Read Pochuri Naga ISAYA 65 Bible Online

ISAYA 65 - Pochuri Naga bible

ISAYA 65

¹Hi müküünari kenüh küüphah nti hi tü küchethuoh; hi müküphakri küüphahra nti hi tü küchethuoh. Hi nüh, “Hi hala pehveh, hi hala pehveh,” ti küza, eh nyo müküji akuoh jiri vü.

²Rülo aveh hi nüh azhümküüna nyiri vü eh keküthsuo küze, mükümhie leh vü kütseri vü, mari mpa lekhuji mkümhierii müzhe taji; makümsheri mzhe taji;

³mükütuo wie thuoh nüh eh nyieh vü eh rüsakümtho nyi küsü, aphari vünüh küsahthuo sa thi küveloh rügi vünüh asierhie tso;

⁴mari tü arükuri vü shupehpehti; thi küüzhe azhieri vünüh arüza viküzezeti; mari tü awu sa tsatsati, mari küfüri vü akükre zanyori küngewijuh pehpehti;

⁵mari nüh, noh mpa nüh noh viküjike luo, hi shenyi müru tüm, küpakenühnyunü hi tü noh vünüh saküpa kümthuoh kenüh; ta küzazati Hamari tü eh nyaku vü anyikhu küsü, jüma tü rülo aveh vü tsoküpeh anyih küsü.

⁶Halie, jüma tü eh tü vünüh rhümthuoh: Hi tü zota küpehwa nyu, thitü hi nüh thuotsü le naveh, ah, hi nüh mari tüso vü thuotsüle naveh

⁷mari künakhieri thi ma pari künakhie ri saji nü, ta VÜWA nüh küza; mari nüh aküzhiri rügi vü sierhie kütso kenüh thi küzhihori rügi vü nüh hi kümüzümhie kenüh, atükhu vü mari nüh küsari hi nüh mari tüso küthuowa küto naveh.

⁸VÜWA nüh hakümjie küza veh: Akhah tü akhrü vünüh nguraküveh üta, thi mari nüh, Jüma müzorie tümluo, küpakenühnyunü jüma vü akütsia küsü pehküveh kenüh, ta küza, jükenüh eh siepewa rieh nüh hi nüh sanaveh, thi mari aveh küzoriewa nyu.

⁹Hi nüh Jacob vünüh kümwumra küshunaveh thi Judah vünüh ehküzhihori küviri; ehkürükari vü tsüna, thi ehsieperi jüla rhona.

¹⁰Anyihnyih kenüh Sharon tü arekümrhuope küsü sanaveh, thi Akhor Nyuotü mieshümiesa ri kenüh küzepe azhie küsü sanaveh, eh nyiri hi küphahri kenüh.

¹¹Thitü noh VÜWA kükulewa thuoüji, eh kümtse küzhi küümawa thuoüji, Amüngu kenüh küsape küsakou thi akürho kenüh akhah kükhre ahuo küprori;

¹²Hi nüh noh tü anyuchuwa kenüh küsünaveh, thi nohri aveh nga küürhiethe vü küüngie tsuo naveh; küpakenühnyunü, hi nüh küji vü nohri nüh mükühu kenüh, hi nüh küphrahte vü, nohri nüh müküna nüh sam, thitü eh notha vü mowa nü müsü veh ünüh sa, thi hi nüh mowa vü nomlo nüh jüma rüka, ta küza.

¹³Jükenüh VÜWA Saküüwuowa nüh hakümjie küza veh: Halie, eh sieperi tü tsanaveh, thitü nohri tü rümam naveh; halie, eh sieperi tü zhu naveh, thitü nohri tü küriehm naveh; halie, eh sieperi tü nyierakhruo naveh, thitü nohri tü küzükrü vü thsem naveh;

¹⁴halie, eh sieperi tü luoveh kenüh azah sanaveh, thitü nohri nü luoveh küna kenüh zie zhu naveh, thi sietse müsheküna kenüh rera naveh.

¹⁵Nohri tü nohri anyo kümzü kenüh eh kürükawa vü sam na thuoh, thi VÜWA thuoüji ma nüh anyo küpa küsü nüh ji naveh.

¹⁶Jüta thuoüji azhih jüla ma mpa nüh kütsia aküvüwa tü Saküüwuowa künyitsa vünüh ma mpa nüh tsia naveh, thi thawa nüh azhih jüla küshietsanaveh ünüh Saküüwuowa künyitsa vünüh küshie naveh; küpakenühnyunü atükhu vü küsürori tü kümamthuoh thi eh notha vünüh küthi kümthuoh kenüh.

¹⁷ küpakenühnyunü halie, hi nüh atülüri thi azhih kü rüthe küsü saküje; thi atükhu zanyo ri tü kümsheke nyuthuoh nyutü amüshe vü küruwa nyu thuoh.

¹⁸Thitü hi nüh saküjeküsawa vü küsuokürho alowie thi nyierakhruo luo; küpakenühnyunü halie, hi nüh Jerusalem nyierakükhruo küsü saküje, thi ma nyiri loküzhe küsü saküjetsü.

¹⁹Hi tü Jerusalem vü nyierakhruo naveh, thi eh nyiri vü aloküwie naveh; jümawa vünüh akükrie khi küünara lewa nyuthuoh.

²⁰Jüla nyinyuote rülo pike kürho küpehwa nyuthuoh, nyutü kükhruori ma rülo mükürhojuri küpehwa nyuthuoh küpakenühnyunü atsawa tü mahri müzake khruo nü sü na küveh kenüh, thi kükhiemuori mahri müzake kükhruo tü kümzü küsü sam naveh.

²¹Mari tü azhih sanü jümari vü rhie naveh; mari tü rhelivi shie nü jümara vi tsanaveh.

²²Mari tü azheh sanü küpari küürhiewa nyu; mari nüh shie nü küpari nüh la küütsawa nyu; küpakenühnyunü athsoh rülo kümjie eh nyi ra rülo nga jütasa wie naveh, thi hi nüh kürükari tü mari ake nüh küüroh ri kenüh aloküzhe sanaveh.

²³Mari tü müjuju vünüh küroh küümnomnawa nyu, nyutü kümsü kenüh atsa küsiewa nyu; küpakenühnyunü mari tü kütsia küvü VÜWA tsatori sa na küveh kenüh, thi mari tsari nga mari sie nü.

²⁴Mari nüh müjie küji atü vünüh hi nüh kühu naveh, mari nüh küza küveh vü nüh hi nüh küna reza ra naveh.

²⁵Anyihnyih thi nyihzhüzah masü kürü mürhuo naveh, amiewuo tü shüvotsa kümjie mah kuoh tsanaveh; thi azhitho tü arezü ashie sanaveh. Mari tü eh kümtse aküzhi aveh vü küsaluowanyu ta VÜWA nüh küza.