Read Pochuri Naga LEVIRI 21 Bible Online

LEVIRI 21 - Pochuri Naga bible

LEVIRI 21

¹Jüsevü nga VÜWA nüh Mosa vü, “Aron atsa navüri nyi küsü nga ma nyiri azavü aküsüri kümo pa nü mari mpa mari samkümne tüm üti küza luo,

²ajienü küshehnyitsari küsü, ma zah kümjie küsa, nyutü ma pa nyutü ma tsa nyimpawa, nyutü ma tsavühwa nyutü ma nü nyutü ma jie,

³nyutü ma tsehvü avüpa müjie küsa, hamari wie küchie nüh küpara kümo thuoüji müpara.

⁴Avüpari kümjie vünüh ma nyiri vünüh ma mpa ma samkümnera.

⁵ Mari lü seküümthawa nyu, nyutü mari khane küsewa nyu, thi mari satsa vü akütsi piketü küsawa nyu.

⁶Mari tü mari Saküüwuowa vü mümtse üji mümhie, mari tü mari Saküüwuowa nyo saküümnevüh nyu; küpakenühnyunü mari tü mari Saküüwuowa alohse anyih vünüh kükhurü saküveh kenüh; jükenüh mari tü mümtse üji mümhie.

⁷Mari tü küüphroküphrievühri nyutü sakümnekümvühri müza ra, nyutü ma vüpa vünüh kürüsuo kümri müzara; küpekennyunü navüwa thuoüji ma Saküüwuowa vü kümtse kenüh.

⁸Nohri tü ma samkümtse üji mümhie, küpakenühnyunü ma tü nohri Saküüwuowa lohse vi kükhurü saküveh kenüh, ma tü nohri vü mümtse üji mümhie, küpakenühnyunü hi tü VÜWA, nohri saküümtsewa, hi tü mütsem.

⁹Mükütüküzü navü küsüküsü atsavüh küsüküsü nga küüphroküphrie sanü ma mpa ma sakümnem thuoüji ma pa sakümnemthuoh; tinü ma tü anyih vünüh tsothemümji mümhie.

¹⁰“Navü khiemawa nüh ma jienü navüri azhievü alüwa küüsa taji ma lü rügivü küüthse vüjuh zükemtüthuoh ünüh thi navüwa thsümnyi küüvü nta ma sakümtsem thuoh ünüh ma lüsheh hahata nyutü ma thsümnyi krih nü vümtsera.

¹¹Thi ma tü aküsü kümo küsüvü nga müwara, ma mpa nüh ma pa küsü kümo saluo nyutü ma zah küsü kümo vünüh saluo ma mpa ma samüküümnera;

¹²nyutü ma tü kümtsezheh vünüh alievü shumwa ra, nyutü ma tü ma Saküüwuowa kümtsezheh samükümnera; küpakenühnyunü ma Saküüwuowa vüjuh nüh ma saküümtse tü ma rügivü pehküvehkenüh: Hi tü VÜWA.

¹³Thi ma nüh vüvüh küvi vü mükürüsavühri vi naveh.

¹⁴Ma tü tünyivühri, nyutü kürüsuokümvühri, nyutü sakümnekümvühri, nyutü küüphroküphrievühri hamari küzawa nyu; thitü ma mpa ma nyi mükürüsavühri vi naveh.

¹⁵Jüti sanü ma tü ma nyiri azavü nüh ma tsari saküümnewa nyu; küpakenühnyunü hi tü nohri sakümtse kütsü VÜWA,” ti küza.

¹⁶Jüsevü nga VÜWA nüh Mosa vü,

¹⁷“Aron vü küza luo, noh küshukürari küsü nga mari wuhle küju thawa nüh künyiehna pe naveh ünüh ma Saküüwuowa lohse kükhurü sa nta küruwa nyu.

¹⁸Küpakenühnyunü rhosürhonga küsü nga shehnyi küruwa nyu: ma mpa nüh nothaküüju saluo, ajihküji saluo, anyiehvü künyiehna nyutü samsüküm saluo nyutü satsamahnyo mükato nüh küsuole nyutü kümlule saluo,

¹⁹nyutü ajih ake müsamna küm saluo,

²⁰nyutü küshih küükho nyutü künyiehvü saluo, nyutü akru müküju saluo, nyutü notha zanyo mükümshitohri saluo, mütho nü kümkhu arü saluo, nyutü kümtho, nyutü eunakri (amüja zakümri) saluo;

²¹Aron navüwa küshukürari akürho müküjuri nyi küsü nga VÜWA kükhurüwa shehnyiru nü anyih nüh tso taji kükhurü müsa ra; ma nüh kürho müküju kenüh ma tü hi shehnyiru nü ma Saküüwuowa lohse kükhurü müsara.

²²Ma tü ma Saküüwuowa lohse kümtse tsatsawa nga thi zanyo kümtseri nga thi zanyo kümtseri nga ti tsara naveh,

²³thitü athsü zieteküsawa thi kükhurüpewa vünü shehnyi mürura, küpakenühnyunü ma tü akürho müküju kenüh eh kümtsezhehri samkümnera,” ti küza.

²⁴Jüti küüza vü Mosa nüh jümari vi Aron thi ma tsari vü thi Israel nyiri aveh vü küza kheh.