Read Pochuri Naga JEREMIA 10 Bible Online

JEREMIA 10 - Pochuri Naga bible

JEREMIA 10

¹VÜWA nüh nohri vü azhü küphrahtewa künaluo, O Israel zhehlori.

²Hakümjie VÜWA nüh küza veh: “Akuohjira lehkhuji müthsü tüm, nyutü atülüra thsoshiri vü luoveh mzah tümluo, küpakenühnyunü akuoküjiri tü mari vü krütewa wati,

³küpakenühnyunü nyira kürho khonyori tü akürie küsa kenüh, areza vü athsoh küsü tü shüchiem, thi asieküsari küsü nüh amüvü vi nü küroh.

⁴Nyiri nüh jüma tü rakasa thi suna vi küte mari nüh jüma tü atsüvü thi amrü ri nüh zete taji müküüngahra sa.

⁵Ma anguori tü amüzhi zhuh küsü vü saküükrü kümjie, thi mari tü azhü müphra ra; mari tü khakhati, mari tü alehmkütsera kenüh, jümari mükrütümluo, küpakenühnyunü mari tü küumsü müküsara kenüh, jü mpa mükünyu mari vü tü kümhie küsa mütü”.

⁶Noh kümjie küsaluo, O VÜWA; noh tü jim, thi noh nyo tü akükhra vü jim.

⁷ Thawa nüh noh mükrü nüh sana lo, O akuoküjira kajiwa? küpakenühnyunü hama tü noh kümlie küsa kenüh; akuoküjiri azhie vü aküthsüri aveh thi mari kajiperi aveh vü nyi küsü nga noh kümjie münyie luo.

⁸Mari tü zhephrom thi zanyo nga müthsü; anguo küsüphiewa tü athso!

⁹Tarshish vünüh rakasa küütsüh viru, thi Ufas vünüh suna küütsüh viru. Jümari tü asienyira küüroh thi suna küsara ke; ma satzari küüzhuthsüri tü kümru thi akümo[2]; jümari aveh nga aküzhüra küüroh.

¹⁰Thitü VÜWA tü küzhütsa Saküüwuowa; matü rhoküveh Saküüwuowa thi sehkhesehkhe küju kajiwa. Ma rükümtho vünüh azhih tü küzhü veh, thi akuoküjiri tü ma rüküshu mü münora.

¹¹Noh nüh hakümjie vünüh mari vü küza naveh. “Atülüri thi azhih müküsa nyiazari tü azhieh vünüh thi atülüri vünüh pokahm naveh,” ti küza luo.

¹²Jümatü ma nüh ma kükhra vi azhih küsawa, ma kümtsa vünüh azhih nyie küvi shuo; thi ma küthsükümshi vünüh atülüri shohküüta.

¹³Ma nüh ma khi küphrahteshu vü atülüri vü ajuhri tü küshüveh, thi ma nüh azheh küpote vünüh aküzo vishu. Ma nüh atsoh kenüh atsorieri satsü, thi ma nüh ma luo vünüh amürhü vizhuzhuh.

¹⁴Nyiri aveh nga zhehphro thi zanyotü thsü münyie luo; suna küsari aveh tü ma nguori nüh küzükrü vü thsemthuoh; küpakenühnyunü ma tso nyieri tü akürie küsa kenüh, thi mari vü arütho mütü.

¹⁵Jümari tü amemnyie luo, akürie küüroh küsü; mari kümnomna küngu tsotho vü mari tü pokahm na thuoh.

¹⁶Jacob suopewa thuoüji hamari kümjie nyu, küpakenühnyunü zanyo aveh küsazhuwa tü ma küsa kenüh, thi Israel tü ma kaküvi akuohwa; VÜWA tü ma nyo.

¹⁷Azhih vünüh nohri kükho vizhuh, o nohri kümkiethuoke kükhu vü kürhori!

¹⁸küpakenühnyunü hakümjie VÜWA nüh küza veh: “Halie, hi tü hama tsothovü azhih wa arhieri küthejam naveh, thi hi nüh mari vü müsheküna viru naveh, mari tü jü mari thsü na küsa kenüh” ti küza.

¹⁹Eh kümnomna kenüh hi tü amngu müsümthuoh! eh kümsamna tü süthuoke. Thitü hi nüh, “Hama tü kümnomna küsü tsa wiethuo, thi hi tü jüma müvü üji mümhie,” ti küza.

²⁰Eh juhthsüzheh tü zoriemthuoh, thi eh juhthsüzheh küphehteri tü zothuokhem thuoh; eh tsari tü hi vünüh tewa khehthuoh; eh juhthsüzheh khake le na küsa nyi küsü nga münyiethuoh, thi eh küzieteri sake na küsa münyie thuoh,

²¹küpakenühnyunü nyihzhükühuori tü küzhephro kenüh, thi mari tü VÜWA mphah; jükenüh mari tü mütsarhie, thi mari nyihnyihriekhuowa tü voriemthuoh.

²²Künaluo, azhüwu! Halie, jüma tü tse thuoh! Judah nyujiri saküüzo nta zhiehtü wuovü nüh saküürüza küji küsü tsethuoh, rezanyihnyih küpepe küsü küsa nta.

²³Hi nüh thsü veh, O VÜWA, anyira lehkhuji tü ma vü pehmveh, ma mpa ma lekhari küüjo nü kütse anyiri vü pehmveh.

²⁴Hi sakümsho luo, O VÜWA, thitü kümsho küüte vünüh saluo; noh rüküshu vünüh zanyo küsü nga mü küngu thama hi sie küru kenüh.

²⁵Noh müküthsü akuoküjiri noh rükümtho küshoke luo, thi noh nyo müküji nyiri vü noh rü kümtho küshoke luo; küpakenühnyunü mari nüh Jacob shorie kümthuoh kenüh, mari nüh ma shohriem thi müzhumthuoh, thi ma küshope küümsüja kümthuoh kenüh.