Read Pochuri Naga LEVIRI 16 Bible Online

LEVIRI 16 - Pochuri Naga bible

LEVIRI 16

¹Aron atsa künyi VÜWA vü shenyi küru vünüh süküm sevü VÜWA nüh Mosa vü küüza;

² VÜWA nüh Mosa vü küza taji, Aron, noh jie tü müsü nüh sana küsa kenüh kümtse azhie kükhurüpewa rügivü noküümze pewa athsü ziete saküvehwa vü tsotho aveh müru tüm üti küza luo; küpakenühnyunü hi nüh noküümze pewa rügivü akülu vünüh hi kütsanaküveh kenüh.

³ Thitü ma tü jüla küru vü shüvotsazah küsü kükhiemuo kenüh kükhurü, thi nyihzhüvozah küsü kütso kükhurü kenüh ti vi nü ru luo.

⁴Ma tü mürilo kruzhuküsazhe kümtsewa, mürilo kümkhemnyi, mürilo kütsekevüh, mürilo lüwe vü, ti sanü ru luo, hamari tü kümtse thsünyawa. Ma satsa ajuh nüh küzüm nü thsümnyi hamari vü luo.

⁵Thi Israel nyiri müzawa vünüh nyihsüvo künyi kükhiemuo kükhurü kenüh thi kütso kükhurü kenüh nyihzhüvo küsü ti vi naveh.

⁶“Thi Aron nüh ma mpa ma kenüh shüvotsazah küsü vi kükhiemuo kükhurü sanü ma mpa ma kenüh nga thi ma tharuo kenüh nga ti küsahthuo sanaveh.

⁷Jüsevü nga ma nüh nyihsü künyi juhthsü nazizheh lehpie VÜWA tüvü viru naveh.

⁸Thi Aron nüh nyihsü künyi rügivü aküzeri sanaveh, aküze küsü thuoüji VÜWA kenüh thi küpa küsüwa thuoüji Azazel kenüh.

⁹Jüti sanü aküze VÜWA vü küshuwa anyihzhü viwa nü kükhiemuo kenüh kükhurü sanaveh.

¹⁰Thitü aküze sanü nyihsü Azazel vü kütsuotsakewa thuoüji kütsathuo küüroh sataji VÜWA tüvü tsü naveh, küpakenühnyunü jüma tü akürho Azazel kenüh areza vü küze naveh.

¹¹“Thi Aron nüh ma mpa ma kenüh shüvotsazah küsü vi kükhiemuo kükhurü sanü ma mpa ma kenüh nga thi ma tharuo kenüh nga ti küsahthuo sanaveh; ma tü ma mpa ma kenüh shüvotsazahwa fethe nü ma kenüh kükhiemuo kükhurü sanaveh.

¹²Thi VÜWA tüvü nüh kükhurüpe vünüh anyihie küju nyihthüku küpro thi sierhe müshe künyi vi nü küzietethsü vü ru naveh.

¹³Thi ma tü müsü nüh sana küsa kenüh VÜWA tüvü nüh sierhewa anyihku lovü thse tso nü pohvükuwa rügivü pehküvehwa noküümze pewa küülüwute naveh.

¹⁴Jüti sanü ma nüh shüvotsazah fethe küsawa züh ma tüjü nüh thsete taji noküümze pewa tüvü kajake naveh, ma nüh ma tüjü nüh noküümze pewa tüvü türü keri azühwa kajake naveh.

¹⁵ “Jüti sanü ma nüh Israel nyiri kenüh kükhiemuo kenüh kükhurü nyihsüwa fethe nü azühwa küzietethsüwa vü viru taji shüvotsazahwa züh küsa kümjie vünüh hama züh vi nü noküümze pewa rügivü thi ma tüvü ti kajake naveh;

¹⁶Israel nyiri mükümtse kenüh, mari nüh müküleh küsa kenüh; mari kükhiemuo aveh kenüh; hakümjie vünüh ma nüh kümtsewa kenüh kütsathuo küüroh sanaveh, mari mükümtse azhievü pehküveh juhthsü nazizhehwa kenüh hakümjie sanaveh.

¹⁷Thi ma nüh ma kenüh, ma tharuo kenüh thi Israel kümhu müzawa kenüh juhthsü nazizheh lovü kümtse zhiewa vünüh kütsathuo küüroh sa nta kütuvü nyi küsü nga jülovü küpehwa nyu thi ma müjie shuküru küju nü nyi küsü nga kütuwa nyu.

¹⁸Jüti sanü ma tü VÜWA tüvü pehküveh kükhurüpewa vü tsezhuwa nü jüma kenüh kütsathuo küüroh sanaveh, thi shüvotsazah azüh pike thi nyihsü züh vi taji kükhurüpewa rütsüri vü thse naveh.

¹⁹Thi ma tüjü nüh türü keri jüma rügivü azüh pike kajake nü Israel nyiri mükümtse vünüh jüma sakümtse thi sakümtsem naveh.

²⁰“Jüti sanü ma nüh kümtse azhiewa kenüh, juhthsü nazizhehwa kenüh thi kükhurüpewa kenüh ti kütsathuo küüroh küsa sehkhewa jura thuoüji Azazel kenüh nyihsü sa küveh akürho tsümnathuoh.

²¹Thi Aron nüh ma ke künyi khürü nyihsü kürhowa lü rügivü sanü jüma rügivü Israel nyiri müküleh küsa aveh, mari nüh khonyo phrürie küm aveh thi mari kükhiemuo aveh nyihsüwa lü rügivü phrakem nü thawa küze nta thoh saveh ünüh jüma nüh nyihsüwa sie taji arezavü küzem naveh.

²²Nyihsüwa nüh mari müküleh küsa aveh vü nü azhie küüzo pe vü wa taji anyi jüma sieküwa wa nüh anyihsüwa tü arezavü küzem naveh.

²³ “Jüti sanü Aron tü juhthsü nazizheh lovü teru nü ma nüh kümtse azhievü vü küwa thsünyawari fom nü jüla sam naveh.

²⁴Thi kümtse azhie vünüh ma satsa ajuhküzüm nü ma thsünyawari vi vü taji shuhru Israel nyiri kenüh kütso kükhurü sa, thi ma mpa ma kenüh thi Israel nyiri kenüh kütsathuo küüroh sanaveh.

²⁵Thi kükhiemuo kenüh kükhurü küsawa küthü vi nü kükhurüpe vünüh tso naveh.

²⁶Thi anyi khiemawa nüh nyihsüwa siewa nü Azazel vü küze nüh jüma tü ma satsa juhküzüm taji kürünape lovü turu naveh.

²⁷ Jüti sanü kükhiemuo kenüh vi kükhurü shüvotsazahwa thi nyihsüwa züh tü alovü vitu nü kümtse azhievü nüh kütsathuo küüroh küsawa tü kürünape alievü viwa taji jümasü sahu, asatsa, thi asüri tü anyih vünüh tsom naveh.

²⁸Thi thawa nüh jümari tso nüh ma thsünyawari rüshüm, ma satsa juhküzüm ti sanü jüsevü nüh kürünape lovü turu naveh.

²⁹ “Thi hamatü nohkeri nüh küsuokürho zhühkhe sanaveh, asa türüawa rülo türawa vü ma mpa nüh anyu vü kürhori saluo, anyitheri saluo thi rülo pike ru kürhori saluo küüroh küsü nga müsa wiethuoh nüh nohri mpa nohri sakükheke naveh.

³⁰Küpakenühnyunü hama rülovü nohkeri nüh kütsathuo küüroh sanaküveh kenüh, nohri sakümtsem nü VÜWA tüvü nohri kükhiemuo vünüh mütseküm sanaveh.

³¹Hamatü nohkeri nüh kümnyi küükheke rülo nohri mpa nohri saküükheke rülo sanü küsuokürho zhühkhe sanaveh.

³²Thi navü thawa nüh ma pa müthoh sanü thsemthuoh thi sakümtse taji navü sa eh ünüh mürilothsü kümtseri vü nü kütsathuo küüroh sanaveh;

³³ma nüh kümtse kükhurüzheh kenüh, juhthsü nazizheh kenüh, kükhurüpewa kenüh, navüri kenüh thi anyi müza kümhuwa kenüh ti kütsathuo küüroh sanaveh.

³⁴Hamatü Israel nyiri kükhiemuori kenüh mahvi küsü vü küsükeri kütsathuo küüroh küsa küsuokürho zhühkhe sanaveh,” ti küza. Thinü Mosa tü VÜWA nüh ma vü azhükütsü kümjie sakheh.