Read Pochuri Naga JEREMIA 13 Bible Online

JEREMIA 13 - Pochuri Naga bible

JEREMIA 13

¹Hakümjie VÜWA nüh hi vü küza, “Wa nü mürilo küshihle küsü süluo, thi jüma vi noh küshi tseteluo thi jüma tü ajuh vü müteke tümluo,” ta küza.

²Jükenüh hi tü VÜWA zhü müzhe nü ashihle sü taji tseke.

³Thinü VÜWA zhü tü akünyiawa hi vüru taji,

⁴“Noh nüh küsü ashihle wa vi luo, jüma tü noh küshih vü pehveh, tinü süra taji Eufrates vü wa nü lokrü lovü jüma küthi saluo,” ti küza.

⁵Kükenüh VÜWA nüh hi vü azhükütsü üta hi tü wa nü Eufrates kütuoh vü jüma küthi

⁶Jüti küsa vü rülo hothake ase vünüh VÜWA nüh hi vü “Süra nü Eufrates vü wa taji ashihle hi nüh jüla küthi üti noh vü hi tü azhükütsüwa vi luo,” ti küza.

⁷Jüta küüza vü hi tü Eufrates vü wa nü chüh taji hi nüh küthi küsa ape vünüh ashihle wa vi. Thinü halie, ashihle wa tü samsüm la; vi nü zanyoküsü nga küsara münyie nüh sam la.

⁸Jüsevü VÜWA zhü hi vü ru taji.

⁹Hakümjie VÜWA nüh küza veh: jüüta wie ketünga Judah kürhiezarhiechi thi Jerusalem kürhiezarhiechi aküji hi nüh zoriemtü naveh.

¹⁰Anyi kümsü hamari, eh zhü müküna nta küsari, müzike wiethuoh nüh mari mpa mari luoveh müzheteküwa nyiazara kütsü sa thi jümari ase vü teküwari tü zanyo küsü kenüh nga kümhie mükünyie ashihle hama kümjie sanaveh,

¹¹küpakenühnyunü ashihle tü anyira küshih vü küüpephoke üta Israel zhehlori ajü thi Judah zhehlori ajü saküükem thuoh, ta VÜWA nüh küza veh, jütisanü mari tü eh kenüh anyiri küsü, anyo küsü, küsiake küsü thi kütholathovü küsü küüsa sa, thi tü mari tü küünawa nyu.

¹²Noh Israel tü azhih hama mari vü küza luo: “Israel Saküüwuowa VÜWA nüh hakümjie küza veh, ‘Ake aveh akhah müzhi küpro luo,’ ti küza üta küza.” Thi mari nüh noh vü, “Ake aveh tü akhah nüh pro naveh ta küsa hiri tü müthsü ülo?” ta küza naveh.

¹³Jüta küsa vü noh mari vü “VÜWA nüh küza veh: Halie azhih hama arhieri aveh hi nüh kümshe nüh saküprotsü naveh: David kükajipe vü küpeh kajiri aveh, navüri setsaküthsüri, thi Jerusalem vü arhieri aveh.

¹⁴Thi hi nüh mari küsü nüh küsü saküüchirü tsü naveh, apari thi atsari ti saküchirü naveh, ta VÜWA nüh küza veh. Hi nüh mari no rütha künawanyu, nyutü küsawa nyu, nyutü rüthaküna müsanüh mari zoriekhehm naveh,” ti küza üta küza.

¹⁵Küna luo thi khüna tsü luo; mürhieza tümluo, küpakenühnyunü VÜWA nüh küzakümthuoh kenüh.

¹⁶VÜWA Saküüwuowa nüh aküzo müjie viküru atüvü ma vü kütholathovü tsüluo, küzoriezorie aküzhi rügi vünüh noh ji müjie kümshü vünüh, noh nüh aküwie noküveh vü küshiemo samtü taji zomthsüthsü müjie küsa atüvü nüh.

¹⁷Thitü noh nüh müküna thuoüji, nohri kürhiezarhiechi kenüh eh kürholi tü küüzhe vünüh krie naveh; eh notha tü kriezoke nü arüthsü li naveh, küpakenühnyunü VÜWA nyihzhüriekhuo tü revi teküwathuoh kenüh.

¹⁸Kajiwa thi kajivüwa azah vü küza luo: “kürünyie ape vi luo, küpakenühnyunü nohri kajilüwe küzüwa tü nohri alü rügi vünüh tekütsuothuoh kenüh,” ti küza.

¹⁹Negeb nyihnyihri tü khetemthuoh, nyi küsü nga nüh jümari müküsara samthuoh; Judah aveh tü aküsi sate wathuoh avehveh nga aküsi sate wathuoh.

²⁰Nohri notha toke nü zhietü vünüh küruri noluo. Nyizhüriekhuo noh vü kütsü nyihzhüriekhuo küzüwa tü khiela pehvehlo?

²¹Noh fü küsa nta noh mpa nüh küsosieri tü noh anyieh vü alü kümjie vünüh sa thuoüji noh tü mowa küza na lo? Nyimzavüri küsü nüh atsa wuo nta küna kümjie, noh tü müünomna tüm naveh ülo?

²²Thi müküitüküzü noh nüh noh luoveh lovü nüh, Zanyo hamari tü mokenüh hi vü rulo? ta küza wie ketunga, jüma tü noh künakhie aküji saküm kenüh, noh küüle phruke tüveh, thi noh tü münomna she naveh.

²³Ethiopiari tü ma sa hu nyutü amie tü wa tü ma sarie khaphrüra naveh ülo? Jüta thuoüji nohri kümsü saphiekümri tü kümhie sara veh.

²⁴Hi nüh nohri tü küpohu vü amürhü nüh müthaku kükerie kümjie hi nüh sarieja naveh.

²⁵Hamatü noh vü kütsuotsake, hi nüh küto vünü noh suope küzhu, ta VÜWA nüh küza, küpakenühnyunü noh nüh hi kümam nü akürie lehno teküwa kenüh.

²⁶Hi wie nga noh küüleh fo wa noh nyieh hiete tü naveh, thi noh küzükrü tü ngum naveh.

²⁷Hi noh kükreri ngum thuoh, noh küüphroküphrie küsari thi noh muomuo kürho ri, ato vü küzhihori vü. Noh kümhie küsara kütsüna, O Jerusalem! Noh saküümtse tü noh tü vü küthake peh na lo?