Read Pochuri Naga ISAYA 7 Bible Online

ISAYA 7 - Pochuri Naga bible

ISAYA 7

¹ Jotham atsa Ahaz rülo vü, Uzziah atsa, Judah kajiwa, Siria kajiwa Rezin thi Israel kajiwa Remaliah atsa Pekah tü arie sa nti Jerusalem vü ru, thitü mari tü jüma müchara nüh sam.

²David zheh lovü, “Siria thuoüji Efraim sie tsarümthuoh,” ti küza vü, ma luoveh thi ma nyira luoveh tü areza vü athsohri tü amürhü tüvü küüngah üta küngahtewa.

³Jüti küsa vü VÜWA nüh Isaya vü, Ahaz sie mütu na küsa kenüh noh thi noh tsa Shear jashut ti Kürüshü Zhuh arieji juhkhre kümsie ajuhle küpotewa vü tsezhu waluo,

⁴thi ma vü, Tsake nü zoti peh luo, mükrü tüm, thi nyisheju künyi juphieke küveh kenüh noh luoveh müsü tüm, Rezin thi Siria thi Remaliah atsa arükhielota küshu vünüh,

⁵küpakenühnyunü Siria tü Efraim thi Remaliah atsa masü sie taji noh vü aro kümsü sataji,

⁶“Hiri wa nü Judah siesaluo taji küümzhoh ünüh raluo, thi hiri mpa ehkeri nüh jümari chara nüh Tabed atsa vi taji kaji küüsam ünüh raluo,” ti küza,

⁷VÜWA Saküüwuowa nüh hakümjie küza: jüma tü mütsiera, thi jüma tü küsawa nyu.

⁸Küpakenühnyunü Siria alü tü Damaska küsa kenüh, thi Damaska alü Rezin küsa kenüh. (Mahvi rorake nü münga Efraim tü zokhuo künyimriem taji anyiri müküsalera satsü naveh.)

⁹Thi Efraim alü tü Samaria, thi Samaria alü tü Remaliah atsa. Mükütüküzü noh nüh mütsotü thuoüji noh tü müsazhüratsa wiethuoh, ti küza üti küza.

¹⁰Jüsevü nga VÜWA nüh Apaz vü,

¹¹“VÜWA noh Saküüwuowa thsoshi künaluo; ma mpa nüh jüma tü küsürazhie thake sheh tü nyutü atülü thake müsie tü,” ti küza.

¹²Thitü Ahaz nüh, “Hi nüh küüna wa nyu, thi hi nüh VÜWA vi kümte vü küthse wa nyu,” ti küza.

¹³Thi nüh ma nüh, “Thinü künaluo, O David zhehlori! Nyiri saküümno tü noh kenüh zah shem ülo, thi noh tü eh Saküüwuowa nga sakümno nti ülo?

¹⁴Jükenüh VÜWA ma mpa nüh thsoshi küsü vi noh tsü naveh. Halie, mükürüsavüh küsü tü atsa moh nü nyimpari küsü sie naveh, thi ma nyo tü Immanuel thoh naveh.

¹⁵Ma tü mokümjie kümsü kükule thsü thi kümhie thsü naveh ünüh aküthü thi awejuh tsanaveh,

¹⁶küpakenühnyunü atsawa nüh kümsü thi kümhie müje küthsü atüvü nüh kaji künyi atüvü noh nüh nyi küvehwa tü jakümsüm naveh.

¹⁷VÜWA nüh noh vü, noh nyiri vü thi noh pa zhehri vü ti Efraim nüh Judah vünüh teküwa rülo vünüh nosü küju arülo jükümjie küsa müjie kürusa Assiria kajiwa viru naveh?” ti küza.

¹⁸Jüma rülo vü VÜWA nüh Egypt kuzari akhre vü küpeh wiezü kenüh, thi Assiria zhih vü awe kenüh ti müsi naveh.

¹⁹Thi jümari aveh tü ru nü kühahkhe loku vü, thi alokrü kütsukeri vü, thi rüzhüza küzhihori azhie vü, thi areküjehpuke ri aveh vü ti pehtewa naveh.

²⁰Jüma rülo vü Rüku tuwuovü nüh alüse kümsa küsü vi taji VÜWA nüh Assiria kajiwa sie taji alü thi ajih küneh se naveh, thi jüma nüh akhane nga jam naveh.

²¹Jüma rülo vü nyi küsü nüh mieshü awie küsü thi nyihzhü künyi ti kürhosanaveh;

²²thi mati nü kütsü tünüjuh küwalematü küthü tsanaveh, küpakenühnyunü azhih jüla kükhe küsari aveh thuoüji aküthü thi awejuh tsana küveh kenüh.

²³Jüma rülo vü azhie aveh vü rhelivi kütieh küsü küpehri, rakasa akre anyie küsü ameküpehri aluori thi arüzhüri jem naveh.

²⁴Alawih thi ashüchu küviri tü jüla ru naveh, küpakenühnyunü azhih jüla aveh tü aluo thi arüzhü sakhem na küveh kenüh;

²⁵thi küzhihori aveh tüthsemkhu nüh kütüthseri vü, nohri tü aluo thi arüzhüri kükrü kenüh jüla müraruthuoh; thitü jümari tü mieshümiesa küüze pe thi nyihzhü nüh künyipe sam na thuoh.