Read Pochuri Naga LEVIRI 3 Bible Online

LEVIRI 3 - Pochuri Naga bible

LEVIRI 3

¹“Mükütüküzü nyi küsü nüh luovehkürüzi kenüh küsahthuo kütsü vü ma nüh samwa kütsü ma seshuh vünüh avo tsütü nyutü awie tsütü azhührhü müküpe VÜWA tüvü tsü naveh.

²Thi asa viküruwa nüh ma ke jüma lü rügivü thsuoke nü asa jüma tü juhthsü nazizheh lehpie vünüh fethe naveh; jüti sanü Aron atsa navüri nüh jümawa züh vi nü kükhurüpewa zü mükiele naveh.

³Thi luoveh kürüzi küsahthuo VÜWA vü tso nü kükhurü VÜWA vü kütsü votsasa kühiete küthü athsüwa thi votsasa vü küthü aveh,

⁴amükreh künyi thi amükreh vü süperü küthü thi amüthse vü küüpeke aveh tsü naveh.

⁵Jüti sanü Aron tsari nüh jüma vi nü kükhurüpewa rügivü kütso kükhurü anyihwa thsoh rügivü nüh tso naveh, jüma tü anyih vünüh kükhurü sanü VÜWA vü arheküüngu küsü küsanaveh.

⁶“Mükütüküzü nyi küsü nüh luoveh kürüzih kenüh küsahthuo kütsü vü ma nüh samwa kütsü ma nyihnyih vünüh avo nyutü awie kütsüwa azhührhü müküpe VÜWA tüvü tsü naveh.

⁷Mükütüküzü nyi küsü nüh nyihzhüzah tsü thuoüji ma nüh jüma tü vi VÜWA tüvü kütsü sanaveh,

⁸thi ma nüh kükhurü kütsüwa tü arügivü ma ke thsuoke nü juhthsü nazizhehwa lehpie vünüh fethe nü Aron tsari nüh jüma züh vi nü kükhurüpewa zümkiele naveh.

⁹Jüti sanü luoveh kürüzih kenüh küsahthuo anyih nüh tso nü VÜWA vü kükhurüwa küthü, anürüwa tü aküshih vünüh zaphake nü ma küthü aveh, aküthü votsasa kühiete athsüwa thi votsasa vü küthü aveh,

¹⁰amükreh künyi thi süperü vü küthü aveh, thi amüthse vü küthü küüpeke aveh tsü naveh.

¹¹Jüti sanü navüwa nüh kükhurüpe vünüh jüma tso nü VÜWA vü anyih vünüh kütsaküzhu kütsü küsü sanaveh.

¹²“Mükütüküzü nyi küsü nüh kükhurü vü kütsüwa tü nyihsü thuoüji ma nüh jüma tü VÜWA tüvü thse taji,

¹³ma nüh jümawa lü rügivü ma ke thsuoke nü juhthsü nazizhehwa lehpie vünüh fethe taji Aron tsari nüh jüma azüh vi nü kükhurüpewa zü mükiele naveh.

¹⁴Jüti sanü ma nüh VÜWA vü anyih vünüh kükhurü kütsüwa jümawa vünüh votsasa kühiete athsüwa thi votsasa vü küthü aveh,

¹⁵amükreh künyi thi süperü vü küthü, amüthse vü küthü küüpeke aveh tsü naveh.

¹⁶Jüti sanü navüwa nüh kükhurüpe vünüh jüma tso nü VÜWA vü anyih vünüh kütsaküzhu kütsü küsü sanaveh.

¹⁷Nohri kürhope aveh vü nohri wuhle küju hamatü mükükhaphrü zhühkhe küsü sanü aküthü nga thi azüh nga kütsawa nyu.