Read Pochuri Naga ISAYA 9 Bible Online

ISAYA 9 - Pochuri Naga bible

ISAYA 9

¹ thitü ma kenüh thuoüji müsheküna vü nyuonyiküsho münyie luo. Atükhu tsotho vü thuoüji ma nüh Zebulun azhieh thi Naftali azhih tü moma kükato vü viru, thitü atsotho asevü thuoüji juhküji alehwa, Jordan tuwuovü azhih, akuoküjira Galilee tü kütholathovü satsü naveh.

² Anyi aküzo vü kütseri tü aküwie küji küsü ngumthuoh; azhih aküzo müthsüthsü vü kürhori, mari rügivü aküwie wiekemthuoh.

³Noh nüh akuoküjiri saküzhimthuoh, thi ma loküzhe thseküzhimthuoh; kümahwie vü loküzhe üta mari tü noh tüvü lozhe veh, anyiri nüh nyurazhi prüküvira vü loküzhe üta mari tü lozhe veh.

⁴Ma khuo thsohkhuonyi kenüh, thi ma safü akütsüwa kenüh, ma kümrüwa: zhietsühwa kenüh, noh nüh Midiari rülo vü üta zokhuomthuoh,

⁵küpakenühnyunü ariepe vü ariera jiküthsevüh nüh nyiküütsake aveh, thi azüh lovü thsünyawa küprikütu aveh tü anyih kütsothsoh kümjie tsom naveh.

⁶Hiri vü atsa küsü wuo tsüsavehthuoh, hiri vü atsa nyimpari küsü tsümthuoh; thi kümkhrünyi tü ma safü rügivü peh naveh, thi ma nyo tü “Küngo Zhüphiekütsüwa, Saküüwuowa Kükhratsawa, Küsuokürho Pawa, Kütsathuo Kajitsawa,” ta ji naveh.

⁷ Ma kümkhrünyi thi tsathuokütsü saküzhitsü, asehkhe küpehwa nyu, David kükajipe rügivü thi ma kaji nyieh vü sakütsie na küsa kenüh, thi sakükhrana küsa kenüh kümsho thi künyitsa vi nü tsotho hala nüh wa nü küsuokürho asehkhe küju. VÜWA nüh hama sanaveh.

⁸VÜWA nüh Jacob küwuluo azhü küsü küze sa veh, thi jüma tü Israel rügivü wie naveh;

⁹thi anyiri aveh nüh thsü naveh, Efraim thi Samaria vü kürhori, kükuotikuoshi vünüh thi küwukhawurie luoveh vünüh:

¹⁰“Küvehlohri tü tsuotsatewathuoh, thitü hiri nüh saküücho lohri vi nü sanaveh; jichuothso tü shüchiemthuoh, thitü jümara müthoh vünüh hiri nüh cedar athso thse naveh,” ti küza.

¹¹Jükenüh mari sie küsaluo kenüh, VÜWA nüh küwuluori vishutsü, thi mari mükünongüri küke küsühra.

¹²Siriari nüh zhieshu wuovü thi Filistinri nüh zhietu wuovü ti apoka nü Israel nyarie na küsa kenüh. Hamari aveh kenüh ma rüküshu tü sühletemwa zota thsuozhu zhu pehhuo wie

¹³Nyiri tü mari fethekümwa vü kürele müru nüh sam, nyutü VÜWA mphah nüh sam.

¹⁴Jükenüh VÜWA nüh Israel vünüh alü thi anürü masükhürü tehthuomtü, rülo küsü vünüh luophi tsuona thi amüshüh ti jethuom,

¹⁵kükhruori thi küchiekürhe nyiri nüh alü, thi setsaküthsü akürie sosiekütsüri nüh anürü;

¹⁶küpakenühnyunü anyi hamari küjokütsüri nüh külemievü küjoküzem, thi mari nüh küjoküwari tü müzhum.

¹⁷Jükenüh VÜWA tü mari vizari rügi vü nyieramkhruo, thi mari apa mkünyieri thi tünyivühri vü rüthaküna münyie luo; küpakenühnyunü aveh wie nga münyitsa thi kümsü küsari küsakenüh, thi apo aveh nga küzhehphro phra khehm. Hamari aveh kenüh ma rüküshu tü kürele temwa, thi ma ke thsuoke peh huo wie,

¹⁸küpakenühnyunü kükhusükhurü tü anyih kümjie tso küveh kenüh, jüma tü aluori thi rüzhüri tsoriemümti; jüma tü areza küremoke nga jumümti, thi jümari tü akülu tohvüh küsü vünüh luke tekuokuoti.

¹⁹Kümsietsa VÜWA rükümtho vünüh azhihwa tü tsom, thi anyiri tü anyih kenüh athsoshi kümjie sam; nyi küsü nga ma vü müküükhe.

²⁰Mari tü azhie wuovü nüh prüvi thitü rüma wie; thi azhu wuovü nüh shohrie, thitü mari tü alomra wie; mari nyi küsüsü wie nga ma zhephruwa asa shohrie,

²¹Manase Efraim, thi Efraim Manase masü kürü Judah prü. Hamari aveh vünüh ma rüküshu tü kürele temwathi ma ke tü thsuoke peh huo wie.