Read Pochuri Naga LEVIRI 13 Bible Online

LEVIRI 13 - Pochuri Naga bible

LEVIRI 13

²Mükütüküzü nyi küsü nüh ma satsa asahu vü aküvü, nyutü kürüte nyutü athsopo sazhuteru nü ma satsa sahu vü hujirü küna shuteru thuoüji ma sie nü navüwa Aron nyutü ma tsari vü ru naveh,

³thi navüwa nüh ma satsa sahu naküm thsopowa no taji naküm thsopovü akünehri tü müjim thi akünawa tü ma satsa sahuwa kükhu vünüh shehm thuoüji jüma tü hujirü küna sam thuoüji navüwa nüh jüma no nü mükümtsethuoh ta küsaküzazhum nathuoh.

⁴Thitü ma satsa asahuwa thsopo tü müjim thitü ma sahu kükhuvü shehwa müveh üji anyi jüma tü navüwa nüh rülo türü azheh lovü khethuoke sanaveh;

⁵thi rülo türüawa navüwa nüh ma no le nü ma nothavü aküna thsopowa tü thopahiri mwa ti thuoüji ma tü rülo türü navüwa nüh khethuoke sa le naveh;

⁶jüti sanü rülo türüawa navüwa nüh ma no le taji naküveh thsopowa tü rüwuoveh thi künawa tü thopahiri mwa ti thuoüji navüwa nüh ma tü mütsem ta küzaküthsüm naveh; jüma tü ma mpa nüh kürüte wie, thi ma tü ma thsümnyiri rüshüm nü mütseküm sanaveh.

⁷Thitü ma nüh ma sakümtse na küsa kenüh navüwa vü wa künoküm sevü nüh kürüte thsopo watü jiteru thuoüji ma tü shele wa taji navüwa vü kütsa le naveh;

⁸thi navüwa nüh jüma künovü kürütewatü asahu vü rhuotewa thuoüji navüwa nüh ma tü mümtsethuoh ta phrahzhum nathuoh; küpakenühnyunü jüma tü hujirü küna küsathuoh kenüh.

⁹Mükütüküzü nyi küsü tü hujirü künawa vünüh namthuoüji, ma tü navüwa vü sieru naveh;

¹⁰thi navüwa nüh no nü jüma tü sahu vü müji thi aküneh nga müjim thi aküvüwa vü asa shita kükhaphrü pehveh thuoüji,

¹¹ma satsa sahu vü nakümsüsheh pehmthuoh, tinü navüwa nüh ma tü mümtsethuoh ta küzaküthsüm nathuoh, thi ma tü mükümtsethuoh kenüh navüwa tü azheh lovü ma kheke küsawanyuthuoh.

¹²Thi mükütüküzü hujirü künawa tü asahu vü shuteru nü ma lü vünüh ma jih küju prom taji navüwa nüh kületsuo vünüh nguram thuoüji,

¹³navüwa nüh no le naveh, thi hujirü künawa tü ma satsa prom thuoüji ma nüh ma tü akünawa vünüh mütsemthuoh ta küzaküthsü naveh; küpakenühnyunü aveh müji kümthuoh kenüh, thi ma tü mütsem thuoh.

¹⁴Thitü asatsa kürhowa ma vü shuru le thuoüji ma tü mümtse nüh sam nathuoh.

¹⁵Thi navüwa nüh asa kürhowa no nü ma tü mümtse ta küsa küzaküthsüm naveh, küpakenühnyunü asa kürho tü mümtse, thi jüma tü hujirü künathuoh.

¹⁶Thitü asatsa kürhowa tü khaphrüle müjitewa thuoüji ma tü navüwa vü ru le naveh,

¹⁷thi navüwa nüh jüma no nü akünawa tü müjim le thuoüji navüwa nüh akünawa tü mütsemthuoh ta küsa küzaküthsüm le naveh; küpakenühnyunü ma tü mütsekümthuoh kenüh.

¹⁸Thi mükütüküzü nyi küsü satsa vü awule shu nü kum,

¹⁹thitü kuküm sevü jüma thsopo vünüh vüzhuru, nyutü rüwuo taji thsopo kümjizah shuteru thuoüji ma tü wa nü navüwa kütsanaveh;

²⁰thi navüwa nüh jüma no taji jüma tü sahu kükhuvü shehtewa thi akünehwa tü müjiteru ti thuoüji navüwa nüh ma tü mümtse ta küsa küzazhum naveh, küpakenühnyunü hujirü küna jüma tü awule vünüh shuteküru thuoh kenüh.

²¹Thitü navüwa nüh jüma küno vü aküneh tü mümji thi asahu kükhuvü shehmwa nüh rüwuom thuoüji navüwa nüh ma tü rülo türü azheh lovü khethuoke sanaveh;

²²thi jüma tü asahu vü chitewa thuoüji jüma tü aküna sakümthuoh kenüh navüwa nüh ma nü mümtsethuoh ta küsa küzaküthsüm naveh.

²³Thitü athsopowa tü chimwa nüh masasa wieji jüma tü awulewa thsopo wiethuoh.

²⁴“Nyutü asatsa vü sahu tsom thi asatsa kürhowa thsopo tsokümwa tü rüwuo wechü nyutü müji teru thuoüji,

²⁵navüwa nüh thsopo jüma no naveh, thi ma thsopo vü akünehri tü müjim thi akünawa tü asahu kükhuvü shehtewa ti thuoüji jüma tü hujirü künathuoh; jüma tü akütso thsopo vünüh shuru nü hujirü küna sakümthuoh kenüh navüwa nüh ma nü mümtsethuoh ta küsa küzaküthsüm nathuoh.

²⁶Thitü navüwa nüh jüma no nü ma thsopo vü akünehri tü mümji thi akünawa tü asahu kükhu vü shehmwa nüh rüwuom ti thuoüji navüwa nüh rülo türü ma azheh lovü khethuoke sanaveh,

²⁷jüti sanü rülo türüawa navüwa nüh ma no le taji ma thsopowa asahu vü kuochitewa thuoüji jüma tü hujirü küna sakümthuoh kenüh navüwa nüh ma tü mümtsethuoh ta küsa küzaküthsüm naveh.

²⁸Thitü athsopowa tü chimwa nüh rüwuo nü masasa thi athsopowa tü akütso vünüh vüküveh wie üji jüma tü akütso thsopo wie küsa kenüh navüwa nüh ma nü mütsem ta küsa küzaküthsü naveh.

²⁹“Jüsevü nga ma mpa nüh nyimpari saluo thi nyimzari saluo alü vü nyutü akhakhe vü akhüma shuteru thuoüji,

³⁰navüwa nüh no naveh; thi jüma sahu kükhuvü shehtewa, thi akünehri tü wazhi nü lozüm ti thuoüji jüma tü kümtho thi alüvü nyutü akhakhe vü hujirü küsathuoh kenüh, jükenüh navüwa nüh ma tü mümtsethuoh ta küzaküthsüm nathuoh.

³¹Thi navüwa nüh mütho nü naküvehwa no taji akünawa tü asahu kükhu vü shehwa müveh üji thi ma thsopovü aküneh künyi pehmveh üji ma mütho nü naküvehwa kenüh navüwa nüh ma rülo türü azheh lovü khethuoke sanaveh,

³²thi rülo türüawa navüwa nüh akünawa no nü kümthowa thsopo tü kuochimwa, thi aküneh küwazhi münyie thi kümthowa tü asahu kükhu vü shehtemwa,

³³ti thuoüji ma mpa nüh sem naveh, thi kümthowa thuoüji küsewa nyu; jüti sanü navüwa nüh rülo türü ma khethuokele naveh;

³⁴thi rülo türüawa navüwa nüh kümthowa no nü kümthowa tü asahu vü athsopo kuochimwa thi asahu kükhuvü shehmwa ti thuoüji ma tü mütsem ta küsa küza küthsüm naveh, thi ma tü ma thsümnyi rüshüm nü ma tü mütsem naveh.

³⁵Thitü ma sakümtse küm sevü nü ma kümthowa tü asahu vü kuochitewa thuoüji,

³⁶navüwa nüh ma no le taji kümthowa tü asahu vü kuochitewa üji aküneh küwazhi moma phah le sanüh ma tü mükümtse sam nathuoh.

³⁷Thitü ma notha vünüh kümthowa nom thi jüla aküneh künyi shiveh thuoüji kümthowa tü mhiemthuoh thi ma tü mütsemthuoh; thi navüwa nüh ma tü mütsemthuoh ta küsa küzaküthsüm naveh.

³⁸“Jüma sevü nga azhüazhü nüh nyimpari nga satü nyimzari nga satü asatsa sahu vü thsopo kümji pe,

³⁹ti thuoüji navüwa nüh no nü asatsa vü asahuwa tü nosüm, thi jüma tü asahu kütsoto vünüh shuküru ti thuoüji ma tü mütseveh.

⁴⁰“Nyi küsü asheh ma mpa nüh kretewa thi mütham wie ketünga ma tü mütseveh.

⁴¹Thi nyi küsü adiesheh thi anakieh sheh kretewa nü mütha wie ketünga ma tü mütseveh.

⁴²Thitü alü kümtsevü satü nyutü adie kümtsevü satü rüwuo nü müji taji aküna thsopo shuteru thuoüji hujirü küna shuvehthuoh.

⁴³Jümatü navüwa nüh no nü na taji vüküvehwa tü ma mpa nüh alükümtse vü satü nyutü adie kümtse vü satü hujirü küna kümjie samthuoh üji,

⁴⁴ma nü hujirü künarithuoh thi ma thuoüji mümtsethuoh; ma künawa tü alü rügivü samthuoh ta küsa küzaküthsü mümji mümhie.

⁴⁵“Thawa nüh hujirü küna peveh ünüh thsümnyi kütuo vü thi alüsheh hie müvü tü kürhie nü küüvü luo, thi ma po küwute taji, “Mümtse nüh, mümtse nüh,” ta sanü zie naveh.

⁴⁶Ma tü mükümtse kenüh akünawa ma vü küpe küju nü ma tü mükümtse vü peh huom naveh; jüti sanü kürünape alievü ma mpa rho naveh.

⁴⁷“Mükütüküzü thsümnyi vü hujirü küna arü pem thuoüji, ma mpa nüh nyihzhü küneh nüh kütoluo nyutü mürilo nüh küto thsünyawa saluo,

⁴⁸mürilo thsünyawa satü nyihzhü küneh nüh küto satü, nyutü asahu vü nga satü nyutü asahu vünüh küsa zanyo küsüküsü vü nga satü,

⁴⁹akünawa tü thsümnyi rügivü müzhizah nyutü mürüzah thuoüji ma mpa nüh alovü satü, asahu vü satü nyutü asahu nüh küsa zanyo küsüküsü vü nga satü, jüma tü hujirü künathuoh, tinü jümawa vi navüwa kütsanaveh.

⁵⁰Jüti sanü navüwa nüh jüma no nü rülo türü azheh lovü kheke sanaveh;

⁵¹thi ma nüh rülo türüawa jüma no le taji aküna arüwa tü thsümnyi; ma mpa nüh alo nüh kütoluo, asahuluo nyutü asahu nüh küsa zanyo küsüküsü vü nga saluo jüma tü hujirü küna kümsüwathuoh; tinü jüma tü mümtsethuoh.

⁵²Ma mpa nüh aküna rüwatü küürü vü satü, küürüshu vü satü, nyihzhü küneh nüh küto saluo, mürilothsü saluo, nyutü asahu nüh küsa küsüküsü nga navüwa nüh tsom naveh, küpakenühnyunü jüma tü hujirü küna kümsütsatsawa sakümthuoh kenüh tsom naveh.

⁵³“Thitü navüwa nüh no nü thsümnyi vü kuochimwa thuoüji ma mpa nüh asahu nüh küsa küsüküsü küürüshu vü satü, nyutü küürü vü nga satü,

⁵⁴aküna rüwa khiela pe nüh rüshüm üta navüwa nüh azhütsü naveh, thi rülo türüawa azheh lovü kheke sa le naveh;

⁵⁵jüti sanü rüshü küm sevü navüwa nüh no le naveh. Azhüazhü nüh aküna thsopowa tü chimwa wie ketünga ma tsowa mükhaphrü wieji mümtse wie; ma mpa nüh hujirü küna thsopowa tü asevü satü thi atüvü satü jüma tü anyih vünüh tsom wie naveh.

⁵⁶“Thitü navüwa nüh jüma no nü rüshüküm sevü akünawa thsopo tü rüwuom ji ma mpa nüh thsümnyi küsüküsü nga saluo ma thsopo vü khrihzhujam naveh;

⁵⁷jüsevü nga ma mpa nüh thsümnyi küsüküsüvü nga satü shuteru le thuoüji jüma tü athsopowa kuochiwa wie, jükenüh aküna pekümwa anyih vünüh tsom naveh.

⁵⁸Thitü thsümnyi küsüküsü nga rüshüküm sevü aküna rüwa tü tewa thuoüji jüma tü rüshü lehü nü kümtsem naveh,” ti küza.

⁵⁹Khonyo hamatü thsümnyi küsüküsü vü nga hujirü küna mütseveh thi mümtse ta küsa khonyo.