Read Pochuri Naga ISAYA 8 Bible Online

ISAYA 8 - Pochuri Naga bible

ISAYA 8

¹Jüti küsa vü VÜWA nüh hi vü, lokhie küji küsü vi nü jüma nyiehvü küthsüjie khuke vünüh rhü luo, “Mahershalalhashbaz vü küpehwa vünüh,” ti küza.

²Thi hi nüh kütsotüra kümhie povüküsari Uriah navüwa thi Jeberekhia atsa Zekharia ngura, eh kenüh thsüto naküsa kenüh.

³Jüti küsa vü hi tü setsaküthsüvühwa vü wa ünü ma tü atsamoh taji nyimpari küsü wuo. Thinü VÜWA nüh hi vü, ma nyo tü Mahershalalhashbaz ti thoh luo;

⁴küpakenühnyunü atsawa tü “Eh pa nyutü ‘Ehzah,’ ta müjie küzathsü vünüh Assiria kajiwa nüh Damaska künyirhie thi Samariari zanyo prüküvirari vitewa na küveh kenüh,” ti küza.

⁵VÜWA nüh hi vü küzalehü,

⁶“Anyi hamari nüh azhüzhüke nüh liküveh Shiloa ajuhri kuleküm kenüh, thi Rezin thi Remaliah atsa masü atüvü krü nü rateküwa kenüh;

⁷jükenüh, halie, VÜWA nüh mari vü Rühku juhri akükhra thi khielota, Assiria kajiwa thi ma kütholathovü viru naveh; thi jüma nüh ma juhle aveh vü, thi ma natori aveh vü ti lichü naveh;

⁸thi jüma tü limzhiechütewa naveh, akhu protewa naveh; thi lichü küwari nüh noh zhih kümza aveh pro naveh, O Immanuel” ti küza.

⁹Luoveh kuo luo, nohri anyiri, thi luovehzah luo, künaluo, nohri nyujiri aveh; nohri-mpa nüh keke luo thi luovehzah luo; nohri mpa nüh keke luo thi luovehzah luo.

¹⁰Kükrü zhüphieri luo, thitü jüma tü zanyoküsü nga nyu nüh sam naveh; azhü küsü phraluo, thitü jüma tü kütsierawa nyu, Saküüwuowa nüh hiri siekütse kenüh,

¹¹küpakenühnyunü VÜWA nüh ma ke kümzhowa eh rügivü sanü hakümjie küza, thi anyi hamari leh vü mütse tüm üta hi vü hamna taji:

¹² “Anyi hamari nüh aveh vü küjierhü küji üta küjurhü müji tüm, nyutü mari nüh kükrüri mükrü tüm, nyutü kükrüshike vü müpeh tüm.

¹³Thitü VÜWA nüh noh tü kümtse üta chieke naveh; ma tü noh nüh kükrüshike wa saluo.

¹⁴ Thi ma tü kümtsezheh küsü sanaveh, thi kümüshü aloh küsü sanaveh, thi Israel zheh künyi vü ajih kümshü lokrüwa küsü sanaveh, Jerusalem vü kürhori vü apiehjü thi küjurü küsü sam naveh.

¹⁵Thi anyi hozake wie nga jüla nüh ajihmshü naveh; mari tü külu nü zoshi naveh; mari tü küza nü vitewa naveh,” ti küza.

¹⁶Povüwa phehke luo, eh sehnyira azhievü sosieküthsüwa fete luo.

¹⁷ Hi tü VÜWA huo naveh; ma tü Jacob zhehlo vü ma nyieh küthi pehveh, thi hi tü ma vü eh küluozhe peh naveh.

¹⁸ Halie, hi thi VÜWA nüh hi kütsü atsari tü Israel nyiri vü athsoshiri VÜWA Zion küzhiho vü küpewa.

¹⁹Thi mari nüh noh vü küüza vü, “Tüshihtümari thi amahzhieri sie zaluo luo,” ti küza, nyiri tü Saküüwuowa sie küzaluo leh nyu ülo? Mari tü akürhora müthoh vünüh aküsüri sie küzaluo leh nyu ülo?

²⁰Küsosiezhü vü thi apovü vü! Mari nüh azhüküphra hama tü küthohrie münyie luo tsa.

²¹Mari tü azhihwa tsekari wa naveh, müshemnomna sheh thi rüma taji; thi mari tü rümam thuoüji, mari kajiwa thi mari Saküüwuowa vü rümthonü müzü naveh, jütisanü mari nyieh arügivü toke tewa naveh;

²²thi mari tü azhih vü no naveh, thitü halie, müshekümnomna thi aküzo, müsheküna nyuonyiküsho, jütisanü mari tü zokümthsüthsü vü zhethse naveh.