Read Pochuri Naga JEREMIA 1 Bible Online

JEREMIA 1 - Pochuri Naga bible

JEREMIA 1

¹Helkiah atsa Jeremia azhüri, Benjamin azhih vü küpeh Anathoth navüri,

²Judah kajiwa Amon atsa Josiah, ma nüh kükaji mahvi türaküche vü thawa vü VÜWA zhü ru lo.

³ Jümatü Judah kajiwa Josiah atsa Jehoiakim rülo küju ra, thi Judah kajiwa Josiah atsa Zedekiah mahvi türaluoke sekhe küji, Jerusalem re nyura küsi sateküwa asa münga wa küju ru.

⁴VÜWA zhü tü hi vü ru taji,

⁵Hi nüh ashiekuo lovü nüh noh müjie saküüje vü nüh hi tü noh thsümthuoh; thi noh müjie küwuo vünüh hi nüh noh saküsietham thuo; hi nüh noh tü akuoküjiri setsaküthsüri küsü chiekemthuoh; ta küza.

⁶Jüti küsa vü hi nüh, “O, VÜWA Saküüwuowa[1]! Halie, hi nü azhü müphrathsü nü, küpakenühnyunü hi tü rünguori küsü wie nü,” ti rületsü.

⁷Thitü VÜWA nüh hi vü, “Hi tü kürünguori nü, ti müküza tümluo,” küpakenühnyunü noh tü hi nüh küüzeri aveh vü wa na küveh kenüh, thi hi nüh noh vü momowa azhü küza naveh ünüh noh tü küza naveh.

⁸Mari mükrü tüm, küpakenühnyunü hi tü noh vizhu nta noh sietse küveh kenüh, ta VÜWA nüh küza veh

⁹Thinü VÜWA nüh ma ke thsuo zhuru nü eh po pa taji VÜWA nüh hi vü, “Halie, hi nüh eh zhüri vi noh po lovü thsemthuoh ünüh.

¹⁰Noluo, hi nüh nosü noh vi nü akuoküjira nyiehvü thi kajipera nyiehvü thsemthuoh ünü lojam thi shochiem üti, zoriem thi vehjam üti, thi shie üti.”

¹¹Thinü VÜWA zhü tü hi vü ru taji, “Jeremia, noh tü mowa ngu veh lo?” ta küna. Jüta küüna vü hi nüh, “Hi tü athso arhu tsuona küsü ngu veh,” ti rületsü.

¹²Jüta kürüle vü VÜWA nüh hi vü, “Noh tü ngu mühiesheh thuoh, küpakenühnyunü hi tü eh zhüwa sazhu nti jüma nopehvehthuoh,” ta küza.

¹³VÜWA zhü tü akünyiawa hi vü ru taji, “Noh tü mowa ngu veh lo?” ta küna. Thinü hi nüh, “Zhietü wuovü nüh küprüke teküwa aküfü küüluo küsü hi nüh ngu veh,” ti rületsü.

¹⁴Jüti küsa vü VÜWA nüh hi vüh, “Hi tü zhiese wuovü nüh kümsü azhih vü nüh shu wa naveh,

¹⁵küpakenühnyunü, halie, hi nüh zhietü wuovü kajira kuohri ji veh, ta VÜWA nüh küza küveh kenüh; thi mari tü ru nü mari aveh nga Jerusalem khepie vü ma kükajipe sanaveh, ma khithuo aveh vü sa mükiele naveh. Thi Judah nyujiri aveh vü sake naveh.

¹⁶Thi hi nüh eh shihwa mari vü phrahke naveh, mari nüh hi kule nü kümsü küsa aveh kenüh; mari nüh nyiaza küpari vü sierhe tsomthuoh, thi mari mpa mari ke nüh küürohri khurümthuoh.

¹⁷Thitü noh thuoüji noh küshih tseke luo, süraluo, thi hi nüh noh vü azhükütsü aveh mari vü küza luo. Mari nüh luoveh samküüzah tümluo, mari atü vü nüh hi nüh noh luoveh saküüzah üsü nüh.

¹⁸Thi hi nüh halie, nosü hi nüh noh kenüh nyuji kümzho küsü satsü ma veh, amürü lo khuo küsü, sawuo azie, azhih jüla ajü, Judah kajiri vü, ma kajitsari vü, ma navüri vü, thi azhih jüla nyiri vü ti kürünyuo na küsa kenüh.

¹⁹Ma ri tü noh sie saluo naveh; thitü mari tü noh küchawa nyu, küpakenühnyunü hi nüh noh vizhu na küsa kenüh hi tü noh sietse veh,” ta VÜWA nüh küza veh.