Read Pochuri Naga LEVIRI 8 Bible Online

LEVIRI 8 - Pochuri Naga bible

LEVIRI 8

¹VÜWA nüh Mosa vü,

²“Aron thi ma tsari sie nü thsümnyiri vi, aküthse vüjuh vi, kükhiemuo kükhurü kenüh shüvotsazahwa vi, nyihzhüvo künyi vi thi ahzhi müküthse lohsewa atsaphra vi ti sanü;

³ashieji aveh juhthsü nazizhehwa lepie vü sezhuh luo,” ti küza.

⁴Thinü VÜWA nüh azhükütsü kümjie Mosa tü sa, thi ashiejiwa aveh tü juhthsü nazizheh mükhie vü sezhuh khe.

⁵Jüti sanü Mosa nüh ashiejiwa vü, “Hamatü VÜWA nüh sa üta azhükütsü küsü,” ti küza.

⁶Jüti sanü Mosa nüh Aron thi ma tsari sieru nü ajuh nüh mari küükhrü khehm.

⁷Thi ma vü akruzhuküsazhewa thsetsü, kütsekevüh vi tseketü, akruzhuküühawa thi navükruzhu thsetsü, thi asiezhüsheh nü küto navükruzhu kütseketewa vi tseketü ti sanü küritetsü.

⁸Jüti sanü tüso kühietewa vi feketü nü jümawa vü VÜWA Müshe Küthsüra thi Kümshira thsetsü.

⁹Thi ma lü rügivü alüküüzhu thsetsü nü atüvü suna khu kajilüwe thse, VÜWA nüh Mosa vü azhükütsü üta hakümjie satsü.

¹⁰Thi Mosa nüh aküthse kenüh vüjuh vi nü juhthsüzhehwa thse thi jüla zanyo küpeh aveh ti thse nü sakümtse tsü.

¹¹Jüti sanü ma nüh azüh wuori thuoüji kükhurüpewa rügivü türükeri kajake nü kükhurüpewa, ma huo-khuri aveh, nyihthikuwa thi ma kütokepewa ti sakümtse kheh.

¹²Thi ma nüh aküthse vüjuh wuori thuoüji Aron lü rügivü züke nü ma thsetsü taji ma sakümtsetsü.

¹³Jüsevü nga Mosa nüh Aron tsari sieru nü küsazhekruzhuwa küthse, kütsekevüh vi kütseke thi mari lüwe kürike tsü, VÜWA nüh Mosa vü azhükütsü kümjie hamari satsü.

¹⁴Jüsevü nga Mosa nüh shüvotsazah kükhiemuo kükhurü kenüh viru nü Aron thi ma tsari tü mari ke jümawa lü rügivü thsuoke.

¹⁵Jüti sanü Mosa nüh jüma fethe taji jüma züh vi nü ma tüjü nüh azüh pa taji kükhurüpewa rütsüri thse mükiele nü kükhurüpewa sakümtse, thi azühri tü kükhurüpewa kütokepe vü küshoke taji küütsathuo na küsa kenüh jüma sakümtse.

¹⁶Thi Mosa nüh jüma küthü aveh, votsasa vü küthüri, amüthse vü küüpeke aveh thi amükreh künyi thi küthü amükreh künyi vü küüpeke aveh ma nüh kükhurüpewa rügivü nüh tso.

¹⁷Thitü VÜWA nüh Mosa vü azhükütsü kümjie shüvotsazahwa, ma sahu, ma sari, ma süri thuoüji kürüpe alievü anyih vünüh tsom.

¹⁸Jüma sevü Mosa tü kütso kükhurü kenüh nyihzhüvo viru; thi Aron thi ma tsari tü nyihzhüvowa lü rügivü mari ke thsuoke.

¹⁹Jüti sanü Mosa nüh jüma fethe taji kükhurüpe rügivü azühwa zü mükiele.

²⁰Thi jüma tü sükhrisükhri vünüh Mosa nüh jümawa lü thi tehthuo küsari thi ma küthüri tsom.

²¹Thi VÜWA nüh Mosa vü azhükütsü kümjie ma votsasari thi ajihri tü ajuh nüh phrühm nü anyih nüh tso taji VÜWA vü khurü, kükhurüpewa rügivü nüh jüma ajü tso nü arheküüngu sa.

²²Jüsevü nga Mosa nüh nyihzhüvo küpa küsü viru, shiekütsü nyihzhüvo viru nü Aron thi ma tsari tü jümawa lü rügivü thsuoke.

²³Thi Mosa nüh jüma fethe taji azüh wuori vi nü Aron azhie wuovü akhüna thsopo, ma ke azhie wuovü tüjü küjiwa thsopo thi ma jih azhie wuovü tüjü küjiwa thsopo vü ti küwitsü.

²⁴Jükümjie ma tsari nga sieru nü mari khüna azhie wuovü thsopo, ake azhie wuovü tüjü küjiwa thsopo thi ajih tüjü azhie wuovü tüjü küjiwa thsopo vü ti küwitsü. Jüti sanü azüh küpari thuoüji Mosa nüh kükhurüpewa rügivü zü mükiele.

²⁵Thi ma nüh aküthü, süperü küthü, votsasa küthü aveh, amüthse vü küüpeke aveh, amükreh künyi thi ma küthüri thi thüchi azhie wuovü;

²⁶VÜWA tüvü küpeh ahzhi müküthse lohse thse küsa amülowa vünüh ahzhi müküthse tiehshu küsü, vüjuh küthse tiehshu küsü, amüsanüh küveh lohse küsü ti jümari vi nü aküthü rügivü thi athüchi azhie wuovü rügivü sa;

²⁷jüti sanü Mosa nüh hamari aveh vi taji Aron thi ma tsari ke vü thse nü shoküze taji VÜWA tüvü shoküüze kükhurü sa.

²⁸Thi Mosa nüh mari ke vünüh jümari vi nü kütso kükhurüwa masü kükhurüpewa rügivü nüh anyih nüh VÜWA vü arhe küüngu aküshie sakütsü kükhurü sanü tsom.

²⁹VÜWA nüh Mosa vü azhükütsü kümjie ma nüh akhuwa vi VÜWA tüvü shoküze taji shoküüze kükhurü sanaveh, nyihzhüvo vi nü aküshie küsa hamatü Mosa jisuo.

³⁰Jüti sanü Mosa nüh aküthse vüjuh pike thi kükhurüpe rügivü azüh pehküvehwa vi ti sanü Aron thi ma thsümnyiri vü, jüsevü nga ma tsari thi mari thsümnyiri rügivü kajake; jüti sanü Mosa nüh Aron, ma thsümnyi, ma tsari thi ma tsara thsümnyi ti sakümtsetsü.

³¹Jüti saküm sevü Mosa nüh Aron thi ma tsari vü, “Juhthsü nazizheh lehpie vünüh asa jüma shu nü shiekütsü kükhurüwa kenüh amülo lovü lohse tüküvehwa masü, hi nüh azhütsü taji küüza, ‘Aron thi ma tsari nüh hama tsanaveh,’ ta küüza kümjie tsaluo;

³²thi asa nga satü thi lohse nga satü küzake münyie naveh ünüh anyih vünüh tso khehm naveh.

³³Noh shiekütsü kenüh rülo türü vi naveh, tinü shiekütsüwa müjie küücheju nü rülo türü atüvü nü juhthsü nazizheh lehpie mükari ra.

³⁴Nosü hiri nüh hama saküveh thuoüji nohri rhehsana küsa kenüh VÜWA nüh sa üta azhükütsü wie.

³⁵Noh tü müsü nüh sana küsa kenüh VÜWA nüh mowa sa üta küza taji azhütsü nüh hi nga jüma azhütsü wievehthuoh nü küüroh jümari sana küsa kenüh rülo türü rülo vü nga thi rüza vü nga juhthsü nazizheh lehpie vü peh naveh,” ti küza.

³⁶Thi Aron thi ma tsari tü VÜWA nüh Mosa vü azhükütsü kümjie aveh sa kheh.