Read Pochuri Naga ISAYA 66 Bible Online

ISAYA 66 - Pochuri Naga bible

ISAYA 66

¹ VÜWA nüh hakümjie küza veh: Atülü tü eh kükajipe thi azhih tü eh jinyipe; noh nüh eh kenüh azhih sana saküvehwa tü mowa zheh lo, thi eh kümnyie azhie tü mowalo?

²Zanyo hamari aveh eh ke nüh küsa kheh wie, jükenüh zanyo hamari aveh tü eh zhi kheh, ta VÜWA nüh küza. Thitü anyi hamawa vü hi nüh no naveh, Sietse vü sakürünyie thi luoveh khaphrüti küsawa, thi eh zhü vü kümsüküsa aseküthsüwa amüngu küükhewa.

³“Shüvotsa küsüthe tü anyi küfethe kümjie wie thuoh; nyihzhüzah küsahthuowa tü ashuh ku küürüshi zarike wiethuoh; atha vi kükhurü vü kütsüwa tü awa züh vi kükhurü kümjie wiethuoh; kükhurü küsawa tü anguo vü tsiakütsü kümjie wie thuoh. Hamari tü mari mpa nüh mari leh rükamthuoh, thi mari kürholi tü mari kükre vü nüh lom mti;

⁴Hinga makeri’a nüh kümnomna rüka naveh, thi mari kükrü jümari vü viru naveh; küpakenühnyunü, hi nüh küji vü, nyi küsü nga mükühu kenüh, hi nüh küüza vü mari tü müküna; thitü mari tü eh notha vü mowa müsü veh ünüh sa, thi hi nüh nomkülowa rükam,” ta küza.

⁵VÜWA zhü künaluo, ma zhü vü amüngukükhe küvehri: Eh nyo rieh nüh noh jienüri nüh noh mürhü thi zhezhu küm luo, VÜWA tü küütholathovüm luo, hiri nüh noh loküzhe ngu na küsa kenüh; ti küza; thitü jümari tü mari nü küzükrü vü thsem naveh.

⁶Kümrheke luo, anyujiwa vünüh küüjakünya küsü! kükhurüzheh vünüh akhi küsü! VÜWA khi, ma mükünongüri vü künoshe tsüküveh!

⁷ Ma nüh atsaküwuo müjieh küna vünüh matü atsa wuom; ma künawa ma vü müjie küru vünüh tsa nyimpari küsü wuom.

⁸Zanyo jükümjie küsa thawa nüh küna ra lo? Zanyo jükümjie küsari thawa nüh ngu lo? Azhih tü rülo küsü vünüh wuo naveh ülo? Tsotho küsü vünüh akuoküji küsü tü vizhu ra naveh ülo? küpakenühnyunü Zion tü atsa küwuo nate veh ünü ma tsa nyimpari sie zhu kheh.

⁹Aküwuo tsotho hi nüh viru taji müküüwuo nüh sam naveh ülo? ta VÜWA nüh küza veh; hi, aküwuo sakütsüwa nüh ashiekuo khemtü naveh ülo? ta noh Saküüwuowa müh küza veh.

¹⁰“Jerusalem sie nyierakhruo luo, thi ma kenüh lozheluo, nohri ma külori aveh; ma sie nyierakhruo luo, nohri ma rügi vü küshukhekeri aveh,

¹¹jüta küsa vü nüh nohri tü nü taji lora, thi tünü vünüh luoveh rünyira; jütisanü ma kütholathovü küwale vünüh nohri tü lo nü nüphoke naveh,” ti küza,

¹²küpakenühnyunü VÜWA nüh hakümjie küza: Halie, hi nüh ma vü arühku küsü kümjie kütsarhienyurhie saküzhaketsü naveh, thi akuoküjira künyirhie tü akuza küsü lichü küveh kümjie saküzhaketsü naveh; thi nohri tü nü naveh, nohri tü ma küshi rügi vünüh küruo naveh, thi ma kho rügi vünüh küruonaveh.

¹³Nyi küsü ma zah nüh luoveh saküürüzi üta, jüüta hi nüh nohri luoveh sa kürüzi naveh; nohri tü Jerusalem vünüh luoveh sakürüzinaveh.

¹⁴Nohri tü ngu naveh, thi nohri luovehtü nyierakhruo naveh; noh arüri tü apra kümjie pronaveh; thi VÜWA ke tü ma sieperi sietse ru ta küsa thsü naveh, thi ma tü ma mükünongüri sie kürünyuo veh ta küsa thsünaveh,

¹⁵küpakenühnyunü halie, VÜWA tü anyih vünüh ru naveh, thi ma rawuhkheke tü tsomrhü kümjie ru naveh, aheküze vünüh ma rüküshu kütsanta, thi ma küshüke tü anyihzhu vünüh,

¹⁶küpakenühnyunü VÜWA tü anyih vünüh ashihwa sanaveh, thi kürholi aveh vü anyu nüh ashisana; thi VÜWA nüh rehthe kümri tü zhi sheh naveh.

¹⁷“Mari mpa nüh saküümtseri thi saküüm thari aphari Vüwa veh, aza vü müzhe kütseri, awesa thi akükreri thi amüzhü kütsari tü kürü asekhe kürü samtü naveh,” ta VÜWA nüh küza veh,

¹⁸“küpakenühnyunü hi nüh mari küürohrithi mari kümshe thsü veh, thi hi tü akuoküjiri thi azhü ri aveh phahzhu nti tse veh; thi mari tü ru naveh thi eh kütho lathovü ngu naveh,

¹⁹thi hi nüh mari azhie vü thsoshi küsü sake naveh. Thi mari vünüh hi nüh akuoküjiri vü Tarshish vü, Put, thi Lud vü alawih kühehri vü, Tubal thi Javan vü, suozü nato azhih kületsuori vü, ehküthola müjie küünaravü nyutü eh kütholathovü müjie küngurivü kürhora ri küze naveh; thi mari nüh akuoküjiri azhiehvü eh kütholathovü küzazhu naveh.

²⁰Thi Israelri nüh aküfü kümtse küsü vünüh VÜWA zheh vü atha kükhurü viküru khemta mari nüh nohri jienüri aveh, akuoküjiri aveh vünüh VÜWA vü kükhurü tsünta küsa üta rawuhri rügi vüh nüh, rawuhkheke vünüh, sie nü ehkümtse küzhi Jerusalem vü nüh runaveh,” ta VÜWA nüh küza veh.

²¹Wuori thuoüji ehnavü ri kenüh, thi wuori Levi ri kenüh vinaveh ta VÜWA nüh küza,

²² “küpakenühnyunü hi nüh atülüri kürüthe thi azhih kürüthe sana küsawa tü eh tü vü peh naveh jüta nohri küthsoküzhiri thi nonyori tü peh naveh, ta VÜWA nüh küza

²³Asa kürüthe vünüh asa kürüthe küju, thi kümnyirülo vünüh kümnyi rülo küju, akürho aveh eh tü vü khurü nta ru naveh,” ta VÜWA nüh küza.

²⁴“Thi mari tü hi sie küwuluo nyira küsü kümo no nta tsezhu wa naveh; küpakenühnyunü mari arü tü künewa nyu, thi mari anyiri tü akürho aveh vü kürhorha küsana küveh kenüh,” ti küza.