Read Pochuri Naga ISAYA 62 Bible Online

ISAYA 62 - Pochuri Naga bible

ISAYA 62

¹Zion rieh nüh hi tü zota küpehwa nyu, thi Jerusalem rieh nüh hi tü kümnyiewa nyu, aküwie üta ma saküümshowa mküwa küju nü, thi anyihthi küsü küji üta küülolera küwa küjie nü.

²Akuohjiri tü noh künyitsa ngu naveh, thi tsahjiri aveh nüh kürho la rhovü ngu naveh; thi noh tü anyo kürüthe küsü vi ji naveh jüma tü VÜWA apo nüh tsü naveh.

³Noh tü VÜWA ke vü kaji lüwa küzü küsü sanaveh, thi noh Saküüwuowa ke vü amekükhra alo küsü sanaveh.

⁴Noh tü kükulewa vü küpehwa ta küsalewa nyu thuoh, thi noh zhih tü kule küüzowa nyu thuoh; thitü eh nokülo tü ma vü pehveh ta, thi noh zhih tü münyukümwa ta ji naveh; küpakenühnyunü VÜWA tü noh vü no loküm kenüh, thi noh zhih tü münyum naveh,

⁵küpakenühnyunü vizari küsü nüh mükürüsa küsü küza üta, jüüta noh tsanüh noh za naveh, kükümnyutepawa nüh kümnyutevüwa vü nyierakükhruo üta, jüüta noh Saküüwuowa tü noh vü nyierakhruo naveh.

⁶Noh zieri rügi vü, O Jerusalem, hi nüh künoteri samthuoh; arülo thi arüza aveh mari tü zota küpeh wa nyu. VÜWA vi kümsheke vü küthsewa tü noh mümnyie tüm,

⁷ma nüh Jerusalem vishu nü azhih vü jüma küsiake müjie küsaküju nü ma kümnyie mütsü tümluo.

⁸VÜWA nüh ma zhie wuovü nüh thi ma kükhra apie vünüh küshiemthuoh: “Ashie sana küsa kenüh hi nüh noh müjünongüri vü noh tsuo kütsüwa nyuthuoh, thi noh nüh münomna nü küroh küsa alienyiri nüh noh khah küzhuwa nyuthuoh;

⁹thitü jüma küzhori tü jüma tsanü VÜWA siake naveh, thi jüma küvizhuri tü eh kümtse zheh nyulari vünüh jüm zhu naveh,” ti küza.

¹⁰Tsezhu waluo, akheri ri vünüh tsezhu waluo, anyiri kenüh aleh küche luo; saluo, ariejiwa saluo, jüma aloh sakümtseluo, anyiri rügi nü athsoshi khale luo.

¹¹ Halie, VÜWA nüh azhih küpote vü zhüchümthuoh: Zion tsavühwa vü küza luo, “Halie, noh küülolerawa tsethuoh; halie, ma jisuo tü ma vü pehveh, thi ma noküshe tü ma tüvü pehveh”

¹²Thi mari tü kümtse nyiri, VÜWA nüh rhehsakümri ta ji naveh; thi noh tü küphahzhuwa, mükükule nyuji küsü ta ji naveh.