Read Pochuri Naga ISAYA 60 Bible Online

ISAYA 60 - Pochuri Naga bible

ISAYA 60

¹Süra nü wieluo; küpakenühnyunü noh küwie tü rupehküveh thuoh kenüh, thi VÜWA kütholathovü tü noh rügi vü shukümthuoh kenüh,

²küpakenühnyunü halie, azhih tü aküzo nüh külüwutem na küveh kenüh, thi aküzo nüh nyiri külüwutem naveh; thitü VÜWA nüh noh rügi vü shuru naveh, thi noh rügi vü ma kütholathovü ngu naveh.

³Thi akuoküjiri tü noh küwie vüru naveh, thi kajiri tü noh küwie shuküru vü ru naveh.

⁴Noh notha toke küzüle nü noluo; mari aveh kürü sehzhuvehthuoh, mari tü noh vü tse veh; noh tsari tü kületsuo vünüh ru naveh; thi noh tsavüri tü apie vünüh küruo naveh.

⁵Jütathuoüji noh tü ngu nü wiezhikenaveh, noh luoveh tü lorana thi nyierakhruo naveh; küpakenühnyunü juhküji küwalewa tü noh vü küreleru na kenüh, thopahiri ashieji tü noh vü ru naveh.

⁶Ut nüh noh hiete naveh, Mediari thi Efahra ut atsanüh; jümari aveh tü Sheta vünüh ru kheh naveh. Mari tü suna thi rheküünguvüh viru naveh, thi VÜWA küsiake zhüchüh noh vü sehzhuh naveh,

⁷Kedar riekhuo tü noh vü sehzhuh naveh, Nebaioth nyihzhü vori tü noh vü nasa tsü naveh; mari tü küvira sanü eh kükhurüpe vü shuru naveh, thi hi nüh eh kütholathovü azheh wa sakütholathovü naveh.

⁸Akülu küsü kümjie prü kütse hamari thi mükhrietü kümjie mari mürhülepie vü prüküwa hamari tü thari lo?

⁹küpakenühnyunü souzünato zhihri tü eh kenüh huo naveh, Tarshish juhie nüh apo, noh tsari kületsuo vünüh sieru na küsa, mari rakasa thi suna mari vü viru naveh, VÜWA noh Saküüwuowa anyo kenüh, thi Israel kümthowa kenüh, küpakenühnyunü ma nüh noh sakütholathuoh kenüh.

¹⁰Alienyiri nüh noh zieri sanaveh, thi mari kajiri nüh noh kürhietsü naveh; eh rükümtho kenüh hi nüh noh kürhietsü, thitü eh küütso kenüh hi tü noh vü noküümze peh.

¹¹ Noh kheri tü sa peh huonaveh; rülo thi rüza jümari tü kükhe wa nyu; jüta sanü nyiri tü akuoküjiri noh vü viru naveh, mari kaji sie nü kürü ru naveh,

¹²küpakenühnyunü akuoküji thi kajipe noh kütsü müküsari thuoüji; akuoküji jümari tü jakümsü jum naveh.

¹³Lebanon kütholathovü tü noh vü ru naveh, athsorhu, are, thi aküla, eh kümtsezheh azhiehwa saküzüna küsa; thi hi nü eh mpha azhiehwa sakütholathovüsheh naveh.

¹⁴ Noh kümrü atsari tü kükie nü saji noh vü ru naveh; thi noh kümari nga noh mpha vü küngie tsuo naveh; mari nüh noh tü VÜWA Nyujiwa ta, Israel kümtsewa Zion ta ji naveh.

¹⁵Noh kuleküm thi mürhüküm vünüh, nyiküsü nga kari müküveh, hi nüh noh tü küsuokürho sakütholatsü naveh, kürho küsü vünüh kürho küsü vü loküzhe satsü naveh.

¹⁶Noh tü akuoküjira tünüh nü naveh, noh tü kajira tünü nü naveh; thi noh tü hi, VÜWA noh küülolewa, thi noh Kürhesawa, Jacob kükhrawa ta thsü naveh.

¹⁷Sawuo mütho vünüh hi nüh suna viru naveh, thi amürü müthoh vünüh rakasa virunaveh; athsoh müthoh vünüh asawuo, aloh müthoh vünüh amürü viru naveh, thi noh küürokünori künyitsanaveh.

¹⁸Noh zhih vü küvürie tü küünarale wa nyuthuoh, küzorie nyutü küzorie tü noh rüshu azhie vü küünaralewa nyuthuoh; noh tü noh khituoritü küülole ta, thi noh kheriri tü küsiake ta ji naveh.

¹⁹ Arünyi tü arüle vü noh kenüh küwiephieke küsawa nyuthuoh, nyutü arüza vü asa küwie tü noh vü aküwie kütsawa nyuthuoh; thitü VÜWA nüh küsükürho noh küwie sana thuoh, thi noh Saküüwuowa nüh noh kütholathovü sanaveh.

²⁰Noh rünyitü kütulewa nyuthuoh, nyutü noh sa tü ma mpa nüh leteküwawa nyuthuoh; küpakenühnyunü VÜWA nüh küsükürho noh küwie sana thuoh, thi noh lokürü rülori tü sehkhe sam na thuoh.

²¹Noh nyiri tü aveh nyitsam na thuoh; mari tü küsuokürho azhihwa müka tem naveh, hi nüh eh ke nüh küüroh, jümari tü hi nüh sakütholathovü naveh,

²²Küzülatsawa tü ajünü küsü sanaveh, thi küzahtsa wa tü akuoküji kükhra küsü sanaveh; Hi tü VÜWA; ma tsotho vü hi tü jüma preratsarmie naveh.