Read Pochuri Naga LEVIRI 20 Bible Online

LEVIRI 20 - Pochuri Naga bible

LEVIRI 20

¹VÜWA nüh Mosa vü,

²ma mpa nüh Israel nyiri saluo, nyutü anyitheri priru nü Israel vü ru kürhori saluo thawa nüh ma tsa küsüküsü nga Molek vü tsü naveh ünüh zothe naveh; azhih jüla nyiri nüh aloh vi nü vehthe naveh ti küsa Israel nyiri vü küza luo.

³Hi mpa wie nga nüh eh nyieh ma vü küprüke nü ma nyiri zavü nüh ma vijam naveh, küpakenühnyunü ma nüh ma tsa vi Molek vü tsü taji eh kümtsezhehwa sakümne thi eh nyo kümtsewa sakümne kümthuoh kenüh.

⁴Thi mükütüküzü anyi jüma nüh Molek vü ma tsa tsü kümvü azhih jüla nyiri nüh anyi jüma müfethe nüh küthim thuoüji,

⁵hi nüh eh nyieh ma vü thi ma tharuo vü küprüke nü ma nyiri azhievü nüh mari vijam naveh, ma nga thi ma senyi nü Molek sie taji küüphroküphrie küsari nga aveh vijakhehm naveh.

⁶Mükütüküzü nyi küsü nüh küsüra rüzhe kenüh kütüma thi tümari vü küprüke nü mari sie küüphroküphrie savehthuoüji, hi nüh anyi jümawa vü eh nyieh vü küprüke nü ma nyiri azhievü nüh ma vijam naveh.

⁷Jükenüh nohri mpa nohri sakümtse taji kümtse kürho rholuo: küpakenühnyunü hi tü VÜWA nohri Saküüwuowa küsa kenüh.

⁸Eh zhühkheri müzhe luo thi jümari saluo; hi tü VÜWA nohri saküümtsewa.

⁹ Apa azah kümzüri aveh thuoüji küsü wie naveh; ma nüh ma pa nyutü ma zah müzü kümthuoh kenüh azühwa tü ma vü pehmthuoh.

¹⁰ “Mükütüküzü nyi küsü nüh ma zhephruwa vüvüh samsüm thuoüji nyimpawa nga thi nyimzawa nga küsüm naveh.

¹¹ Nyi küsü nüh ma pa vüvüh siezehm thuoüji ma pa satsa kürütso fojamtüthuoh; tinü masü khürü nga küsüm wie naveh.

¹² Mükütüküzü nyi küsü nüh ma jühnyi siezehm thuoüji masükhürü nga küsüm wie naveh, küpakenühnyunü ajienü kütsühnari samsüluo küm kenüh, masü azüh tü masü alüvü pehmthuoh.

¹³ Mükütüküzü nyimpari küsü nüh nyimzari sieküzeh kümjie nyimpari siezeh thuoüji masü khürünga küüsüm wie naveh; masü azüh tü masü vü pehmthuoh, küpakenühnyunü masü nüh akükre küüroh sakümthuoh kenüh.

¹⁴ Mükütüküzü nyi küsü nüh atsavühwa nga thi ma zah nga ti zarhie thuoüji jütü akhuoke kümsüthuoh, tinü nohri azhievü khuke kümsü müküpeh nüh sana küsa kenüh nyimpawa nga thi masü vühtsari nga ti anyih nüh tsothem naveh.

¹⁵ Mükütüküzü nyi küsü nüh samwa siezeh thuoüji anyiwa nü zothem naveh thi asawa thuoüji fethem naveh.

¹⁶Mükütüküzü nyimzari küsü nüh samwa vü wa nü jümawa vü zeh thuoüji nyimzawa nga thi asawa nga fethem naveh; masü azüh tü masü vü pehmthuoh.

¹⁷ Mükütüküzü nyi küsü nüh ma tsehvü ma pa tsahvü satü, nyutü ma zah tsavühwa satü sie nü ma satsa kürütso ngu thi nyimzawa nga satsa kürütso ngu ti thuoüji jütü küzükrüthuoh, jükenüh ma nyiri tsara notha vünüh masü khürü vijam naveh, ma nüh atsehvüwa satsa kürütso foja kümthuoh kenüh ma nüh ma mükülehwa vi wie naveh.

¹⁸ Mükütüküzü nyi küsü nüh nyimzari ma satsa mükümtse tsothovü siezeh nü ma satsa kürütso ngum thuoüji ma nüh ma kümne shuküvehwa saküngu kümthuoh kenüh masü khürü nga masü nyiri aza vünüh vijam naveh.

¹⁹ Nohri tü nohri azah nü vühwa satsa kürütso müküüngu tüm, nyutü noh pa tsehvüwa satsa kürütso müküüngu tüm, küpakenühnyunü jütü ajienü küshenyiluo le kenüh; jükenüh masü mpa masü müküleh vü wie naveh.

²⁰Mükütüküzü nyi küsü nüh ma zah ma pa vüvüh siezehm thuoüji ma püza kürütso saküüngumthuoh, masü mpa nüh masü kükhiemuo vü naveh, masü tü atsa müküngu nüh sü naveh.

²¹ Mükütüküzü nyi küsü nüh ma nü nyutü ma jie vüvüh vi thuoüji jütü mümtsethuoh; ma nüh ma jie nyutü ma nü kürütso sataji küüngumthuoh, tinü masü tü atsa küünguwanyuthuoh.

²²Jükenüh nohri tü eh zhühkheri aveh thi eh zhühkho aveh müzhe thi sa kheh luo; hi nüh nohri sie azhih khiela wa na tse nüh jüma nüh nohri thama küüwuozhu küja kenüh.

²³Thi nohri thuoüji hi nüh nohri atüvü nüh mari zheja na saküveh akuoküjira kürhorüleh vi nü mürhora, küpakenühnyunü mari tü hamari aveh küsa kenüh hi tü mari khielota krem.

²⁴Thitü hi nüh nohri vü küzathuoh, nohri nüh mari zhih vi nohri zhih sanaveh thi hi nüh jüma vi nohri zhi küüsanaveh, azhih jüma tü tünüjuh thi awejuh liküpeh zhih küsü; hi tü anyi küpari vünüh nohri saküpa küm VÜWA nohri Saküüwuowa.

²⁵Jükenüh nohri tü asa kümtse thi mükümtse vünüh thi amüwa kümtse thi mükümtse vünüh saküpa naveh; tinü nohri tü asa nyutü amüwa nyutü azhihwa nüh sakü zhüh küsari nüh nohri samükümnera, jümari tü nohkeri nüh mümtse ti küsa viküpa üti hi nüh saküpa kümthuoh kenüh.

²⁶Nohri tü hi vü mütha luo; küpakenühnyunü hi tü kümtse kenüh, thi nohri tü eh zhi küüsa nti küsa kenüh anyi küpari vünüh nohri saküpamthuoh.

²⁷“Thi ma mpa nüh nyimpari saluo nyutü nyimzari saluo küsüri rüzhe kenüh kütüma nyutü tümari thuoüji aloh vi küvehthe sanaveh, mari züh tü mari vü peh wie naveh,” ti küza.