükümtseri aza vü kürho kenüh; hi nüh kajiwa, VÜWA ngu kümthuoh kenüh,” ti küza.

⁶Jüti küsa vü seraphimri küsü tü hi vü prü ru, jüma tü ma ke vü anyihie küju küsü ma nüh kükhurüpe vü anyijie nüh vi.

⁷Thinü ma nüh eh po pa taji nü: “Halie, hama nüh noh pomie künyi pamthuoh; noh müküleh tü vijamthuoh; thi noh kükhiemuo tü nojamthuoh,” ti küza.

⁸Jüti küsa vü hi nüh VÜWA jikhi küna ra, “Hi tü thawa küze na lo, thi hiri kenüh thawa nüh wa tü na lo?” ta küza.

⁹ Thi nüh “Waluo, jütisanü anyi hamari vü: “Küna nü künaveh, thitü müthsümümshi; aküno nü no veh, thitü müthsüra nüh sam.

¹⁰Anyi hamara luoveh tü saküthümtü, thi mari khüna tü saküüzhomthuoh, thi mari notha tü zotemthuoh, ma nothari nüh ngum üsü, thi mari khüna nüh küna ra mü üsü, thi mari luoveh vi thsümshim üsü, jütisanü sühle ru taji sakümhiem üsü ta küsa kenüh,” ti küza.

¹¹Thinü hi nüh, “Küthake lo, O VÜWA,” ti küna. Ma nüh: “Anyujiri müjie müsüküm küju nü mürho nüh sa taji, thi azhehri tü nyiri müpeh nüh samüküm küju nü, thi azhihwa tü küüzoküza vünüh jajimüküm küju nü,

¹²thi VÜWA nüh nyiri tü kületsuo vü müjie viküja küju nü, thi azhihwa azhievü azhie kuleküja müjie küzhi küju nü.

¹³Thi ma mpa nüh türake vü küsü jüla pe wie nga, jüma tü tsomtü wie naveh, nyutü nguzhethsoh küsü kümjie, jüma shüchieküm sevü ma thsonguri tü toke wie,” ta küza. Ma thsorhu tü kümsho avi wa.