Read Pochuri Naga LEVIRI 7 Bible Online

LEVIRI 7 - Pochuri Naga bible

LEVIRI 7

¹“Müküleh saküm kükhurü khonyo hama. Hamatü kümtse tsatsawa;

²kütso kükhurüwa kenüh khiela nüh fetheveh ünüh jüla nüh müküleh saküm kükhurüwa kenüh nga fethe naveh, thi ma züh thuoüji kükhurüpewa zü mükiele naveh.

³Süperü küthü thi votsasa küüzhute küthüri ti aveh thuoüji vi kükhurü sanaveh,

⁴amükreh künyi thi süperü vü küpe küthü aveh, thi ma nüh amükreh künyi küvi vünüh amüthse vü küüpeke küthü aveh;

⁵navüwa nüh kükhurüpe vünüh kükhurü sanü VÜWA vü anyih vünüh jümari tso naveh; hamatü müküleh saküm kenüh kükhurü.

⁶Navüra zhievü nyimpari aveh thuoüji hama kümtse azhie vünüh tsanaveh; hamatü kümtse tsatsawa.

⁷Müküleh küsa kenüh kükhurüwa tü kükhiemuo kenüh kükhurü kümjie wiethuoh, makeri’a nüh khonyo küsü pehveh; navü thawa nüh küütsathuo sanaveh ünüh ma nüh vi naveh.

⁸Thi navü khiemawa nüh anyi thawa kütso kükhurü satsü naveh ünüh ma nüh kütso kükhurü küsawa sahu ma mpa nüh vi naveh.

⁹Ahie vi nü kükhurü, anyithü vünüh künyih tahthsü vünüh küüche saluo nyutü küfü kümzhah vünüh küüche saluo navü thawa nüh kükhurü sanüh jüma zhi sanaveh.

¹⁰Ahie nüh vi kükhurü küsa küsüküsü nga ma mpa nüh vüjuh sarüluo nyutü küüweh saluo Aron tsari aveh kenüh wie, mari aveh zarike vünüh müküsuo üji mümhie.

¹¹“Hamatü luoveh kürüzi kenüh kükhurü küsahthuo khonyo nyi küsüküsü nga VÜWA vü tsü na küsa.

¹²Mükütüküzü nyi küsü nüh kümnakütsü kükhurü tsü nta thuoüji ahzhi müküthse lohse ahie tohküümnya vüjuh küünyarü nüh küveh tiehshu, amüsanüh küveh lohse vüjuh nüh kümhie ta küwurü vi taji kümnakütsü sanaveh.

¹³Ma nüh kümnakütsü kenüh kükhurü küsahthuo viküru vü ahzhi küthse tiehshu lohse viru naveh.

¹⁴Thi jükümjie küsawa kenüh ma tü kükhurü tiehshu lohse tsü naveh; jüma tü navü thawa nüh luoveh kürüzi kükhurü zühwa kükhurüpewa vü jake nüh jüma zhi sanaveh.

¹⁵Jüti sanü ma kütsathuo kenüh kükhurü küsa küsahthuo kümnakütsü asawa tü ma nüh vi kükhurü rülovü tsanaveh; piketü tsatu nü arüne vü küsawa nyu.

¹⁶Thitü mükütüküzü ma nüh kükhurü küsa küsahthuowa tü phrahzhukütsü vünüh küüroh kükhurü nyutü kütsaza vünüh küüroh kükhurü thuoüji ma nüh kükhurü küsahthuo asawa tsanaveh, thi kütsatu küzake pehveh ünüh rülo akünyiawa vünüh tsa kheh naveh,

¹⁷thitü rülo kücheawa vü thuoüji kümnyieh pehwie ketünga anyih vünüh tsom naveh.

¹⁸Mükütüküzü nüh ma luoveh kürüzi kenüh kükhurü küsa küsahthuo sawa rülo kücheawa vü tsa thuoüji thawa nüh jüma kükhurü sanüh jüma tü küviwa nyuthuoh, jü mpa mükünyu jüma tü ma vü küchiekewa nyuthuoh; jüma tü mükümtse küsüsamnathuoh, thi thawa nüh jüma tsanaveh ünüh künakhiewa vüm nathuoh.

¹⁹“Mükütüküzü asa viwa nü mükümtse zanyo wuori shikem thuoüji kütsawa nyu nü anyih vünüh tsom naveh. Thari nü mütseveh ünüh asawa tsa mhieveh,

²⁰thitü anyi thawa nüh ma vü mükümtse pehküveh tsotho vü VÜWA sie luovehkürüzi kükhurü küsahthuo asawa tsanaveh ünüh anyi jüma thuoüji ma nyiri vü küchiekewa nyuthuoh.

²¹Thi mükütüküzü anyi wuori nüh mükümtse pa nü ma mpa nüh anyiri mükümtseluo nyutü asa mükümtseluo nyutü akükre küsüküsü nga pa nü VÜWA vü luoveh kürüzi kükhurü küsaküsahthuo tsanaveh ünüh anyi jüma tü ma nyiri vünüh müchieke nüh sam nathuoh,” ti küza.

²²Jüsevü nga VÜWA nüh Mosa vü,

²³“Israel nyiri nyi küsü nga shüvotsa küthü, nyihzhü küthü nyutü nyihsü küthü mütsara.

²⁴Asa ma mpa nüh aküsü küthü, thi samwa nüh kümrhühthe küthü thuoüji zanyo küpa kenüh vi mhieveh, thitü rüleh küsüvü nga nüh mütsa ra.

²⁵Nyi küsüküsü nga anyih vünüh VÜWA vü asanüh kükhurü küsa küthü tsa thuoüji anyi jüma tü ma nyiri vünüh müchiekerathuoh.

²⁶ Jü mpa mükünyu nohri nüh küpeh azhie vünüh aküsa küpe asa saluo thi asa küpa saluo jümara züh piketü kütsawa nyu.

²⁷Anyi thawa nüh jükümjie küsa azüh tsanaveh ünüh anyi jüma thuoüji ma nyiri vünüh vijamnathuoh,” ti küza.

²⁸Jüma sevü nga VÜWA nüh Mosa vü,

²⁹“Israel nyiri vü küza luo, thawa nüh VÜWA vü ma luoveh kürüzi kenüh kükhurü küsahthuo viru naveh ünüh jüma tü ma kütsathuo kenüh kükhurü küsahthuowa vünüh virunaveh,

³⁰thi anyih vünüh tso nü VÜWA vü kükhurü, jüma tü ma mpa ma ke vünüh viru naveh; aküthüwa tü akhuwa masü vinyieru nü akhuwa tü VÜWA tüvü noküja kükhurü küsü sanaveh.

³¹Navüwa nüh kükhurüpe rügi vünüh aküthüwa tso naveh, thitü akhuwa thuoüji Aron thi ma tsara suope sanaveh.

³²Thi azhie wuovü thüchi thuoüji kükhurü küsü sanü noh luoveh kürüzi kükhurü küsahthuo kümjie vünüh navüwa tsü naveh;

³³Aron tsari azhievü thawa nüh azüh thi küthü luoveh kürüzi kükhurü sanaveh ünüh azhie wuovü thüchi thuoüji ma suope küsa kenüh ma zhi sanaveh.

³⁴Akhu noküjawa thi thüchi vi kükhurüwa thuoüji hi nüh Israel nyiri vünüh vimthuoh, mari luoveh kürüzi kükhurü küsahthuo vünüh hi nüh vi nü Israel nyiri vünüh mükütuowiethuoh nüh Aron thi ma tsari vü tsümthuoh.

³⁵Hamatü anyih nüh tso taji VÜWA vü kükhurü vünüh Aron thi ma tsara suope küsa zhi, VÜWA navü sanü ma küüroh küsa nta mari kütsü rülo vünüh sakümtse taji mari vü tsükümwa wiethuoh;

³⁶mari küüthse rülo vünüh Israel nyiri tü mari vü tsü üta VÜWA nüh azhütsümthuoh; mari wuhle aveh vü hamatü mükütuo nüh mari suope sahuo wie naveh,” ti küza.

³⁷Tso nü kükhurü, ahie nüh kükhurü, kükhiemuo kükhurü, müküleh kenüh kükhurü, saküümtse kenüh kükhurü thi luoveh kürüzi kenüh kükhurü,

³⁸Sinai küzhi rügivü nüh VÜWA nüh Israel nyiri vü mari kükhurü VÜWA vü viru üta azhükütsü rülo vünüh kükhurü khonyo kütsü hamari.