Read Pochuri Naga LEVIRI 23 Bible Online

LEVIRI 23 - Pochuri Naga bible

LEVIRI 23

¹Jüti küüza sevü VÜWA nüh Mosa vü küza lehü taji,

²“Israel nyiri vü küza luo, VÜWA khuleh kütekeküsa kümtse nohri nüh zhüchüh na küsa, eh khu küteke küsari tü hamari:

³ Rülo türo nohri küüroh sanaveh; thitü rülo türüawa thuoüji kümnyi rülo viküükheke kümnyi sanaveh, kümtse küsü, küüroh küsü nga küsawa nyu; azhie khiekhielanga pehluo hamatü VÜWA vü kümnyi rülo küsü sanaveh.

⁴“Hamari tü VÜWA khu kütuoke küsari, kümtse küütuoke tsotho vü hamari vi mari vü zie tsüluo.

⁵ Asa pokhuwa rülo türamzü münüleh vü thuoüji VÜWA tsekükari.

⁶ Thi asa jümawa rülo türamnga vü thuoüji VÜWA vü ahzhi müthse nüh lohse kütsa khu; nohri tü rülo türü ahzhi müküthse lohse tsanaveh.

⁷Rülo pokhuwa vü nohri tü kümtse sanaveh; nohri küüroh küsü nga küsawa nyu.

⁸Thitü rülo türü nohri tü anyih vünüh kütso kükhurü sanü VÜWA vü tsü naveh; rülo türüawa thuoüji kümtse küsü sanaveh; nohri zanyo küüroh küsü nga küsawa nyu,” ti küza.

⁹Jüsevü nga VÜWA nüh Mosa vü,

¹⁰“Israel nyiri vü küza luo, nohri tü hi nüh azhih vi nohri vü tsü na küsa vü ru nü nohri luoshü mahwie thuoüji nohri nüh kümahwie avi pokhuwa akhrü vünüh navüwa vü viru naveh;

¹¹kümnyi rülo anyieh, mazhünyo thuoüji rülo tüzeawa, nohri tü küvira ngu na küsa kenüh navüwa nüh akhrü jüma vi nü VÜWA tüvü shoküze naveh.

¹²Thi nohri nüh akhrü jüma noküja rülo vü nyihzhüzah küsü azhührhü müküpe mahvi küsü kükhruo VÜWA vü kütso kükhurü satsü naveh.

¹³Jü mpa mükünyu hama kükhurü küsa vü atha vi nü kükhurü azhievü vüjuh küünyarü küüto künyi anyih nüh tso nü arheküüngu mütsuo kükhurü sanü VÜWA tsü naveh; thi aküzhu kükhurü nga akhah nüh sanaveh, thi jüma thuoüji kete küsü.

¹⁴Thi nohri nüh nohri kükhurü jümari Saküüwuowa vü müjie viküru küju nü nohri tü lohse nga satü, atha künyihphro nga satü, nyutü kümzhi küsü nga satü mütsara, nohri nüh khiekhiela rho naveh ünüh hamatü nohri wuhle küsuokürho küju azhühkhe sa wienathuoh.

¹⁵ “Thi thuohtü, kümnyi rülo nyieh nohri nüh nohri luoshü akhrü viru nü noküja kükhurü küsa rülo vünüh chie nü zhia türü khete sanaveh.

¹⁶Thi thuohtü, kümnyirülo nyieh vünüh küchie rülo tünyieke ju thuoüji ahie vi nü kükhurü atha kürüthe vi VÜWA vü ru naveh.

¹⁷Thi nohri kürhope vünüh lohse küüto künyi nüh küsa noküja kenüh viru naveh, thi hama tü ahie tohküümnya ahzhi küthse nüh veh naveh; thi avi küpe pokhuwa nüh sanü VÜWA vü viru naveh.

¹⁸Thi lohsewa kütsü vü nyihzhüzah türü mahvi küsü kükhruo, shüvotsazah küsü thi nyihzhüvo künyi, hamari aveh mükünyiena vi nü VÜWA vü kütso kükhurü satsü naveh, thi jümari sanyie nü atha vi kükhurü küsü sataji VÜWA vü arheküüngu mütsuo satsü naveh.

¹⁹Jüsevü nga nyihzhüvo küsü vi kükhiemuo kükhurü sanaveh, thi nyihzhüzahvo künyi vi kütsathuo kükhurü küsahthuoh sanaveh.

²⁰Navüwa nüh jümari thi luoshü avi küpekhuwa lohse, thi nyihzhüzah künyi ti vi nü VÜWA tüvü noküja kükhurü sanaveh; jümari tü navüwa kenüh VÜWA vü kümtse satsü naveh.

²¹Thi jüma rülo vü nohri tü küzhüchüh sanü kümtse küsü sataji nohri küüroh küsü nga küsawa nyu: hamatü nohri khiekhiela rho naveh ünüh nohri wuhle küju küsuokürho azhükhe sanaveh.

²² “Thi nohri zhih vü luoshü mahwie thuoüji poteposhu küju kümahwiewa nyu, nyutü mahwie kümsevü mahvo küfewa nyu; jümari tü kümkhuori thi küzehri kenüh satüluo: Hi tü VÜWA nohri Saküüwuowa,” ti küza.

²³Jüsevü nga VÜWA nüh Mosa vü,

²⁴“Israel nyiri vü küza luo, asa türüawa rülo pokhuwa kükhekesheh nü münyie naveh, thi müsheküpeh huo küzhüchü tütü khu küzie nü kümtse küsü sanaveh.

²⁵Nohri tü küüroh küsü nga küsawa nyu, thi VÜWA vü kütso kükhurü tsü naveh,” ti küza.

²⁶ Jüsevü nga VÜWA nüh Mosa vü,

²⁷“Asa türüawa rülo türake vü thuoüji kütsathuo rülo; jüma tü nohkeri nüh kümtse tsotho küsü, jükenüh nohri mpa nohri sakükheke sheh nü anyih vünüh tso nü VÜWA vü kükhurü sanaveh.

²⁸Thi nohri tü hamawa rülo vü küüroh küsü nga küsawa nyu; küpakenühnyunü hama rülo tü kütsathuo rülo, nohkeri nüh VÜWA nohri Saküüwuowa tüvü kütsathuo sana küsa kenüh.

²⁹Thawa nüh hama rülovü mükükheke sheh nüh sanaveh ünüh ma nyiri vünüh vijam naveh.

³⁰Thi anyi küsüküsü nga hama rülovü küüroh sa thuoüji anyi jümawa thuoüji ma nyiri aza vünüh zoriejam naveh.

³¹Hama rülovü nohri küüroh küsü nga küsawa nyu: nohri azhie khiekhiela rho naveh ünüh hama tü küsuokürho nohri wuhle küju azhükhe sanaveh.

³²Jümatü nohkeri nüh kükhe sheh nü kümnyirülo, hama rülo vü nohri tü nohri mpa nohri sakükhe naveh; asa hama rülo tüguh münüleh küju kümnyirülo sanaveh,” ti küza.

³³ Jüti küüza sevü nga VÜWA nüh Mosa vü,

³⁴Israel nyiri vü küza luo, asa türüawa rülo türamnga vü rülo türü ashühzheh khu sa VÜWA tsü naveh.

³⁵Rülo pokhuwa thuoüji kümtse küsü sanaveh; hama rülovü nohri küüroh küsü nga küsawa nyu.

³⁶Rülo türü thuoüji anyih vünüh tso nü VÜWA vü kükhurü sanaveh; rülo tüzeawa thuoüji kümtse küsü sanaveh, thi kütso kükhurü sanü VÜWA tsü naveh; hamatü kükheke taji küsezhuh sanaveh; thi nohri tü küüroh küsü nga küsawa nyu.

³⁷“VÜWA khu kütuohke nü nohri nüh kümtse küsezhu tsotho vü zietsü na küsari hamari: VÜWA vü tsü na küsa kenüh anyih vünüh kükhurü, tso nü kükhurü, atha nüh kükhurü, küsahthuo thi aküzhu kükhurü, hamari aveh ma mpa ma tsotho vü khekheta sana küsa kenüh;

³⁸hamari tü VÜWA kümnyirülo nyieh vünüh küütsa küsü, nohri nüh aküte nyieh vünüh küütsa, nohri nüh phrahzhu nü kükhurü aveh nyieh vünüh küütsa, thi nohri pashe vünüh kükhurüri nyieh vünüh küütsa vi VÜWA vü kütsüri.

³⁹“Thi asa türüawa rülo türamüngaawa vü nohri zhih vünüh avi pekütsüri vizhuhra thuoüji rülo türü VÜWA khu sanaveh; rülo pokhuwa thuoüji nohri tü kükheke nü kümnyi sanaveh, thi jüsevü nga rülo tüzeawa kükheke taji kümnyi sanaveh.

⁴⁰Rülo pokhuwa nohri tü athsoh ato kümhietsara avi vi, aluophi tsuonari, athsoh küjepu apruori, zhihkhaneri, aprari viru nü VÜWA nohri Saküüwuowa tüvü rülo türü loküzhe sanaveh.

⁴¹Nohri tü amahvi vü rülo türü hakümjie küsa tsothovü hakümjie küsa akhu VÜWA tüvü sanaveh, nohri wuhle küju küsuokürho zhühkhe sanü asa türüawa vü sanaveh.

⁴²Israel nyiri ta küsari aveh nü rülo türü ashühzheh vü rho naveh,

⁴³hi nüh Israel nyiri Egypt zhih vünüh siezhu küruvü nohri tü ashühzheh vü rho ta küsa nohri küshukürari tü thsü naveh: Hi tü VÜWA nohri Saküüwuowa,” ti küza.

⁴⁴Hakümjie vünüh VÜWA khu küütuokeri Mosa nüh Israel nyiri vü küza.