Read Pochuri Naga JEREMIA 11 Bible Online

JEREMIA 11 - Pochuri Naga bible

JEREMIA 11

¹VÜWA vünüh azhü Jeremia vü küru:

²kütsathuo hama azhüri küna luo, thi Judah thi Jerusalem vü arhieri vü nyiri vü küza luo.

³Noh nüh mari vü, VÜWA, Israel Saküüwuowa nüh hakümjie küzaveh: Kütsathuo, hama azhüri vü mükütsa keri müzüm thuoh,

⁴jümatü hi nüh Egypt zhih, amürü tsoküükuorake vünüh siezhuküruvü azhütsü nü küüza, eh jikhi künaluo, thi hi nüh azhükütsü aveh saluo. Jüta küsa vünüh nohri tü eh nyiri sanaveh,

⁵noh pari vü küüshiekütsawa, tününjuh thi awejuh liküveh azhihtsü nta küüshiewa, nosü üta küsawa sana küsa kenüh ti küza. Thinü hi nüh, “Thinü jüti saluo, VÜWA,” ti rületsü.

⁶Jüti küsa vü VÜWA nüh hi vü, azhü hamari aveh Judah nyujirivü, thi Jerusalem lerari vü zhüchüh luo kütsathuo hama azhüriküna nü jümari saluo,

⁷küpakenühnyunü Egypt zhih vünüh hi nüh noh pari siezhu küra vü hi nüh mari küükhesheh hamna tsü, mkütuo nüh mari vü hamna tsü, nosü küju wie nga, eh jikhi vi luo, ti küza.

⁸Tü mari tü eh zhü müvi mari khüna mükürhekhe, thi aveh nga mari luoveh kümsü müküzike vünüh tsetewa. Hi nüh mari vü kütsathuohzhü hamari aveh viru kheh, hi nüh mari nüh sa üti azhukütsü, thitü mari tü müsa; ti küza.

⁹Jüsevü nga VÜWA nüh, Judah nyiri thi Jerusalem vü kürhori aza vü küsaluo peveh.

¹⁰Mari tü para künakhie vü süle tewa thuoh, eh zhü kürü taji; mari tü nyiaza küpari kütsü santa mari ase vü nyi te wa thuoh; Israel zhehlori thi Judah zhehlori tü hi nüh ma pa ri sie kütsathuosa küsawa zokhuom thuoh.

¹¹Jükenüh, hakümjie VÜWA nüh küza veh, Halie, mari müriemüküwara kümsü mari vü vi tse veh; mari nüh hi vü zie wieketünga hi tü mari zhü küünawa nyu.

¹²Jüti küsa vü Judah nyujiri thi Jerusalem arhieri tü wa taji mari nüh nyiazari vü sierhe kütsori vü zie naveh, thitü mari nüh mari küsüro vü mari mükülole ra,

¹³küpakenühnyunü noh nyiazari tü noh nyujiri zakethuoh nü, O Judah; thi zükrü nta Jerusalem lera zake kükhurüpe sakemthuoh, Baal vü sierhe tso nta kükhurüperi sasa veh.

¹⁴Jükenüh anyi hamari kenüh kükhuo müsa tüm, nyutü ma mthori vünüh ajikhi nyutü akükhuo zie mükümsie tüm, küpakenühnyunü hi tü mari küsüro tsotho vü mari nüh hi ji wieketü nga küünatü wa nyu.

¹⁵Eh küümzewa tü ma nüh kümsü küürohri saküm kenüh eh zheh vü mowa kümsho pehveh lo? Küphrahzhu thi asa vi küsahthuo nüh noh küpoka tü ra naveh ülo? Noh tü rietsi ra naveh ülo?

¹⁶VÜWA nüh küsükeri no vü küüza, “Olive rhu kümzhi küsü, avi kümhie, thitü tsomürhü aküji küsü nüh jüma tsomnaveh, thi ma tsuonari tü tsoküram naveh.

¹⁷VÜWA, noh küshiewa nüh noh vü kümsü phrateke tsümthuoh, küpakenühnyunü Israel zhehlori nüh thi Judah zhelohlori nüh kümsüsaküm kenüh, Baal vü sierhe tso nü eh rüsaküshu küm kenüh,” ti küza.

¹⁸VÜWA nüh hi vü sa küüthsü thi hi nüh thsüra; jüti sanü noh nüh hi vü mari küüroh küli sa kütsü.

¹⁹Thitü hi tü nyihzhüzah azhükünyi küsü küfethe pe vü sieküwa kümjie. Jüma tü hi vü taküsa mthsünsa; mari nü aro sataji küüza, “Ma rhu vi nüh ma vi nga zoriem ünüh raluo, rhoküveh azhihwa vünüh ma zathuom ünüh raluo; jüti sanü ma nyo wa tü mükümsheke le wiethuoh nüh küüsamünüh,” ti küza.

²⁰Thitü, O Kümsietsa VÜWA, künyitsa vünüh lesawa, luoveh thi amüshe kümteno wa, hi tü mari rügi vü noh nüh amüthoh küsa küünoluo, küpakenühnyunü hi tü noh vü eh kütsazawa noh vü phrake kümthuoh kenüh.

²¹Jükenüh noh kürholi phakhüvehwa Anathoth nyiri kenüh VÜWA nüh hakümjie küza veh, mari nüh, VÜWA nyo vünüh setsaküthsüzhü müphra tümluo, nyu thuoüji noh tü hiri ke vünüh sünaveh, ta küza,

²²jükenüh VÜWA nüh hakümjie küza veh: “Halie, hi nüh mari saküümnomna naveh; vizari tü anyuchuwa vünüh sü naveh, mari atsa nyimpari thi mari tsavühri tü kümkhuoji vünüh sünaveh;

²³thi mari nyi küsü nga küükhe wa nyu. Küpakenühnyunü Anathoth nyiri vü kümsü viru küveh kenüh mari kümnomna mahvi wa kenüh,” ta küza.