Read Pochuri Naga LEVIRI 10 Bible Online

LEVIRI 10 - Pochuri Naga bible

LEVIRI 10

¹Aron atsa künyi Nadab thi Abihu masü tü atahthsü masü küürüta vi nü anyih jüma lovü thse nü asierhe jüma lovü thse taji mükümtse anyih kükhurü sataji VÜWA tüvü tsü, hakümjie küsa tü VÜWA nüh mari vü azhükütsü müsa.

²Thinü VÜWA tüvü nüh anyih teru nü masü tsoriejam taji masü tü VÜWA tüvü nüh süm.

³Jüti küsa vü Mosa nüh Aron vü, “VÜWA nüh küüza eh kütuoh vü pehküvehri azhievü hi mpa nüh eh kümtse kütsanaveh, thi nyiri aveh tüvü hi tü tholathovü wie naveh,” ti küza. Jüti küüza vü Aron tü zohmti pehtewa.

⁴Jüti küsa vü Mosa nüh Aron püza Uzziel atsari Mishael thi Elzafan ji nü masü vü, “Shenyi ra nü kümtsezheh vünüh noh nüri kha taji kürünape alievü tewaluo,” ti küza.

⁵Thinü masü tü Mosa nüh küüza kümjie shenyi ru nü masü kruzhuküsazhewa lovü thse taji khawa kürünape alievü jam.

⁶Thi Mosa nüh Aron thi ma tsa künyi Eleazar thi Ithamar vü, “Nohsü tü müsü nüh sana küsa kenüh thi VÜWA rüküshuwa Israel ashiejiwa vü müküru nüh sana küsa kenüh nohri alü sheh küsoh nü müvü tümluo, thi nohri thsümnyi nga müzokhri tümluo, thitü noh jienü, Israel zhehlo aveh thuoüji VÜWA nüh anyih küze nü küütso hama kenüh lorünü külu peh luo.

⁷Thi nohri müsü nüh sana küsa kenüh juhthsü nazizheh lehpie mükari tümluo, küpakenühnyunü VÜWA vüjuh küüthsewa tü nohri lü rügivü pehküveh kenüh,” ti küza. Thinü mari tü Mosa nüh küüza kümjie sa.

⁸Jüti küsa vü VÜWA nüh Aron vü,

⁹“Müsü nüh sana küsa kenüh juhthsü nazizheh lovü wa na küsa vü noh nga thi noh tsari nga akhah nga thi kümzojuh nga müzhu tümluo, hama noh wuhle vü küsuokürho azhükhe sanaveh.

¹⁰Noh tü kümtse thi muomuo ta küsa thsüküpa naveh, thi mükümtse thi kümtse thsüküpa naveh;

¹¹thi noh tü VÜWA nüh Mosa vü küza nü nohri vü küüza zhühkheri vi Israel nyiri vü sosie naveh,” ti küza.

¹²Thinü Mosa nüh Aron thi ma tsa ma sierho küveh künyi, Eleazar thi Ithamar mari küche vü, “Anyih nüh tso nü kükhurü VÜWA vü kütsü ahie kükhurü kümnyiewa ahzhi müthse tü kükhurüpewa kütuoh vünüh tsaluo, küpakenühnyunü jüma tü mütse sheh küm kenüh;

¹³nohri tü jüma kümtse azhievü nüh tsanaveh, küpakenühnyunü jüma tü VÜWA vü anyih nüh tso nü kükhurü noh suope thi noh tsara suope; jüma tü hi nüh azhükütsüwa wiethuoh.

¹⁴ Thi akhukhu sawa thi thüchisawa vi kükhurüwa tü kümtse azhie küsüküsü vü nga nüh, noh tsa nyimpari thi nyimzari noh siepeh küvehri nüh tsanaveh; jümari tü Israel nyiri vünüh kütsathuozhü kükhurü sanü küsahthuo vünüh noh thi noh tsa nyimpara suope sakütsüthuoh kenüh.

¹⁵Thüchisa vi kükhurüwa thi akhusa vi masü tü aküthü anyih nüh tso nü kükhurüwa vü viji taji VÜWA tüvü kükhurü sana küsa kenüh viru naveh, thi jüma tü noh thi noh tsa noh siepeh küvehra zhi sanü VÜWA nüh azhükütsü kümjie, jüma tü küsuokürho suohpe sanaveh,” ti küza.

¹⁶Jüsevü Mosa nüh kükhiemuo kenüh kükhurü kütsü nyihsüwa kümhieti küna ünü, halie, jüma tü tsomla! Thinü Mosa nüh Aron tsa ma siepeh küveh künyi Eleazar thi Ithamar masü ji taji,

¹⁷ “Nohsü tü mokenüh kümtsezheh vünüh kükhiemuo kükhurüwatü mütsa lo? küpakenühnyunü jüma tü kümtse tsatsa zanyo küsa kenüh, thi jüma tü müzawa müküleh küsana küsa kenüh kütsü wie nü.

¹⁸Halie, jümawa züh tü kümtsezheh alotsawa vü vimturu. Hi nüh azhükütsü kümjie nohsü tü kümtsezheh vünüh kütsaleh nü,” ti küza.

¹⁹Thinü Aron nüh Mosa rüle taji, “Halie, masü tü nosü nüh VÜWA tüvü kükhiemuo kenüh kükhurü sa thi kütso kükhurü sa; thi zanyo hakümjie küsa hi vü ru le nti la! Mükütüküzü hi nüh kükhiemuo kenüh kükhurüwa nosü hi nüh kütsa tüla jüma tü VÜWA tüvü katora naveh ülo?” ti küza.

²⁰Mosa nüh jüma küünara vü ma lokütu sa.