Read Pochuri Naga JEREMIA 15 Bible Online

JEREMIA 15 - Pochuri Naga bible

JEREMIA 15

¹ Thinü VÜWA nüh hi vü, Mosa thi Samuel nüh eh tüvü tsie wie ketünga, eh luoveh tü anyi hamari wuovü küürelewa nyu. Eh notha vünüh küzem luo, thi mari tekü wam luo!

² Thi mari nüh noh vü “Hiri tü khievü wa na lo?” ta küna thuoüji, noh nüh mari vü, VÜWA nüh hakümjie küza veh: “Sanakükho vü küwari tü sanakükho vü tewa naveh, thi anyuchowa vü küwari tü anyuchuwa vü tewa naveh; Kükhuoji vü küwari tü kümkhuoji vü te wa naveh; thi aküsi küsari tü aküsi vü te wa naveh, üti,” ti küza.

³Hi nüh mari rügi vü küzorie mahnyo müzü chieketsü naveh, ta VÜWA nüh küza anyuchuwa nüh kürehthe, ashuh nüh küshohrie, amürhü vü amüwari thi azhih vü samwari nüh küshohrie ti tsü naveh.

⁴Hezekiah tsa Manase, Judah kajiwa nüh Jerusalem vü küsa wa kenüh hi nüh azhih aveh vü mari saküümzhoh tsü naveh.

⁵Thawa nüh noh no nü rütha na nalo, O Jerusalem, nyutü thawa nüh noh kenüh krietü nalo? Noh kenüh thawa nüh süle no nalo?

⁶Noh nüh hi kule jamthuoh; ta VÜWA nüh küza, noh tü asevü tseke peh huo; jükenüh hi nüh noh vü eh ke thsuozhu taji noh zoriemthuoh; hi tü noh mshe nü münokemthuoh.

⁷Hi nüh azhihwa kheriri vünüh arahe vü nü hemthuoh; hi nüh mari küüsemthuoh, hi nüh eh nyiri zoriemthuoh; mari tü mari lehkhujiri vünüh müsühlethuoh.

⁸Hi nüh ma tünyivühri tü juhküji vü shünyi nyievü nüh saküzhitsünaveh; vizara azahri vü küpoka tsümthuoh; rünyi küzeto vü hi nüh mari vü zhürüluo müsheküna thi kükrüküngo mari vü kürumthuoh.

⁹Türü küwuowa tü mnomna tewa thuoh; ma tü ase mthsü nüh tewa thuoh; tho küveh vünüh ma rünyi tü tetu; ma tü saküzükrü thi kümro mthuoh. Thi mari küpari thuoüji hi nüh anyuchu wa vü tsüm nathuoh. Mari mükünongüri atüvü, ta VÜWA nüh küza, ti küza.

¹⁰Hi tü amngukümsüwa, eh zah, noh nüh azhih aveh sieküsaluo thi azahzhü mküka küsa anyi küsü hi küwuo kenüh! Hi nü küüna nga müsa, thi aküna nga müsa, tü mari aveh nüh hi müzü.

¹¹O VÜWA, mükütüküzü hi nüh mari kümhie kenüh noh vü küzatü msa thuoüji, mükütüzü hi nüh müshekümnomna tsotho vü thi küsüro tsotho vü mükünongüri kenüh noh sie jüle msa thuoüji, mosie nüh.

¹²Nyi küsü nüh amürü zhietü vü amürü thi asawuo zoshi ranaveh ülo?

¹³“Noh kükhiemuori aveh kenüh noh zhithuosuo aveh vü, ame müsanüh hi nüh tsümnaveh.

¹⁴Azhih noh nüh müküthsü noh mükünongüri vü hi nüh noh tü akütsü küüsanaveh, küpakenühnyunü hi nüh arüküshu vünüh küsuokürho ju na küsa anyih küsü mütsokümthuoh kenüh,” ti küza.

¹⁵O VÜWA, noh nüh thsü veh; hi müsheke luo thi hi vü küzhuru luo, thi hi kümnomna sakütsüri vü eh kenüh amüthoh vi tsüluo. Noh noküümze vünüh hi vi müja tümluo; hi tü noh rie nüh küzükrü vü veh ti küsa thsüluo.

¹⁶Noh zhü tü phahra nü hi nüh tsamthuoh, thi noh zhü tü eh kenüh loküzhe küsü thi eh luoveh kenüh künolowa sa; küpakenühnyunü hi tü noh vünüh jimthuoh, O VÜWA, aveh Saküüwuowa wa,

¹⁷Hi tü küjokujozhie küsara za vü nyi mshupeh, nyutü hi tü nyierakükhruo müsa; hi tü hi mpa shupeh, küpakenühnyunü noh ketü hi rügi vü küpeh kenüh, noh nüh arüküshu vi hi saküpro kümthuoh kenüh.

¹⁸Mokenüh eh küna tü mükütuo wielo eh künathsopo tü mükura wie lo saküümhie ma mülo? Noh tü hi vü kürieriejhri kutso ajuh müküli küsü kümjie sa nti ülo?

¹⁹Jükenüh VÜWA nüh hakümjie küza veh: mükütüküzü noh nüh sühle thuoüji hi nüh noh siekele naveh, thi noh tü eh tüvü tsie naveh. Mükütüküzü noh mowa nü mame nü nyie nüh jüma müphrazhu nüh aküriewa phrahzhu thuoüji, noh tü eh po üta sanaveh. Mari nüh noh vü sühle naveh, thitü noh thuoüji mari küsühlewa nyu.

²⁰Thi hi noh tü anyi hamari vü asawuo shiehku küsü satsü naveh; mari tü noh sie saluo naveh, thitü mari tü noh nyieh vü mükhra ra küpakenühnyunü hi nüh noh külole thi noh vizhu nta siekütse kenüh, ta VÜWA nüh küza.

²¹“Kümsüküsara ke vünüh hi nüh noh vi zhu naveh, thi nyikümsüri ke vünüh noh rhesanaveh,” ta küza.