Read Pochuri Naga LEVIRI 26 Bible Online

LEVIRI 26 - Pochuri Naga bible

LEVIRI 26

¹ “Nohri tü nohri mpa nyiaza thi tsorhe sake nyutü aloh vü khrüke nü kütoke nyutü aloh hu nü mükhurü tümluo, thi nohri zhih vü aloh vü tsorhe khrüke taji toke sanü jümari vü küngie mütsuo tümluo; küpakenühnyunü hi tü VÜWA nohri Saküüwuowa.

²Nohri tü eh kümnyirülo müzhe wie naveh thi eh kümtsezhehwa rhe sheh wie naveh: Hi tü VÜWA.

³ “Mükütüküzü nohri nüh eh zhühkheri vü tse thi hi nüh azhükütsüri müzhe nü jümari sa ti thuoüji,

⁴hi nüh azalevü khemta atsoh rütsü naveh, thi azhihwa tü avi pezhi tsü naveh, thi azhih vü athsovi atori tü avi petsü naveh.

⁵Nohri mütha kürütse tü rhelivi küla küju wa naveh, thi rhelivi külawa tü mahtsü küzhuh küju wa naveh; jüti sanü nohri kütsaküzhu tü tsamwa waju wie naveh, thi nohri tü nohri zhih vü lozhe nü rhora naveh.

⁶“Thi hi nüh nohri zhih vü müküüjakünya tsü naveh, nohri nüh zehwa wie ketünga nyi küsü nga nüh nohri saküükrüwa nyu; thi nohri zhih vünüh hi nüh samwari zhejamtü naveh, thi anyuchuwa tü nohri zhih vünüh ru kari küwawanyu.

⁷Nohri nüh nohri mükünongüri zhe naveh, thi nohri nyuchuwa vünüh mari tü külu küm sanaveh.

⁸Nohri nyi münga nüh nyi müzake zhe naveh, thi nohri nyi müzake nüh anyie türake zhe naveh; thi nohri mükünongüri tü anyuchuwa vünüh nohri tüvü külu naveh.

⁹Hi nüh nohri vü küsiake peh naveh thi hi nüh nohri avi saküpetsü taji nohri saküzhitsü nü nohri sie kütsathuozhüwa sakümzho le naveh.

¹⁰Nohri luoshü khielota kümahwiera kenüh kürüwi rülo hothake tsawa naveh, thi mükütsakhera kenüh luoshü kürüthe mahwie thse na küsa kenüh kürüwiwa vija nü sakümtse naveh.

¹¹Thi hi nüh nohri azavü eh kürho sanaveh, thi eh sietse tü nohri kümawa nyu.

¹² Hi tü nohri azhievü tse peh huo nü nohri Saküüwuowa sataji nohri tü eh nyiri sanaveh.

¹³Hi tü VÜWA nohri Saküüwuowa, hi nüh nohri tü Egyptra tükha thama küüsa ti küsa kenüh ma zhihri vünüh nohri vizhu, hi nüh nohri mürüli khuonyih zothuojamtü nü nohri lü kütoke nü küütsera sa tsü.

¹⁴ “Thitü nohri nüh eh zhü müküna, thi azhükütsü hamari müsanüh sam.

¹⁵Thi eh zhühkheri mame mükünyie sa, nohri kürholi nüh eh zhühkhori mam, jüti sanü nohri tü hi nüh azhükütsüri aveh müsanüh sataji eh kütsathuozhüwa zoriem ti thuoüji,

¹⁶hi nüh hama nohri vü sa wie naveh: Hi nüh nohri vü kükrü küji, samkümhiera küna, notha saküümsü kümhi thi saküükrüshü tsü naveh. Thi nohri tü nohri mahtsü küüzhuhkrie naveh, küpakenühnyunü nohri mükünongüri nüh jümari vitsamtü naküveh kenüh.

¹⁷Hi nüh nohri sie küüruohluo anyieh tü nohri vü küprüke naveh, thi nohri mükünongüra tüvü nüh nohri tü küürhiethe kheh naveh, nohri kümrhüri nüh nohri nyiehvü takrü küüsanaveh, thi nyi küsü nga nüh nohri zhemtse wie ketünga nohri tü te naveh.

¹⁸Jüta sa wie ketünga nohri nüh eh zhü müküna wie thuoüji nohri kükhiemuo kenüh hama nyiehvü türakeri nohri sosie le wiehü naveh.

¹⁹Thi nohri nüh rhieza kütsewa kükhra hi nüh zoriejatsü naveh, jüti sanü nohri atülüri hi nüh amürü kümjie saküjemtü naveh, thi nohri zhih tü asahwuo kümjie saküjemtü naveh;

²⁰Nohri kükhra tü müjuju vünüh küüram naveh, küpakenühnyunü nohri zhih tü avi pemküzhi nüh samtü naküvehthuoh kenüh, thi azhuh vü athsohri tü avi müpetü nüh sanathuoh.

²¹Jüsevü nga nohri nüh hi sie mükato wie hü nüh sanü eh zhü müküna wie thuoüji nohri kükhiemuori küzake nüh jüma nyiehvü nüh türakeri küzhi kümnomna nohri vü viru le wie hü naveh.

²²Thi hi nüh nohri azavü samwa leküze nü noh tsari küüzothe naveh, thi nohri seshuh küüzorie naveh, jüti sanü nohri saküzülam tü taji nohri lehkhuji tü küüzom nathuoh.

²³“Thi küsosie müke hamari vü nga nüh nohri tü hi vü müküprüke nüh hi vünüh küpa tewa wie thuoüji,

²⁴hi nga nohri sie küpa tewa wie thuoüji nohri kükhiemuo kenüh khana nyiehvü nga türükeri nohri kürhiethejam naveh.

²⁵Thi hi nüh nohri vü anyuchu küsü viru nü jüma nüh kütsathuozhüwa sie küüproluo kenüh amüthoh küüvi naveh; thi nohri nüh noh nyujiri azhievü sehzhu wie ketünga hi nüh nohri azavü küna kümsü akükrü küze naveh, thi nohri vi nü mükünongüra ke vü thsem naveh.

²⁶Hi nüh nohri lohse kütsühwa zoshimtü thuoüji anyithü küsü vü krevühri türake kenüh nohri lohse ma küüzho küte nü noh tü tsanaveh; thitü tsa taji alo mürara.

²⁷“Hama sevü nga nohri nüh eh zhü müküna wiethuoh nüh hi vü nüh küprale tewa le hü thuoüji,

²⁸hi nga müküüzhikera rüküshu vü nü nohri vünüh küprale tewa naveh, nohri kükhiemuo kenüh atükhu nyiehvü nga türükeri hi mpa nüh nohri sosie lehü naveh.

²⁹Thi nohri kürüma tü küüluohle kenüh nohri mpa nohri atsa nyimpari nga thi nyimzari nga retsanaveh.

³⁰Hi nüh nohri azhie kümsieri zoriejamtü naveh, nohri sierhü kükhurüpe nga zochiemtü naveh, nohri küsü kümo vi nohri nyiaza kümo rügivü vehjake naveh; thi eh sietse tü nohri mateküwa sanaveh.

³¹Nohri nyujiri tü hi nüh saküüzomtü naveh, nohri kümtse kükhurü tü jaküüzom naveh, thi nohri nüh kürhengu tsoküüze nga küürhewa nyuthuoh.

³²Thi hi nüh nohri zhih zorie khehmtü nü nohri mükünongüri jüla küpehri tü jüma ngu nü küüngo naveh.

³³Hi nüh nohri tü anyi küpari azavü zheküvohrie küze naveh, thi anyuchuwa tü asuochih lovü müküthse wiethuoh nüh nohri küüzhe nü nohri zhih tü küüzoküza küüsam naveh, thi noh nyujiri tü küüjaküm sanaveh.

³⁴Nohri nüh nohri mükünongüra zhih vü küpeh küju nohri zhih tü küthake ja naveh ünüh jüthake küju nohri zhih tü kümnyie sanü lozhe peh wie naveh.

³⁵Jaküm küju nü münyie peh wie naveh, thitü kümnyie jüma tü nohri nüh azhih jüla küpehvü kümnyirülo jümawa ngu.

³⁶Thitü nohri müsü nüh tewa nyura zhihvü kürhori vü thuoüji luoveh müküji luoveh küzah mari mükünongüra zhih vü küpeh vü mari luoveh lovü thsetsü naveh; amürhü nüh are he küüprükhi mpa wie nga nüh mari zheküüte naveh, thi mari tü anyuchuwa vi nü zheküüte kümjie te naveh, nyi küsü nga nüh mari zhemtse wie ketünga mari tü külu naveh.

³⁷Nyi küsü nga nüh mari zhemtse wie ketünga anyuchuwa vünüh te küthi nta küsa üta mari tü küsü nüh küsü vünüh ajih müshü naveh; thi nohri kükhra küsü nga mükünyie kenüh nohri mükünongüri tüvü mütsiera nüh sanaveh.

³⁸Thi anyi küpapara zavü nüh nohri tü pokahm nü nohri mükünongüra zhih nüh nohri tsa müzhum naveh.

³⁹Thi mari müsü kheh nüh kütori thuoüji mari müküleh kenüh mari mükünongüra zhih vünüh mari kürho müsüm naveh; thi ma pari künakhie kenüh mari nga mari kümjie mari kürho krüshükrünyim nathuoh.

⁴⁰“Thitü mari nüh mari müküleh nga thi ma pari müküleh nga mari mükünyitsa hi vü saküm hi vü phrahzhutsü, thi hi vünüh küprale teküwa phrahzhutsü ti thuoüji,

⁴¹thi hi nga mari vünüh küprele teküwa thi mari mükünongüra zhih vü sieteküru; mari luoveh ahu mükütsi sakürünyie thi mari müküleh vünüh mhie teru ti thuoüji;

⁴² hi nüh Jacob, Isaac thi Abraham sie kütsathuozhü müshe naveh, jüti sanü nohri zhihwa hi nüh müshe le naveh.

⁴³Thitü azhihwa tü mari nüh jam nü azhihwa nüh mari müsie nüh ma mpa küsa vü azhihwa tü kümnyirülo loküzhe sanaveh, thi mari tü mari müküleh sakümhie naveh, küpakenühnyunü mari nüh eh zhükütsüri müküchie sanü mari kürholi nüh eh zhühkhori küma küm kenüh.

⁴⁴Ma mpa nüh jüüta kheh wie ketünga mari mpa mari mükünongüra zhih vü peh wie ketünga hi nüh mari müküchie küsawa nyu, nyutü hi tü mari mükülo sanü mari zoriekhehm taji mari sie kütsathuozhü saküsawa müzoriera; küpakenühnyunü hi tü VÜWA mari Saküüwuowa küsa kenüh.

⁴⁵Hi nüh mari Saküüwuowa sana küsa kenüh hi nüh mari nyo vünüh anyi küpapara notha vünüh Egyptra zhih vünüh siezhuküru mari pari sie kütsathuozhüwa müshe naveh: Hi tü VÜWA,” ti küza.

⁴⁶Hamari tü VÜWA nüh Mosa vünüh Sinai küzhi rügi vünüh ma thi Israel nyiri masü azhievü azhühkho thi khonyori saküsari wiethuoh.