Read Pochuri Naga LEVIRI 12 Bible Online

LEVIRI 12 - Pochuri Naga bible

LEVIRI 12

¹VÜWA nüh Mosa vü,

²“Israel nyiri vü hama küza luo, mükütüküzü krevühri küsü nüh atsa moh nü nyimpari wuo thuoüji kümne turu küveh kenüh ma tü rülo türü mümtse nüh sanaveh, ma tü mümtse nüh saküm kenüh.

³Thi rülo tüzeawa thuoüji atsa nyimpa jümawa ahu tsi naveh.

⁴Thi krevühwa tü rülo cherake nü küche ma züh saküümtse vü peh wie naveh, jüti sanü ma saküümtse rülowa müjie küju nü ma tü zanyo kümtse küsü nga küpawa nyu, thi kümtsezheh vü nga küruwa nyu.

⁵Thitü krevühwa nüh atsa küwuowa nyimzari thuoüji rülo türamzü mümtse nü sanaveh, ma tü kümne turu küm kenüh; thi krevühwa tü rülo rorake nü türo ma züh saküümtse vü peh wie naveh.

⁶“Jüti sanü ma saküümtse rülowa jumthuoüji, ma mpa nüh atsawatü nyimpariluo nyutü nyimzariluo krevühwa nüh kütso kükhurü kenüh nyihzhüzah mahvi küsü kükhruo, thi kükhiemuo kükhurü kenüh azhehmükhrietü nyuji ato mükhrietü müküze küsü vi nü navüwa vü juhthsü kükhurüzheh lehpiewa vü ru naveh,

⁷Jüti sanü navüwa nüh krevühwa kenüh VÜWA tüvü nüh kürhehsa satsü taji ma vünüh kümne turu küvehwa vünüh mütsem naveh. Hamari ma mpa nüh nyimpari wuoluo nyutü nyimzari wuoluo krevühwa kenüh khonyo kütsü.

⁸ Thitü mükütüküzü ma nüh nyihzhüzah küsü mütsürathuoüji ato mükhrietü künyi nyutü azheh mükhrietü müküze künyi: küsü thuoüji kütso kükhurü kenüh thi küpawa thuoüji kükhiemuo kükhurü kenüh; jüti sanü navüwa nüh kürhehsa küüroh satsü nü ma tü kümtse sanaveh,” ti küza.