Read Pochuri Naga LEVIRI 6 Bible Online

LEVIRI 6 - Pochuri Naga bible

LEVIRI 6

¹ Jüsevü nga VÜWA nüh Mosa vü,

²“Mükütüküzü nyi küsü nüh khiemuo nü VÜWA tüvü kütsotü küphrürie sam, ma zhephruwa nüh zanyo vi ma kütsotü vü müram, nyutü küwurie vünüh ma zhi vitewa, nyutü rühutewa, nyutü ma müküchie sam,

³nyutü ma zanyo kümiekümwa phahrawie ketünga ma nüh riem thi anyiri nüh sanü jüla nüh kükhiemuo küsa aveh vünüh rie taji küüshie,

⁴nyi küsü nüh khiemuom nü müküleh sam thuoüji ma nüh kürühu vünüh küviwa thuole naveh, nyutü müküchie vünüh viteküwa, nyutü zanyo vi ma kütsotü vünüh viteküwa, nyutü kümieküm ma nüh küphahrawa,

⁵nyutü müküleh vünüh ma nüh küüshie aveh tsüju naveh, thi ma nüh ma müküleh kenüh kükhurü kütsü rülovü küüsuo münga sanü küsü thsephe taji anyi jüma tsüm naveh.

⁶Thi ma nüh ma müküleh VÜWA vü kükhurüwa ma nyihnyih aza vünüh azhührhü müküpe nyihzhüvo küsü vi nü navüwa vü ru naveh, thi ma me thuoüji müküleh kenüh kükhurü küsawa ame zake naveh;

⁷thi navüwa nüh VÜWA tüvü nüh tsathuokütsü sataji ma nüh khiemawa vünüh müküleh samthuoh ünüh jümawa vünüh nojakütsü sanaveh, ti küza.

⁸Jüsevü nga VÜWA nüh Mosa vü,

⁹“Hama thuoüji kütso kükhurü khonyothuoh ünüh ti Aron thi ma tsari vü azhütsüluo. Kütso kükhurüwa tü kükhurüpewa zhila vünüh mükütuothuoh nüh tsohtüla vünüh rüne küju sanaveh, thi anyihwa kükhurüpe vü mükütuo wiethuoh nüh küüju peh huo naveh.

¹⁰Jüti sanü navüwa tü mürilo thsünyawa thi kümkhe münyiwa vikevü naveh, thi kükhurüpe khiewuovü anyih nüh kütso kükhurüwa tsomthuoh ünüh jüwuovü nüh aweji viwa taji kükhurüpe nato wuovü sanaveh.

¹¹Jüti sanü ma nüh thsümnyi vüküvehri fojam taji küpari vi vü le nü awejiri vü taji kürünape alievü azhie kümtse vü wa naveh.

¹²Jüta wie ketünga kükhurüpe rügivü anyihwa tü müküne wiethuoh nüh küüju peh huo naveh; thi arüne kürüzhu navüwa nüh athsoh vi tsoke peh huo naveh, jüti sanü navüwa nüh kütso kükhurüwa kümhie ta jüma rügivü saluoveh kürüzi kükhurüwa küthü jüma rügivü nüh tso naveh.

¹³Thi anyihwa tü mükütuo wiethuoh nüh küüju peh huo naveh; küünewa nyu.

¹⁴“Thi ahie nüh kükhurü khonyo thuoüji hama. Aron tsari nüh kükhurüpewa atüvü VÜWA tüvü kükhurü sanaveh.

¹⁵Jüti sanü mari nyi küsü nüh ahie vi kükhurü vünüh ahie amüshe küsü thi vüjuh thi arheküüngu aveh vi nü müsheküpeh huo kenüh kükhurüpe rügivü nüh tso taji VÜWA vü arheküüngu küsü sanaveh.

¹⁶Thi ahie kümnyieh aveh thuoüji Aron thi ma tsari nüh ahzhi müthse nüh kümtse azhie juhthsü nazizheh nyula vünüh tsanaveh.

¹⁷Ahzhi thse nü jüma tü küvehwa nyu. Anyih vünüh hi kükhurü küsa vünüh mari jisuo sakütsü wie, jüma tü kükhiemuo kükhurü thi müküleh kükhurü kümjie zanyo kümtse tsawa küsü.

¹⁸Küsuokürho kenüh azhükütsü kümjie nohri wuhle küju Aron tsa nyimpari küsüküsü nga anyih vünüh VÜWA vü kükhurüwa tsanaveh; anyi küpari nga thari nüh jümari pa naveh ünüh mütseteru naveh,” ti küza.

¹⁹Jüsevü nga VÜWA nüh Mosa vü,

²⁰Aron thi ma tsari küsüküsü nga aküthse rülovü VÜWA vü kükhurü tsü na küsa hama: mükütuo wiethuoh nüh ahie tohküümnya küüto küsü, arüne vü küzhila thi münüleh vü küzhila ti thse naveh.

²¹Thi jüma tü vüjuh nüh kümhie ta künyarü nü atahthsü vünüh ahie nüh kükhurü kümjie veh taji VÜWA vü arheküüngu kükhurü sanaveh.

²²Aron tsari azhievü navü thawa nüh ma müthoh sa nta künemthuoh ünüh küsuokürho kenüh phrahteke küsa kümjie VÜWA vü kükhurü satsü naveh, thi jüma tü ajü tso wie naveh.

²³Navüwa nüh ahie vi nü kükhurüwa tü ajü tso wie naveh; jüma tü kütsawa nyu.

²⁴VÜWA nüh Mosa vü küza lehü taji,

²⁵“Hamatü kükhiemuo kükhurü khonyo nüh ti Aron thi ma tsari vü küza luo. Kütso kükhurü kütsü küfethepe vünüh VÜWA tüvü nüh kükhiemuo kenüh kükhurü kütsüwa fethe naveh; hamatü kümtse tsatsawa.

²⁶Navü thawa nüh kükhiemuo kenüh kükhurü sanaveh ünüh juhthsü nazizheh nyula azhie kümtsewa vünüh jüma tsanaveh.

²⁷Thari nüh jüma sa panaveh ünüh mütse naveh; mükütüküzü jüma züh athsü wuori vü küphrakem thuoüji jüma viwa nü kümtse azhiewa vünüh rüshüm naveh.

²⁸Thi azhih küfü vünüh asa jüma shu thuoüji zokhuojam naveh, thitü asahwuo küfü vünüh shu thuoüji küfü jüma shom nü ajuh nüh tse üta kürhojam naveh.

²⁹Navü nyimpari aveh thuoüji jüma tsanaveh; jüma tü kümtse tsatsawa.

³⁰Thitü kükhiemuo kenüh kükhurü küsawa vünüh azüh vi nü juhthsü nazizheh vü vi ru taji kümtse azhiewa vünüh tsathuokütsüwa tü kütsawa nyu; jüma tü anyih vünüh t