Read Pochuri Naga ISAYA 63 Bible Online

ISAYA 63 - Pochuri Naga bible

ISAYA 63

¹ Edom vünüh kütse hamatü thawa lo, Bozra vünüh thsünyawa kümüru vünüh, ma süriesüvo kütholathovüshehwa, ma kükhra küji vünüh khatse ülo? “Jümatü hi, künyitsa küthsütsüveh, külole nta küsa khrasheh.”

²Mokenüh noh thsü tü müru veh lo, thi noh thsünyawa tü akhah kütsüzhu vü künyi kürütse kümjie lo?

³ “Hi tü hi mpa nüh akhah kütsüzhuwa nyita, thi nyi küsü nga hi siemkütse nyiri vünüh; thi eh rükümtho vünüh jümari nyi nyah; mari kürhozhü tü eh thsünyawa rügi vü küthejake, thi hi tü eh thsü aveh küwinyahm thuoh.

⁴Amüthoh rülo tü eh luoveh lovü kütü kenüh, thi eh kürhehsa mahvi tü tetsethuoh.

⁵Hi nüh noküzethuoh, thitü kükra naküsa nyi küsü nga münyie nüh sam; hi tü ngosheh thuoh, thitü nyi küsü nga nüh küsite münyie luo; jükenüh hi mpa eh pie nüh kükhrara vü hi viru; thi eh rükümtho nüh hi site.

⁶Hi nüh eh rüküshu vünüh anyiri nyinyam, eh rükütho vünüh hi nüh mari sa küümshe, thi hi nüh mari kürhozühwa azhih rügi vü küshoke.”

⁷Hi nüh VÜWA mükükhaphrükhale küümze, VÜWA küsiake, VÜWA nüh hiri vü satsüküm aveh müzhe nü, thi Israel zhelovü kümhie aküji ma noküümze müzhe taji mari vü satsüküm, ma mükükhaphrükhale küümze küwale müzhe nü kürühle a veh,

⁸küpakenühnyunü ma nüh, mari tü eh nyiri tsa wie thuoh, rie nü müküsa atsari; thi matü mari küülolerawa sara.

⁹Mari müshekümnomna aveh vünüh ma müshesakümnomna, thi ma küpeh rügizhülewa nüh mari külole; ma külo thi ma noküümze vünüh ma nüh mari rhehsa; ma nüh mari vike thi khana rülo aveh mari vü.

¹⁰Thitü mari nüh wuluom thi ma Sietse amüshe küsüm; jükenüh ma tü mari münongü vü sühletewa, thi ma mpa nüh mari siesaluo.

¹¹Jütiküsa vü ma tü khana rülori, ma siepewa Mosa tsothori müsheke. Juhküji vünüh siezhu küruwa ma nyihnyih kühuowa khielapehveh lo? Mari azhie vü ma Sietse kümtse thsekütsüwa khiela pehveh lo,

¹² Thawa nüh ma kütholathovüsheh apiewa, Mosa ake azhie wuovü küüwa satsü lo, thawa nüh ma mpa ma nyo küsükürho küsü küsa nta mari ajuhwa küsuo tü lo,

¹³thawa nüh aküsheh vünüh mari sieshuwa lo? küpohuza vü rawuh küsü kümjie, mari tü mümshü

¹⁴Aseshuh nüh anyuo vü tse kütsuo kümjie, VÜWA Sietse nüh mari kümnyie tsü. Jükümjie vünüh noh nüh noh nyiri küjotsü, noh mpa noh kenüh kütholathovüsheh anyo küsü sana küsa kenüh.

¹⁵Atülü vünüh asaji vü noküze luo, noh kümtse thi kütholathovüsheh kürhope vünüh. Noh kütsaza thi noh kükhra khiela pehveh lo? noh luoveh kütsaza thi noh tü hi vünüh vitemthuoh,

¹⁶küpakenühnyunü noh tü hiri Pa, ma mpa nüh Abraham tü hiri müthsü wie ketünga thi Israel nüh hiri mthsü wie nga; noh tü, O VÜWA, hiri Pa, hiri kürhesawa noh nyo khana vünüh küpeh lewa.

¹⁷O VÜWA, noh lehri vünüh noh tü mokenüh hiri sa küüzih lo thi hiri luoveh sakükhom tü lo, jütisanü hiri tü noh müküükrü lo? Noh sieperi rieh nüh sühle luo, noh ka küvi akuohri.

¹⁸Noh kümtse nyiri tü tsotho pike noh kümtse zheh mükate; hiri küruohluori nüh jüma nyi nyahmthuoh.

¹⁹Hiri noh nüh mari nyieh vü mükütakrüri kümjie samthuoh, noh nyo vünüh müküjiri kümjie samthuoh.