Read Pochuri Naga LEVIRI 5 Bible Online

LEVIRI 5 - Pochuri Naga bible

LEVIRI 5

¹“Mükütüküzü nyi küsü nüh khiemuom nü küshie peh, thi ma nüh khiemuoküm küthsütoh thi küngutoh pohvü müza shih vü anyi pehwie ketünga phrahtezhu mütsü thuoüji mükülehwa ma nüh vü naveh.

²Nyutü mükütüküzü nyi küsü nüh mükümtse pa thuoüji, ma mpa nüh samwa aküsü saluo nyutü ase-ashuh aküsü saluo nyutü prükütse müwa saluo pa nü küthi pehm thuoüji ma tü mümtse nüh sam nathuoh thi müküleh samthuoh.

³Nyutü mükütüküzü ma nüh anyiri mükümtse, ma mpa nüh mükümtse küsüküsü nga saluo anyiri kenüh mümtse nüh sakümwa pa taji küthi pehla nü thsütera thuoüji ma tü müküleh sam nathuoh.

⁴Nyutü mükütüküzü nyi küsü nüh ma mpa kümsü kenüh nga satü kümhie kenüh nga satü ma po vünüh mükünyu luoveh küji sanü küüshie nyiri nüh phra taji küshie thi küthi pehla nü thsüra ti thuoüji ma tü müküleh sam nathuoh.

⁵Nyi küsü nüh hamari küsüküsü vü nga nüh müküleh sam thuoüji ma taji khiemuo küm kenüh phrahzhu naveh,

⁶thi ma müküleh saküm kükhurü ma nüh khiemuo küm kenüh VÜWA vü ma seshuh vünüh awie nyihzhüzah satü nyutü nyihsüzah satü kükhiemuo kükhurü kenüh viru naveh, thi navüwa nüh ma kükhiemuo kenüh kütsathuo satsü naveh.

⁷“Thitü mükütüküzü ma nüh nyihzhüzah küsü mütsüra thuoüji ma nüh müküleh saküm ma kenüh kütso kükhurü VÜWA vü ato mükhrietü nyutü azheh mükhrietü künyi viru naveh, küsü thuoüji kükhiemuo kükhurü kenüh thi küpawa thuoüji kütsokükhurü kenüh.

⁸Ma nüh jümasü vi taji navüwa vü ru nü ma nüh apokhuwa thuoüji kükhiemuo kükhurü sanaveh, ma nüh aku vünüh kürühthe naveh, thitü akuwa küürühthuotsawa nyu,

⁹jüti sanü azüh suo kükhurüpewa natovü kajake thi kümnyie aveh thuoüji kükhurüpewa kütopevü züjaküze naveh, jüma tü kükhiemuo kükhurü.

¹⁰Thi künyiawa thuoüji azhühkhowa müzhe nü kütso kükhurü sanaveh; jüti sanü navüwa nüh ma kükhiemuo kenüh kütsathuo kükhurü sataji ma müküleh noküüja naveh.

¹¹“Thitü mükütüküzü ma nüh kükhiemuo saküm kükhurü kenüh ato mükhrietü künyi nyutü azheh mükhrietü künyi mütsüra thuoüji ahie toküümnya kükhiemuo kükhurü kenüh khuo küsü vü küüsuo türake sanü küsü, avüjuh nga thi arheküüngu nga müthse nüh viru naveh, küpakenühnyunü hamatü kükhiemuo kükhurü küsa kenüh.

¹²Ma nüh jüma vi nü navüwa vü ru taji navüwa nüh jüma vi nü müsheküpeh huo kenüh kükhurüpe rügivü nüh tso naveh, anyih vünüh VÜWA vü kükhurü sanaveh; hamatü kükhiemuo kükhurü küsü.

¹³Ma nüh kükhiemuo hamari wuori sakümvü nüh ma kenüh navüwa nüh tsathuokütsü sataji ma müküleh noküja satsü naveh. Jüti sanü kümnyie aveh thuoüji ahie kükhurüwa kümjie ma zhi sa kheh naveh,” ti küza.

¹⁴VÜWA nüh Mosa vü,

¹⁵Mükütüküzü nyi küsü nüh kütsotü phrürie nü mükümshe vünüh VÜWA zanyo vü khiemuom thuoüji müküleh saküm kükhurü VÜWA vü ma nyihnyih vünüh azhührhü müküpe avo küsü viru naveh. Ma me thuoüji kümtsezheh vü küüte rakasa vünüh müzhe naveh; hamatü müküleh saküm kükhurü küsü küsa kenüh.

¹⁶Jümpa mükünyu ma nüh kümtse zanyovü müküleh sakümwa kenüh thuo naveh, thi ma nüh küüsuo münga jümawa vü thsephe nü navüwa vü tsü nü ma müküleh kükhurü kenüh nyihzhüvo vinü navüwa nüh tsathuokütsü sanü ma müküleh noküja sanaveh.

¹⁷Mükütüküzü nyi küsü nüh müsa tüm üta VÜWA nüh azhütsüküsa küsüküsü nga müthsü nüh sam wie ketünga müküleh wiethuoh thi mükülehwa ma nüh vü wie naveh.

¹⁸Jümatü ma nyihnyih riehkhuo vünüh azhührhü müküpe nyihzhüvo küsü navüwa vü viru naveh, ma me thuoüji müküleh saküm kükhurüwa me zake vünüh viru nü navüwa nüh ma kenüh ma nüh mükünyu müküthsü vünüh sakümwa kenüh tsathuokütsü satsü nü ma müküleh noküja sanaveh.

¹⁹Hamatü müküleh kükhurü, ma nüh VÜWA tüvü sakümwa kenüh, ti küza.