Read Pochuri Naga ISAYA 64 Bible Online

ISAYA 64 - Pochuri Naga bible

ISAYA 64

¹O noh tü atülüri shokhri nü turu na küsawa, noh tüvü nüh aküzhiri tü küzhühna küvehwa,

²anyih nüh juzhu thuoüji athsozhuke thi anyih nüh ajuh saküüluo üta, noh nyo tü noh küwuluori vü sa küüthsü na küsa kenüh, thi noh shütü vünüh akuoküjiri tü amüngukükhe na küsa kenüh.

³Hiri nüh no mküveh kükrüküngo zanyori küsa vü, noh tü turu, aküküzhiri tü noh tsatü vü küzhüh.

⁴Khana vünüh nyi küsü nga nüh müküna ra nyutü akhüna vünüh müzake, notha küsü nga noh nyieh vü Saküüwuowa küsü nga müngu, ma huoküvehri kenüh küüroh kütsü küsü nga müngu.

⁵Noh tü lozhesheh nü künyitsa küürohri sie mtututi nolehri vü noh kümshehri mütututi. Halie, noh tü arüshu, thi hiri tü khiemuom; hiri tü hiri kükhiemuo vü tsotho hothake peh tewa, thinü hiri tü külolera naveh ülo?

⁶Hiri tü aveh nga mükümtseri nyi küsü kümjie, samthuoh, thi hiri künyitsa küürohküli aveh tü thsünya wa sakümneküm küsü kümjie thuoh, hiri aveh nga anyawa küsü kümjie vehnemthuoh, thi hiri künakhieritü, amürhü kümjie wetewa wati.

⁷Nyiküsü nga noh nyo küji münyiethuoh, noh se nta ma mpa nüh küüthozhu münyiethuoh; küpakenühnyunü noh tü nyieh hiri vünüh küthi kümthuoh kenüh, thi hiri vizhu nü hiri künakhieri ake vü thsemthuoh.

⁸Tü, O VÜWA, noh tü hiri Pa; hiri tü noh nyisa, thi noh tü hiri küfüküsawa; hiri aveh tü noh ke nüh küürohri sheh wie.

⁹Küluoh sheh nü arümshu tümluo, O VÜWA, thi küsuokürho künakhie mümsheke. Halie, müshenoluo, hiri aveh tü noh nyiri khehwie.

¹⁰Noh kümtse nyujiri tü reza kusü samthuoh, Zion tü reza küsü samthuoh, Jerusalem thuoüji küüzomthuoh.

¹¹Hiri zheh kümtse thi aküzütsa tsa, hiri pari tü jüla nüh noh siake, jüma tü anyih nüh tsomthuoh, thi hiri nüh loküm azhieri aveh tü ferie khemthuoh.

¹²Noh tü zanyo hamari vü noh mpa nüh küzhi naveh ülo, O VÜWA? Noh tü zoti peh taji hiri sakümnomnaphakem nyi lo?