Read Pochuri Naga LEVIRI 2 Bible Online

LEVIRI 2 - Pochuri Naga bible

LEVIRI 2

¹Nyi küsü nüh VÜWA vü kütsü atha viru thuoüji ma nüh kütsüwa tü ahie toküümnya müsaji mümhie; ahie lovü vüjuh thi rheküüngu thse luo,

²thi viru Aron atsa navüri vü tsüluo. Jüti sanü anyi jüma nüh ahie amüshe küsü küpro, avüjuh thi rheküüngu aveh ti vi nü müsheküpeh huo azhi küsü sanü navüwa nüh kükhurüpe rügivü nüh tso naveh, thi jüma tü anyih vünüh kükhurü sanü VÜWA vü arheküüngu küsü küsanaveh.

³Jüma vi nü kükhurü küsa ahie kümnyie aveh Aron thi ma tsara zhi sanaveh; thi jüma tü VÜWA vü anyih vünüh kütso kükhurü kümtsetsatsawa sanaveh.

⁴Mükütüküzü nohri nüh anyithü vünüh alohse küveh VÜWA vü kütsü viru thuoüji jüma tü ahzhi müthse nüh ahie toküümnya tiehshu vüjuh küthse nyutü lohse kürüpah vüjuh nüh küüwi viru naveh.

⁵Thi azhüazhü nohri nüh VÜWA vü kütsüwa tü küfükümzhah vünüh amüsa küveh thuoüji amüsa tohküümnya vüjuh küthse ahzhi müküthse müsaji mümhie.

⁶Thi jüma zokhuo nü avüjuh züke luo; hamatü atha vi nü kükhurü küsa zhi.

⁷Mükütüküzü nohri nüh atahthsü vünüh atha küvehwa thuoüji jüma tü ahie toküümnya vüjuh küthse sanaveh.

⁸Atha nüh küsa zanyo hamari nohri tü vi nü VÜWA vü ru naveh, nohri nüh hamari vi nü navüwa tüvü küru vü ma nüh jümari vi kükhurüpe vü ru naveh.

⁹Thi navüwa nüh atha nüh kükhurüwa suo vi nü müsheküpeh huo kenüh kükhurüpe rügivü nüh tso naveh, thi jüma tü anyih vünüh kükhurü sanü VÜWA vü küüngu küsü küsanaveh.

¹⁰Jüma vi nü kükhurü küsa ahie kümnyie aveh Aron thi ma tsara zhi sanaveh; thi jüma tü VÜWA vü anyih vünüh kütso kükhurü kümtsetsawa sanaveh.

¹¹Ahie vi kükhurü küsa küsü nga ahzhi thse nü sataji VÜWA vü vi mürura; küpakenühnyunü noh nüh VÜWA vü kütso kükhurü küsa vü ahzhi nyutü awejuh mütsora.

¹²Aluoshü avi küpekhuri vi VÜWA vü kütsü vü jümari viru mhieveh, thitü jümari vi nü arheküüngu küsa kenüh kükhurüpewa rügivü müthsera.

¹³Noh nüh ahie vi nü kükhurü küsa aveh vü amütsü thse nü saküüshe naveh; nohri tü noh ahieri nüh vi kükhurü küsa vü VÜWA sie kütsathuo amütsüwa tü küüphewa nyu; nohri nüh VÜWA vü zanyokütsü aveh vü amütsü thsenyie wie naveh.

¹⁴Mükütüküzü nohri nüh VÜWA vü noh luoshüri pokhuri ahie tsüthuoh üji ma to vünüh ma kre mürheru tohnya nü atahthsü vünüh nyih luo.

¹⁵Jüti sanü avüjuh thse nü arheküüngu nüh ma nyiehvü zhikeluo, jüma tü ahie nüh kükhurüwa wiethuoh.

¹⁶Thi müsheküpeh huo sana küsa kenüh ahie kütoh, vüjuh thi arheküüngu ti suo vi nü navüwa nüh tso naveh; hamatü VÜWA vü anyih nüh tso nü kükhurü küsü.