Read Pochuri Naga LEVIRI 4 Bible Online

LEVIRI 4 - Pochuri Naga bible

LEVIRI 4

¹Jüsevü nga VÜWA nüh Mosa vü,

²“Israel nyiri vü küza luo, VÜWA nüh azhütsüküsari anyi wuori nüh mükümshe vünüh khiemuom thuoüji.

³Thi anyi jüma tü thseküm navü küsari küsü nüh khiemuom nü mükülehwa nyiri vü teru thuoüji kükhiemuo ma nüh sakümwa kenüh shüvotsa zah azhührhü müküpe vi VÜWA vü kükhiemuo kükhurü satsüluo.

⁴Ma nüh shüvotsa zahwa juhthsü nazizhehwa lehpie vü VÜWA tüvü viru nü jümawa alü rügivü ma ke thsuoke taji shüvotsa zahwa tü VÜWA tüvü nüh fethe luo.

⁵Thi thseküm navüwa nüh shüvotsa zah azüh pike vi nü juhthsü nazizheh vü viru naveh;

⁶jüti sanü navüwa nüh ma tüjü azüh lovü küjo nü suo VÜWA tüvü kümtsezhehwa küzietethsüwa tüvü kajake naveh.

⁷Thi navüwa nüh azüh pike vi nü juhthsü nazizheh lovü VÜWA tüvü rheküüngu kükhurüpe rütsüwa rügivü thse naveh, thi shüvotsa züh kümnyie aveh juhthsü nazizheh lehpie vü kütso kütsokükhurüpewa kütope vü küshoke naveh.

⁸Thi kükhiemuo kükhurü küsa shüvotsa zahwa vünüh aküthü aveh vizhu kheh naveh, aküthü votsasa küüzhute küthü athsüwa, votsasa vü küthü aveh,

⁹amükreh künyi vü küthü thi süperü vü küthü thi amüthse vü küthü amükreh sie küüpeke aveh,

¹⁰(Küsahthuowa kenüh kükathuo kükhurü shüvotsa vünüh hamari küvizhu üta,) navüwa nüh tso nü kükhurü apewa vünüh jümari aveh tso naveh.

¹¹Thitü ma sahu, ma satsa, alü, ajih, votsasari, thi ma süri,

¹²ti aveh kürünape alievü azhie kümtsewa vü vüzhuwa nü aweji küjape, aweji jajati küsape athsoh nüh tsom naveh.

¹³“Mükütüküzü Israel nyiri müzawa nüh mükümshe vünüh kükhiemuo sam nü kümhuwa vünüh küthim taji VÜWA nüh müsatüm üta küüza wuori sanü müküleh sam;

¹⁴thi mari nüh kükhiemuo sakümwa nüh shüvotsa zah küsü vi taji kükhiemuo kenüh juhthsü nazizheh vü ru naveh;

¹⁵jüti sanü kümhu vü kükhruori nüh makeri shüvotsa zahwa alü rügivü VÜWA tüvü nüh thsuoke nü jüma tü VÜWA tüvü nüh fethe naveh.

¹⁶Thi thseküm navüwa nüh jümawa züh pike vi taji juhthsü nazizheh vü ru naveh.

¹⁷Jüti sanü navüwa nüh azühwa lovü ma tüjü küjo taji athsü küzietewa tüvü VÜWA tüvü türükeri kajake naveh.

¹⁸Thi ma nüh azüh pike vi nü juhthsü nazizheh lovü kükhurüpewa rütsü rügivü VÜWA tüvü thse naveh, thi azüh kümnyie aveh thuoüji juhthsü nazizheh lehpie vü kütso kükhurüpewa kütokepe vü küshoke naveh.

¹⁹Jüti sanü ma küthü aveh thuoüji ma nüh vizhum nü kükhurüpe rügi vünüh tso naveh.

²⁰Kükhiemuo kükhurü küsa tü shüvotsa zahwa küsa kümjie hama nga sanaveh, hakümjie navüwa nüh makeria nüh kütsathuo sanü mari nojatsü naveh.

²¹Thi ma nüh shüvotsa zahwa kürünape alievü khawa taji shüvotsa zah pokhuwa kümjie tsom naveh; ashiejiwa kenüh hamatü kükhiemuo kükhurü küsü.

²²“Atakrüri küsü nüh VÜWA ma Saküüwuowa[1] nüh müsa tüm üta azhükütsü zanyo wuori mükümshe vünüh sanü khiemuom,

²³thi ma nüh khiemuokümwa vi ma vü küthsüm ti thuoüji ma kenüh vi kükhurü kenüh nyihsüvo azhührhü müküpe küsü viru naveh,

²⁴thi ma ke nyihsüwa lü rügivü thsuoke nü mari nüh kütso kükhurü kenüh küfethepe VÜWA tüvü nüh fethe naveh, hamatü kükhiemuo kenüh kükhurü.

²⁵Jüti sanü navüwa nüh azüh pike jüla nüh vi taji ma tüjü nüh thsete nü kütso kükükhurüwa kükhurüpe rütsü rügivü thse naveh, thi azüh kümnyie aveh thuoüji kütso kükhurüwa kükhurüpe kütokepe vü küshokem naveh.

²⁶Thi ma küthü aveh thuoüji luovehkürüzi kükhurü küsahthuowa küthü kümjie tsom naveh; jüti küsa vü nüh navüwa nüh ma kenüh küsahthuo satsü nü ma müküleh noküja sanaveh.

²⁷ “Mükütüküzü anyiri azhievü müküthsü vünüh küsüküsü nga VÜWA nüh müsa tüm üta azhükütsü wuori sam nü müküleh sam,

²⁸thi ma kükhiemuowa ma vü küthsüm ti thuoüji ma tü nyihnyih awie azhührhü müküpe ma nüh khiemuoküm kenüh viru naveh.

²⁹Jüti sanü ma nüh ma kükhiemuo kenüh kükhurü sana saküvehwa lü rügivü thse taji kütso kükhurüwa ape vünüh fethe naveh.

³⁰Thi navüwa nüh jüma züh pike vi nü ma tühjü thse küjo nü kütso kükhurüpewa rütsü rügivü kajake naveh, jüti sanü azüh kümnyie aveh thuoüji kükhuhrüpewa kütokepe vü küshokem naveh.

³¹Thi kütsathuo kükhurü vünüh aküthü aveh vizhu khehm nü ma nüh kükhurüpe rügivü nüh VÜWA vü arhe tsoküüngu naveh; jükümjie navüwa nüh ma ke nüh luoveh kürüzi sataji ma müküleh noküja sanaveh.

³²“Mükütüküzü ma nüh kütsüwa tü kükhiemuo kükhurü kenüh nyihzhüzah viru thuoüji awiezah azhührhü müküpe viru naveh,

³³thi ma ke tü kükhiemuo kükhurü nyihzhüzahwa lü rügivü thsuoke nü khiela nüh kütsokükhurüwa fethe nüh jüla nüh fethe naveh.

³⁴Jüti sanü navüwa nüh azüh pike vi nü ma tüjü jülovü küjo taji kütso kükhurüwa rütsü rügivü kajake nü azüh kümnyie aveh thuoüji kükhurüpewa kütokepe vü küshokem naveh.

³⁵Thi luoveh kürüzi kükhurü küsahthuo kenüh nyihzhüzahwa küthü aveh küvizhu kümjie ma küthü aveh vizhum nü navüwa nüh kükhurüpewa rügi vünüh kükhurüwa rügivü anyih vünüh VÜWA vü tso naveh; jüti sanü navüwa nüh kükhiemuo ma nüh sakümwa kenüh tsathuokütsü sataji ma müküleh noküja sanaveh.