Read Pochuri Naga LEVIRI 11 Bible Online

LEVIRI 11 - Pochuri Naga bible

LEVIRI 11

¹Jüti küsa vü VÜWA nüh Mosa thi Aron vü,

²Hamari tü rhoküveh zanyori, tinü azhihvü samwa hamari azhievü nüh tsamhieveh ti küsa Israel nyiri vü küza luo.

³Samwa azhievü khiemawa nüh atüwuo pruo thi kügihzhu nü tsanaveh ünüh jümari asa tsaluo.

⁴Thitü ma mpa nüh kügihzhu nü tsa tü thi wuohpruo tü hamari nü mütsa tümluo: Ut, küpakenühnyunü asa hamatü kügihzhu nü tsawie ketünga ma tüwuoh thuoüji müküpruokenüh, jükenüh nohkeri nüh hamatü mümtse.

⁵Atsuokrih mütsa tümluo, küpakenühnyunü ma tü kügihzhu tsa veh, tü ma tüwuoh tü müküpruo kenüh, jükenüh nohkeri nüh hamatü mümtse.

⁶Thi küüjemzhüwa nga mütsa tüm, ma nga kügihzhu nü tsaveh, thitü ma tüwuoh tü küperüm, tinü nohkeri nüh mümtse.

⁷Awu nga mütsa tüm, küpekennyunü atüwuo nü pruoveh, thitü kügihzhu mükütsa kenüh.

⁸Hamara sa mütsa tüm; thi mari küsü satsa nga müpa tüm; küpakenühnyunü jümari tü nohkeri nüh mükümtse kenüh.

⁹Thi ajuh lovü kütüri hamari aveh thuoüji tsa mhieveh. Juhküji vü kütünga saluo arühgu vü kütünga saluo awa thi azhe küpe aveh thuoüji tsaluo.

¹⁰Thitü ma mpa nüh juhküji vü kütü saluo, arühgu vü kütünga saluo aküsa thi azhe müküperi, ajuh vü ariehkhuo sanü kütseri thi ajuh vü asari thuoüji nohkeri nüh akükre küsü.

¹¹Nohri tü jümari krempeh huo üji mümhie; mari asa kütsawa nyu thi jümara küsüsa nga mükreji mümhie.

¹²Ajuh lovü kütü aküsa thi azhe müküpe aveh thuoüji nohkeri nüh akükre zhi.

¹³Jüsevü nga amüwari azhievü nohkeri nüh hamari mükreji mümhie, hamari nohkeri nüh akükre thi kütsavüh nyu; jümari thuoüji: khujorü, aluomü, küsürawi kümjiwa,

¹⁴aluozah thi atsüvü thi jükümjie küsari,

¹⁵awuo thi jükümjie küsari,

¹⁶ajuhmwa kükharawa, küzowa, juhmwa künyiawa, asa kütsa müwa thi jükümjie küsari,

¹⁷khujorü küzahwa, katitiwohyi, küsürawi kürhümowa,

¹⁸juhmwa küjinyiewa, aruohtsi, luomü kürüwuowa,

¹⁹suomwa küsuokruowa, suomwa ajih nga thi aku nga küsuokruowa thi jükümjie küsari, wikhalü thi ahula ti hamari tü nohkeri nüh akükre thi kütsavüh nyu.

²⁰“Thi shukrieluoveh aküsa thi ajih müzü küpe aveh thuoüji nohkeri nüh akükre.

²¹Jütawie ketünga aküsa thi mari mpha nyiehvü ajih pe nü azhihvü küjori thuoüji tsa mhieveh.

²²Jükümjie küsari thuoüji tsaluo ta küsari: ashukrie thi jükümjie küsari, akhüsi thi jükümjie küsari, shürüli thi jükümjie küsari, ashuhkrie thi jükümjie küsari.

²³Thitü shukrieluoveh aküsa thi ajih müzü küpe küpari thuoüji nohkeri nüh akükre.

²⁴“Jükümjie nohri tü hamari vünüh mümtse nüh sam naveh; thi hamari küsü pa thuoüji münüleh küju nohri tü mümtse nüh sanaveh,

²⁵thi wuori nüh hakümjie küsa aküsü vü nüh tsela thuoüji thsümnyi rüshüm naveh, thi münüleh küju mümtse nüh sam naveh.

²⁶Asa küsüküsü nga ma mpa nüh atüwuo pruo thitü ampha thuoüji küperü nyutü kügihzhu nü mütsa ti thuoüji nohkeri nüh mümtse, nyi küsüküsü nga jümari küpari thuoüji mümtse nüh sanaveh.

²⁷Thi ajih müzü vünüh kütse asa azhievü ampha nüh kütse asari thuoüji nohkeri nüh mümtse; thari nüh hamari küsü pa naveh ünüh münüleh küju mümtse nüh sanaveh,

²⁸Thari nüh hamari küsü vü naveh ünüh thsümnyi rüshüm naveh, thi münüleh küju mükümtse vünüh peh naveh; jümari tü nohkeri nüh mükümtse kenüh.

²⁹“Jüsevü nga azhih vü zhu nü rhokütse hamari nohkeri nüh mümtse: amüzhü, sohzhi küjiwa, thi jükümjie küsari,

³⁰asüfü, ajuhmie asuo vü kürhowa, asohzhi, thi wahiloh sohzhi.

³¹Zhukütseri azhievü hamari tü nohkeri nüh mümtse, hamari süküm sevü küpari thuoüji münüleh küju mümtse nüh sanaveh.

³²Hamara küsü rügivü zanyo küsüküsü nga satü, tsuotsake thuoüji, ma mpa nüh aküvi thsoh saluo, thsümnyi saluo, asahuluo, anyirü saluo, vi nü seküveh küfüküjuh küsüküsü nga saluo mümtse nüh sam naveh; tinü ajuh lovü thsemümji mümhie, thi jüma tü münüleh küju mümtse nüh sanaveh, thi jüsevü nüh mütse le naveh.

³³Mükütüküzü nüh hamari küsüküsü nga zhihküfü küsü lovü tsuotsake thuoüji jüma lovü kütü aveh tü münemthuoh, jükenüh nohri küfü jüma zokhuom naveh.

³⁴Jülo vü tüküveh kütsaküzhu tsaküümhie küsüküsü nga, ajuh jüla rütsuokem thuoüji mümtsethuoh, thi jükümjie küsa aküfü vünüh küzhura küzhujuh aveh mümtse nüh samnathuoh.

³⁵Thi hamari sü nü zanyo küsüküsü rügivü nga wa ka thuoüji, ma mpa nüh anyithü rügivü saluo nyutü amürü nyithü rügivü saluo zokhuorie jam naveh, küpakenühnyunü jümari tü mükümtse kenüh nohkeri nüh mümtsethuoh.

³⁶Jütawie ketünga ajuhküshupevü nyutü ajuhku lovü tsuotsake thuoüji mütse naveh, thitü zanyo küsüküsü nga aküsü satsa jüma shike nyutü pa thuoüji mümtse nüh sam nathuoh.

³⁷Thi hamari küsü küsüküsü nga amahtsü viwa zhuh na saküveh lovü kütsuotsake thuoüji mütse naveh;

³⁸thitü atsü lovü ajuh thsesanü jümara küsü küsüküsü nga atsü jüma lovü tsuotsake tu thuoüji atsü jüma tü nohkeri nüh mümtse nüh samthuoh.

³⁹Jüsevü nga mükütüküzü asa nohri nüh kütsaraküsüküsü nga süm, thi anyi wuori nüh jüma pa, ti thuoüji ma tü münüleh küju mümtse nüh sam nathuoh,

⁴⁰thi thawa nüh jüma küsü sa tsanaveh ünüh ma thsümnyiri rüshüm naveh, thi münüleh küju mümtse nüh sam naveh; thi jüma küsü sa küvüwa nga ma thsümnyiri rüshüm naveh, thi münüleh küju mükümtse vü pehm naveh.

⁴¹“Jümpa mükünyu azhihvü zhu nü kütse aveh thuoüji nohkeri nüh mümtse; tinü jümari mütsa tümluo.

⁴²Thi avo vünüh küneke nü küzhuri, ajih müzü vünüh kütse, ajih khielota küperi, zhu nü kütse azhih rügivü zhukütseri thuoüji mütsara, küpakenühnyunü jümari tü mükümtse küsü.

⁴³Azhih vü zhu nü kütseri vünüh nohri mpa nohri samkümne tümluo, nohri tü mükümtse thama küsa kenüh jümari vünüh nohri samkümne tümluo.

⁴⁴Küpakenühnyunü hi tü VÜWA nohri Saküüwuowa, jükenüh nohri mpa nohri sakümtse luo, küpakenühnyunü hi tü kümtse kenüh. Azhih vü zhu nü rüvü kütseri vünüh nohri samkümne tümluo.

⁴⁵Hi tü noh Saküüwuowa ri sana küsa kenüh hi nüh Egypt zhih vünüh nohri siezhuru, küpakenühnyunü hi tü nohri VÜWA küsa kenüh; jükenüh nohri tü mümtse üji mümhie, küpakenühnyunü hi tü kümtse kenüh,” ti küza.

⁴⁶Hamatü asa, amüwa, azhih nyiehvü thi ajuh nyiehvü kütazüzü lehlehta zhukütseri kenüh khonyo kütsü.

⁴⁷Mükümtse thi kümtse azhievü thi kütazüzü lehlehta küzhu kütsarari thi mükütsarari azhievü thsüküüpa na küsa kenüh khonyo kütsü.