Read Pochuri Naga LEVIRI 14 Bible Online

LEVIRI 14 - Pochuri Naga bible

LEVIRI 14

² whujirü künawa ma saküümtse rülowa kenüh khonyo hama. Ma sie nü navüwa vü ru naveh;

³thi navüwa nüh kürünape alievü wa taji ma nüh no naveh. Jüti sanü mükütüküzü hujirü künawa tü mhiem thuoüji,

⁴navü ma sakümtse nta saküvehwa tü nyuri nüh amüwa kümtse künyi, müsethsoh, akuli kümüru, thi achieshu ti viru üta azhütsü naveh;

⁵thi navüwa nüh mari tü azhih küfü ajuh müzhiechü küveh vünüh amüwa küsü fethe üta azhütsü naveh.

⁶Thi ma nüh amüwa müfethe nüh saküvehwa, müsethsohwa, akuli kümüru thi achieshu ti vi nü amüwa feteküsawa azüh lovü teke naveh.

⁷Jüti sanü thawa hujirü küna vünüh sakümtse nta saveh ünüh jümawa vü azüh türü keri kajake nü ma tü mütsemthuoh ta ma nüh sanaveh, thi amüwa rhoküvehwa arezavü prüküzem naveh.

⁸Thi ma sakümtse na saküvehwa tü ma thsümnyi rüshüm, ma küneh aveh sem thi ajuhküzüm nü ma tü mütseküm sanü jüsevü nüh kürünape lovü tu naveh, thitü ma juhthsüzheh lovü mütu nüh ma juhthsüzheh alievü rülo türü peh naveh.

⁹Jüti sanü rülo türüawa ma tü ma lü sheh aveh, ma khane aveh, anokha küneh thi ma küneh aveh sekhehm naveh. Jüti sanü ma thsümnyi aveh rüshü kheh, thi ajuhküzüm taji mütsem naveh.

¹⁰Thi rülo tüzeawa ma tü nyihzhüza azhührhü müküpe künyi, nyihzhüvo küsü azhührhümüküpe, ahie toküümnya avüjuh küünyarü küüto küche thi vüjuh kete küsü küüsuo küche sanü küsü ti viru naveh.

¹¹Jüti sanü thawa sakümtse na saveh ünüh navüwa nüh ma thi zanyo hamari ti vü taji juhthsü künazizheh lehpie vü sanaveh.

¹²Thi navüwa nüh nyihzhüvo thi vüjuh küüsuo küsüwa vi nü müküleh kükhurü sanaveh, jüma vi taji VÜWA tüvü noküja kükhurü sanaveh.

¹³Jüti sanü mari nüh kükhiemuo kükhurü kenüh thi kütso kükhurü kenüh küfethe kümjie kümtse azhiewa vünüh müküleh kükhurüwa tü kükhiemuo kükhurüwa kümjie nyihzhüzahwa fethe naveh, jüma tü navüwa zhi; thi mütha shehm.

¹⁴Thi navüwa nüh jüma züh pike vi nü sakümtse na küsawa akhüna azhie wuovü thsopo, ake azhie wuovü tüjü küjiwa thsopo thi ma jih azhie wuovü tüjü küjiwa thsopo küwi naveh.

¹⁵Jüsevü nga navüwa nüh avüjuhwa vünüh ma müza azhu wuovü thse,

¹⁶thi ma ke azhie wuovü tüjü tü azhu wuovü müza lovü vüjuh tüküvehwa lovü küjo nü vüjuh wuovü türü keri VÜWA tüvü kajake naveh.

¹⁷Thi vüjuh ma müza lovü tüküveh vi taji anyi jümawa khüna azhie wuovü thsopo, ma ke azhie wuovü tüjü küjiwa thsopo thi ma jih tüjü küjiwa thsopo vü müküleh küsa kükhurü kenüh azüh thse küsawa nyieh vü küwi naveh.

¹⁸Thi navüwa müza vü küpeh vüjuhwa vi ma lü rügivü thse tsü naveh. Jüti sanü VÜWA tüvü nüh ma tü kürhehsa küüroh sanaveh.

¹⁹Ma mükümtse vünüh navüwa nüh ma kürhehsa küüroh sataji kükhiemuo kükhurü satsü naveh. Thi jüma sevü nüh kütso kükhurü kenüh fethe naveh;

²⁰jüti sanü navüwa nüh kütso kükhurüwa thi ahie vi kükhurüwa kükhurüpe rügi vünüh sanaveh. Hakümjie vünüh navüwa nüh ma kenüh kürhehsa küüroh sanü ma tü mütsem naveh.

²¹“Thitü mükütüküzü anyi jüma nüh mükhuoküm kenüh jüzake mütsüra thuoüji shohküze nü müküleh kükhurü sataji ma kenüh nyihzhüvo küsü, ahie vi kükhurü kenüh vüjuh küsarü küüto küsü thi vüjuh kete küüsuo küche sanü küsü ti viru naveh;

²²jümpa mükünyu ato mükhrietü künyi nyutü azheh mükhrietü kürünyi künyi ma nüh küsara viru naveh; küsü thuoüji kükhiemuo kenüh vi kükhurü, thi küpawa thuoüji kütso kükhurü kenüh.

²³Rülo tüzeawa ma saküümtse kenüh juhthsü nazizheh lehpie vü VÜWA tüvü jümasü viru naveh.

²⁴Thi navüwa nüh müküleh kükhurü kenüh nyihzhüzahwa, vüjuh kete küsü ti vi nü noküja kükhurü sataji VÜWA tüvü shohküze naveh.

²⁵Jüti sanü navüwa nüh müküleh kenüh vi kükhurü nyihzhüwa fethe taji jümawa vünüh azüh pike vi nü ma khüna azhie wuovü thsopo, ma ke azhie wuovü tüjü küjiwa thsopo ti thse naveh.

²⁶Thi azüh pike vi nü ma müza azhu wuovü thse taji;

²⁷ma tüjü azhie wuovü nüh VÜWA tüvü vüjuh pike türü keri kajake naveh.

²⁸Jüti sanü navüwa nüh ma müza azhu wuovü vüjuh tüküvehwa ma zhie wuovü tüjü nüh vi küjo taji ma khüna thsopo ma ke azhie wuovü tüjü küjiwa thsopo thi ma jih tüjü küjiwa thsopo vü vüjuh thse küsa nyiehvü thsetsü naveh.

²⁹Thi vüjuh ma müza lovü pehküveh aveh vi ma kütsathuo küüroh kenüh VÜWA tüvü nüh ma lü rügivü thsetsü naveh.

³⁰Jüti sanü ma nüh ato mükhrietü masü nyuji azheh mükhrietü künyi ma nüh küsarawa vi kükhurü sanaveh,

³¹küsü thuoüji kükhiemuo kenüh kükhurü, thi küpawa thuoüji kütso kükhurü kenüh, ti sanü VÜWA tüvü nüh ma kütsathuo küüroh sanaveh.

³²Hama tü hujirü künawa, thawa nüh ma saküümtse kenüh kükhurü mütsüra nüh jüma kenüh khonyo kütsü,” ti küza.

³³VÜWA nüh Mosa thi Aron vü,

³⁴“Hi nüh nohri vü kütsü Kanan zhih vü küru vü hi nüh azhih vi nohri vü kütsü azheh küsü vü hujirü küna thse thuoüji,

³⁵eh zheh vü hujirü küna pehküveh kümjie lie, ta azheh vüwa nüh ru navüwa vü küza naveh.

³⁶Thi navüwa nüh azheh jüma lovü küpeh aveh mümtse ta küsa thama küüzazhu kenüh azheh jüma sakürütso naveh, jüsevü nüh navüwa tü wa nü küno sanaveh.

³⁷Ma nüh jüma no taji akünawa tü azheh jüma zie rügivü küwazhizah nyutü kürüwuozah thsopo pehm, thi akünawa thsopo tü azie lovü shehtewa thuoüji,

³⁸navüwa tü azheh jüma lovü nüh lehpie vü shuwa nü rülo türü azheh jüma khethuokem naveh.

³⁹Jüti sanü navüwa tü rülo türüawa ru azheh jüma no taji arüwa tü azheh azievü chitewa thuoüji,

⁴⁰navüwa nüh mari vü azhütsü nü azie lohri aküna rü küpewa vizhu taji anyujiwa alievü mükümtsepe vü vijam üta küza naveh.

⁴¹Thi navüwa nüh azie arü küpe pe vü khija nü khiküja zhihri viwa taji anyujiwa alievü mükümtse pevü jam naveh

⁴²Jüti sanü azielohri vizhu kümri vü aloh küpa thse mürhe nü azhih khija kümri vü küpa nüh vi zhete le naveh.

⁴³“Thi azie lohri vizhum thi azievü khija küm sevü nga mükütüküzü azheh jüla küna rüwa shuteru le thuoüji;

⁴⁴navüwa nüh wa nü no le taji aküna rüwa tü azheh vü shutetse üji hujirü küna kümsütsatsathuoh; tinü mümtsethuoh.

⁴⁵Jükenüh ma nüh azhehwa tü alohzieluo, athsohzieluo thi azie zheküsa avehluo fechiem nü phrü taji mükümtse azhie anyujiwa alievü viwajam nathuoh.

⁴⁶Jü mpa mükünyu azheh jüma khethuoke küsa vü thawa nüh jüma lovü tu nüh, jüma thuoüji münüleh küju mümtse nüh sam naveh.

⁴⁷Thi thawa nüh azheh jüla zeh thi ashie tsanüh ma thsümnyi rüshüm naveh.

⁴⁸“Thitü navüwa nüh ru künovü azie jüma zheküm sevü aküna rüwa tü thsopo chimveh thuoüji azheh künawa tü mhie kümthuoh kenüh azheh jüma tü mütsemthuoh ta navüwa nüh küzaküthsü naveh.

⁴⁹Jüti sanü azheh jüma saküümtse kenüh ma tü amüwa küzah künyi, müsethsoh, alo kümüru thi achieshu ti viru naveh,

⁵⁰thi amüwa küsü vi nü zhihküfü ajuh müzhiechü küveh vünüh fethe naveh,

⁵¹jüti sanü müsethsoh, achieshu thi alo müruküchiechiewa thi amüwa müfethe nüh rhoküvehwa ti vi nü azhihküfü ajuh kümzhiechü rügivü nüh amüwa küfethewa züh vü küjo taji azheh jümawa vü türükeri kajake naveh.

⁵²Hakümjie vünüh ma tü ma zhehwa müwa fethe küsawa züh, ajuh müzhiechü küveh, amüwa rhoküvehwa, müsethsowa, ahesawa thi kütsavüh kümüru vi nü sakümtse naveh.

⁵³Jüti sanü ma nüh amüwa rhoküvehwa tü anyujiwa alievü arezavü prü küüzem taji azhehwa kenüh kürhehsa küüroh sanü azhehwa tü kümütse naveh,” ti küza.

⁵⁴Hama tü hujirü küna küsüküsü kenüh khonyo kütsüwa wiethuoh: kümtho kenüh saluo,

⁵⁵hujirü thsümnyi vü, nyutü azheh vü,

⁵⁶thi aküvü kenüh nga saluo, kürüte kenüh nga saluo, nyutü athsopo kenüh saluo.

⁵⁷Mükümtse kenüh nga thi kümtse kenüh nga ti kütsana küsawa wiethuoh. Hamatü hujirü küna kenüh khonyo kütsüwa wiethuoh.