Read Pochuri Naga LEVIRI 9 Bible Online

LEVIRI 9 - Pochuri Naga bible

LEVIRI 9

¹Jüti saküm sevü rülo tüzeawa Mosa nüh Aron, ma tsari thi Israel kükhruori ti ji;

²thi ma nüh Aron vü, “Shüvotsa zah küsü kükhiemuo kükhurü kenüh, thi kütso kükhurü kenüh nyihzhüvo küsü ti künyikhürü nga azhührhü müpe wiethuoh nüh VÜWA tüvü kükhurü sanaveh.

³Thi Israel nyiri vü küza luo, kükhiemuo kükhurü kenüh nyihsüvo küsü, kütso kükhurü kenüh mieshü zah küsü thi nyihzhü zah küsü ti masükhürü nga mahvi küsü atsa azhührhü müküpe,

⁴thi shüvotsa küsü thi nyihzhüvo küsü ti luoveh kürüzi kükhurü VÜWA tüvü küsahthuo sana küsa kenüh, thi ahie kükhurü kenüh vüjuh küsanyie viru üti Israel nyiri vü küza luo; küpakenühnyunü nosü VÜWA tü nohri vü ru nasaküveh kenüh,” ti küza.

⁵Thinü Mosa nüh mari vü azhükütsü kümjie mari tü jümari vi nü juhthsü nazizheh tüvü ru; jüti sanü ashiejiwa tü VÜWA tüvü shenyiru taji tsie.

⁶Jüti küsa vü Mosa nüh, “Zanyo hamatü nohri nüh sa üta VÜWA nüh azhükütsü; thi VÜWA kütholathovü tü nohri vü kütsanaveh,” ti küza.

⁷ Jüsevü nga Mosa nüh Aron vü, “Kükhurüpewa vü shenyi raluo, thi VÜWA nüh azhükütsü kümjie kükhiemuo kükhurü, kütso kükhurü sanü noh mpa noh kenüh nga thi Israel nyiri kenüh nga kürhehsa küüroh sataji Israel nyira kükhurü viru nü makeri’a nüh kürhehsa küüroh satsüluo,” ti küza.

⁸Thinü Aron tü kükhurüpewa shenyiru nü ma mpa ma kenüh mieshüzah küsü kükhiemuo kükhurü kenüh fethe.

⁹Thi Aron tsari nüh jümawa azüh viru taji ma tsü nü ma nüh ma tüjü azühwa lovü küjo taji kükhurüpewa rütsüri rügivü thse, thi kükhurüpewa kütokepe vü küshokem;

¹⁰thitü VÜWA nüh Mosa vü azhükütsü kümjie aküthü, amükreh künyi thi amüthse vü küüpeke ti thuoüji kükhiemuo kükhurüwa vünüh vizhu nü kükhurüpe rügivü nüh tsom.

¹¹Thitü satsa küpari thi sahu ti thuoüji kürünape alievü nüh anyih nüh tsom.

¹²Thi Aron nüh kütso kükhurüwa fethe nü ma tsari nüh azühwa ma vü viru taji ma nüh kükhurüpewa rügivü ja mükiele.

¹³Jüti sanü mari nüh lethuolethuo taji alüwa nga ti kütso kükhurüwa ma vü viru nü ma nüh kükhurüpewa rügivü nüh tso.

¹⁴Thi ma nüh votsasa nga thi ajihri nga ajuh nüh phrühm taji kükhurüpe rügivü nüh kütso kükhurü vü nyi tsonyiem.

¹⁵Jüti sanü ma nüh Israel nyiri kenüh kükhurüwa viru, mari kükhiemuo kükhurü kenüh nyihsüwa viru taji fethe taji kükhiemuo kenüh kükhiemuo pokhuwa kükhurü kümjie kükhurü sa.

¹⁶Thi ma nüh kütso kükhurüwa viru nü azhühkhowa müzhe taji kükhurü sa.

¹⁷Ma nüh ahie kükhurüwa nga viru nü jüla nüh ma müza küpro hu taji rüne vü kütso kükhurüwa mpa mükünyu jümawa nga kükhurüpewa rügivü nüh tso.

¹⁸ Jüsevü nga Aron nüh Israel nyiri kenüh luoveh kürüzi kükhurü küsahthuo kenüh shüvotsawa thi nyihzhüvowa ti fethe nü ma tsari nüh azüh ma vü viru taji ma nüh kükhurüpewa rügivü ja mükiele,

¹⁹thi shüvotsawa küthü thi nyihzhüvowa küthü, süperü küthü, votsasa küüzhute küthü athsüwa, amükreh künyi thi amüthse vü küüpeke;

²⁰thi mari nüh aküthüri vi akhuri rügivü sanü kükhurüpewa rügivü nüh tsom,

²¹Mosa nüh azhükütsü kümjie Aron nüh akhuri thi thüchi azhie wuovü ti vi nü VÜWA tüvü shohküze.

²² Jüti sanü Aron nüh anyiri wuovü ma ke thsuoke taji tsia mari tsü; thi ma tü kükhiemuo kükhurü vünüh kütsokükhurü vünüh thi luoveh kürüzi kükhurü vünüh teturu.

²³Jüti sanü Mosa thi Aron masü tü juhthsü nazizheh lovü tu nü shuhru taji tsia nyiri tsü, thinü VÜWA kütholathovü tü anyiri aveh vü küngu kheh.

²⁴Jüti küsa vü VÜWA tüvü nüh anyih shuru taji kütso kükhurüwa thi aküthü kükhurüpe rügivü küpehwa tsom; thinü nyiri aveh nüh jüma ngu nü mari tü zie taji mari anyieh vü küngie tsuo kheh.