Read Pochuri Naga JEREMIA 14 Bible Online

JEREMIA 14 - Pochuri Naga bible

JEREMIA 14

¹Zhi küükhro zhü Jeremia vü VÜWA zhü küru

²Judah tü krie veh thi ma kheriri tü lorüveh; ma nyiri tü azhitho rügi vünüh rümuo veh, thi jerusalem küzie tü arügi vü tekuokuoti.

³Ma sierhüri tü mari siepe küze nü ajuh küütie; mari tü ajekuri vü ru, mari tü ajuh müngu ra nüh sam, mari tü mari juhkuri vü nü shele teru; mari tü zükrü thi rüza taji mari alü tiehte kheh,

⁴küpakenühnyunü azhihwa tü kuorieküm thuoh kenüh, azhihwa vü atsoh rümkütsü kenüh, küüroh tsari tü zükrümthuoh, ma lüri tietemthuoh.

⁵Ato vü asünyi wie nga ma tsa kürünyi tsa küsawa müsiethuoh are mükünyie kenüh.

⁶Ato rawuhküzari tü azhie kümsie kümtseri vü tsie veh, mari tü rezanyihnyih kümjie amürhü küthoke; mari notha tü zihm, are mükünyie kenüh.

⁷Hiri künakhie nüh hiri sie kürünyuo peh wie nga, saluo, O VÜWA, noh nyo rieh nüh; küpakenühnyunü hiri asevü kütseke tü zhi küm kenüh, hiri tü noh vü khiemuomthuoh.

⁸O noh Israel küluo zhe wa, küsüro tsotho vü ma küülolewa, azhihwa vü noh tü mokenüh anyitheri küsü kümjie sana lo, küzekütseri küsü nüh anato vü küzhihkewa nü rüza küsü küüzhike kümjie samnyi lo?

⁹Noh tü mokenüh anyi kürüzari küsü kümjie sana lo, akükhrari müküülolerari küsü kümjie sanaveh ülo? Tü noh tü, O VÜWA, hiri aza vü peh veh, hiri tü noh vünüh jimthuoh; hiri müja tümluo; ti küza.

¹⁰Anyi hamari kenüh VÜWA nüh hakümjie küza veh: Mari tü hakümjie vünüh küüzhu lomthuo, mari tü mari ajih mükhete nüh samthuoh, jükenüh VÜWA tü mari mvithuoh khinyi thuoüji ma nüh mari künakhie müsheke na thuoh thi ma kükhiemuori kümnomna tsü nathuoh; ti küza.

¹¹VÜWA nüh hi vü: anyi hamara kenüh kükhuo müsa tümluo.

¹²Mari nüh asa sa wie ketünga hitü mari nüh küzie küüna wa ngu, thi mari nüh kütso kükhurü thi atha kükhurü tsü wie nga, hi nüh anyuchuwa vünüh, kümkhuoji thi sanakümsü vünüh mari saküsam naveh; ti küza.

¹³Thinü hi nüh, O, VÜWA Saküüwuowa, halie, setsakütshüri nüh mari vü, “Nohri tü anyuchuwa künguwa nyu, nyutü kümkhuoji küpehwa nyu, thitü hi nüh azhie hla kütsathuo küütoh tsü naveh, ti küza üti,” ti küza.

¹⁴Jüti küüza vü VÜWA nüh hi vü: Setsaküthsüri tü eh nyo vünüh setsaküthsüzhü akürie phra veh; hi nüh mari müküze, nyutü hi nüh mari vü mü müküza. Mari tü nohri vü akürie kümohtsa setsaküthsüzhü, ame mkünyie motsa zhü, thi mari mpa mari küshe kürieriekhri phraküveh wie.

¹⁵Jükenüh VÜWA nüh hi nüh müküze wie ketünga eh nyo vünüh setsaküthsüri setsaküthsüzhü küphrari nüh, anyuchuwa thi kümkhuoji tü azhih hala küruwa nyu; ta küza: Thitü anyuchuwa thi kümkhuoji nüh setsaküthsü jümari pokahm naveh.

¹⁶Thi mari nüh setsaküthsüzhü phra kütsüri thuoüji Jerusalem alerari vü vehjazhum naveh, jütisanü kümkhuoji thi anyuchuwa nüh khram nü nyi küsü nga nüh mari nga, mari vüvühri nga, mari tsa nyimpari nga, thi mari tsavühri nga. Küpakenühnyunü hi nüh mari kümsü küsa mari rügi vü küshoke na küveh kenüh.

¹⁷“Noh nüh mari vü azhü hama küza naveh: eh notha tü rüza rülo arüthsü nüh küli luo, thi jümari tü müküütuo tümluo küpakenühnyunü eh nyira mükü rüsa vühwa tü kümsamna küji küsü nüh kürhiemtüthuoh, sheküürülo nüh toküümsamna shemthuoh.

¹⁸Hi nüh azhuh vü küwa vü, halie, anyuchuwa lovü nüh rehthekümri ngu! Thi hi nüh anyuji wa lovü kütse vü, halie, kümkhuojih vünüh küsakünari ngu! küpakenühnyunü setsaküthsüri thi navüri tü azhih wa vü mari asü saveh, nüh kashukari thi müthsü nüh samthuoh.”

¹⁹Noh tü Judah kulejajiem wiethuoh ülo? Noh kürholi tü Zion na nyakuomthuohla? Mokenüh noh tü hiri kürhie nü hiri tü luovehkürüzi no, thitü kümhie küsü nga mürü; Saküümhie tsotho küsü no, thitü halie, küsüro wie.

²⁰Hiri nüh hiri kümsü küsa thsüvehthuoh, O VÜWA, thi ehpara künokhie, küpakenühnyunü hiri tü noh vü khiemuo kümthuoh kenüh.

²¹Hiri müküchie müsa tümluo, noh nyo rie nüh; noh kütholothovü kükajipewa müküchiekürhe müsa tümluo; hiri sie noh kütsathuowa müzokhuo tüm nü müsheke luo.

²²Akuohjira kürie nyiazara azhievü atsoh kürü viküru ra pehvehülo? Noh tü jümawa nyu ülo, O VÜWA hiri Saküüwuowa? Hiri tü hiri küluozhe noh rügi vü sa veh, noh nüh zanyo hamari aveh küsa kenüh.