Read Pochuri Naga LEVIRI 27 Bible Online

LEVIRI 27 - Pochuri Naga bible

LEVIRI 27

¹Jüsevü nga VÜWA nüh Mosa vü,

²Israel nyiri vü küza luo, mükütüküzü phrahteke küsa küütsawa saju nta küsa kenüh nyi küsü nüh anyiri vi VÜWA vi tsü nta thuoüji ame küte küsa rügivü nüh anyi jümari tü tsüm naveh,

³thi nohri nüh ame küüte nyimpari mahvi mükeke vünüh rorake küju thuoüji rakasa tünyieke, thi hamatü kümtsezheh vü küütewa vünüh müzhe naveh.

⁴Mükütüküzü jüma tü nyimzari thuoüji amewa tü rakasa cherake naveh.

⁵Mükütüküzü anyi jüma tü viza mahvi münga vünüh mükeke küju thuoüji rakasa mükeke naveh, thitü rülari thuoüji rakasa türake nüh sanaveh.

⁶Thi anyi jüma tü kürünyiri nyimpari asa küsü kükhruo vünüh mahvi münga küju thuoüji rakasa münga naveh, thitü nyimzari thuoüji rakasa küche naveh.

⁷Thi mahvi rorake vünüh wiehvü nyimpari thuoüji rakasa türamnga naveh, thitü krevühri thuoüji rakasa türake naveh.

⁸Thitü mükütüküzü anyiwa nüh thohtsaletsatsanüh sataji nohri nüh küütewa müthuora thuoüji ma nüh anyi jümawatü navüwa vü sieru naveh, thi navüwa nüh küte naveh; küthohtsawa nüh küzake vünüh tsüra naveh ünüh jüvü nüh küte naveh.

⁹Mükütüküzü jüma tü anyiri nüh VÜWA vü kütsü samwa thuoüji anyiri nüh VÜWA vü kütsü jüüta küsara aveh tü mütham.

¹⁰Ma nüh zanyo küsü nga nüh vi nü amüthoh nyutü kümzhi müsara, kümhie nüh kümsü mümzhira; thitü samwa küsü nüh samwa küsü müzhiluo nta thuoüji kümzhiluo jümasü tü künyi khürü nga kümtse sanaveh.

¹¹Thitü asa mükümtse VÜWA vü mükütsü zhi thuoüji anyiwa nüh asawa sie nü navüwa vü ru naveh.

¹²Thi kümsünga kümhie nga navüwa nüh küte naveh; thi noh tü navüwa nüh küüte vünüh sa wie nathuoh.

¹³Thitü ma nüh jüma rhehsa vile nta thuoüji küüte nyiehvü nüh küüsuo münga sanü küsü thsephre le naveh.

¹⁴Mükütüküzü nyi küsü nüh ma zheh müthü nü VÜWA vü tsü nta thuoüji jüma tü mhieveh ünü müsüveh ünüh navüwa nüh küte naveh, thi navüwa nüh küüte rügivü nüh müzhe wie naveh.

¹⁵Thi mükütüküzü ma zheh vi nü VÜWA kütsüwa nüh ma mpa ma zheh rhehsa nta thuoüji ame küüsuo münga sanü küüsuo küsü thsephre le naveh, thi azheh tü ma zhi sam le naveh.

¹⁶“Thi mükütüküzü nyi küsü nüh ma kaküvi azhih müthü nü VÜWA tsü nta thuoüji azhih jüla nüh luoshü khuo küzake viraveh ünüh jüvü nüh küte naveh, atsuo kümhietsawa küüto türake vü rakasa mükeke naveh.

¹⁷Mükütüküzü ma nüh ma zhuhwa tü jubilee mahvi vünüh müthü thuoüji ame aveh küju naveh.

¹⁸Thitü ma nüh jubilee mahvi sevü nüh müthü thuoüji jubilee mahvi ju le na küsa küzake pehveh ünüh jüvü nüh navüwa nüh amewa kürühzhu naveh, thi noh nüh küüte vünüh sakütsuom nathuoh.

¹⁹Thi azhüazhü azhuh VÜWA vü kütsüwa nüh ma zhuhwa rhehsa nthe thuoüji ame küütewa küüsuo münga sanü küsü thsephre taji azhuhwa tü ma zhi sale naveh.

²⁰Thitü ma nüh mürhehsale ngü thuoüji, nyutü ma zhuhwa tü nyuri vü zhum thuoüji, jüma tü mürhehsara le wiethuoh.

²¹Thitü azhuhwa tü jubilee tsotho vü tsüm thuoüji jüma tü VÜWA vü tsükümthuoh kenüh VÜWA zhi satewa nathuoh, thi navüwa nüh vitewa nathuoh.

²²Thitü nyi küsü nüh ma mpa nüh küsü azhuh asuohzhuh mükünyu müthü nü VÜWA vü tsü thuoüji;

²³jubilee mahviwa küju amewa kürühzhu nü anyi jüma nüh ame küürühzhuwa jüma rülovü nüh kümtse zanyo sataji VÜWA vü tsü naveh.

²⁴Azhuh jümawa tü ma nüh thawa vünüh sü nüh ma suohzhuh sanü viküruwa vü tsümle naveh.

²⁵Ame küüte aveh kümtsezheh vü küütewa müzhe naveh; tinü pesa mükeke nüh müshe küsü sanaveh.

²⁶“Thitü samwa kütsa khuwa thuoüji ma mpa nüh shüvotsaluo, nyutü nyihzhüluo VÜWA zhi sakümthuoh kenüh nyi küsü nga müthü nü VÜWA vü müjuju kütsü üta müsara.

²⁷Mükütüküzü nüh jüma tü mükümtse samwa thuoüji noh nüh ame küüte vünüh ma mpa nüh sütewale naveh, thi jüma ame küüsuo münga sanü küsü thsephre naveh; nyutü jüma tü mürhehsanüh sam thuoüji ame nohri nüh küüte vünüh zhum naveh.

²⁸ “Thitü ma mpa nüh anyiri saluo, nyutü samwa saluo nyutü ma suohzhuh saluo nyi küsü nüh VÜWA vü tsüm wiethuoh nü müzhulera nyutü müsülera wiethuoh; VÜWA vü mütha tsatsamwiethuoh.

²⁹Ma tsükümwa tü anyira zavü nüh zoriem na küsawa mürhehsa ra; ma tü küüsüm wie naveh.

³⁰ “Thi ma mpa nüh azhih vünüh avi küperi saluo, nyutü athsoh vünüh avi küperi saluo aveh VÜWA zhi küsa kenüh küüsuo türake sanü küsü thse wie naveh; jüma tü VÜWA vü mütham

³¹Mükütüküzü nyi küsü nüh ma nüh türakevü küsü küthsewa rhehsa nthe thuoüji küüsuo münga sanü küsü thsephre naveh.

³²Thi mieshümiesa saluo, thi nyihzhü saluo akühuowa kütsüh kükhu vünüh shuküru türake sanü küsü kütsüwa tü VÜWA vü mütha naveh.

³³Mhieveh ünü müsüveh ünüh nyi küsü nga küünawa nyu; mükütüküzü nüh müzhi nta thuoüji jüma thi vi ma kümzhiwa masü khürü mütha naveh; jüma tü mürhehsa ra,” ti küza.

³⁴VÜWA nüh Israel nyiri kenüh Sinai küzhi rügivü nüh Mosa vü azhükütsü hamari.