Read Pochuri Naga JEREMIA 16 Bible Online

JEREMIA 16 - Pochuri Naga bible

JEREMIA 16

¹VÜWA zhü hi vü rutaji

²noh tü azhie hala nüh vüvüh küviwa nyu, nyutü atsa nyimpari nyutü atsa vühri künguwa nyu,

³küpakenühnyunü atsa nyimpari thi atsa vüh azhie hala nüh küwuori, mari kümoh azahri thi azhih hala nüh mari küsiera apari kenüh VÜWA nüh hakümjie küza:

⁴Mari tü küsüra küna vünüh süm naveh. Mari tü kürüma nyu, nyutü mari tü küchowa nyu; mari tü azhito rügi vü asü kümjie sam naveh. Mari tü anyuchuwa vünüh thi kümkhuoji vünüh pokahm naveh, thi mari kümo tü amürhü vü amüwari thi azhih vü samwara shie sam naveh,

⁵küpakenühnyunü VÜWA nüh hakümjie küza veh: Küshükheke zheh lovü mütu tüm luo, nyutü kürümuo vü müwa tüm, nyutü makeri nüh mkrie tüm, küpakenühnyunü hi nüh hamari vünüh eh luovehkürüzi wa eh mükükhaphrükhale küümze thi noküümze viteküwa thuoh kenüh.

⁶Aküzahwa nga thi aküjiwa nga azhih hala nüh sü naveh; mari tü küchowuwa nyu, thi nyi küsü nga makeri’a nüh kürümuowa nyu nyutü mari kenüh nyi küsü nga ma mpa ma satsa kürhephiewa nyu, nyutü alü küümthawa nyu.

⁷Küshükhekera kenüh nyiküsü nga ma luoveh sakürüzi nta alohse küphrikhuowa nyu; nyutü küsü nga nüh ma pa kenüh nyutü ma zah kenüh küünyi ahuo tsü küüzhuwa nyu.

⁸Noh tü akhu sa küvehra zheh vü tsa thi zhu nü mari sie shu peh nti müwa tüm.

⁹Küpakenühnyunü Israel Saküüwuowa, VÜWA nüh hakümjie küza veh: Halie, hi nüh azhie hala nüh noh nothari thi noh tsothori atü vü nüh loküzhe jikhi, aloküwie jikhi, kümnyutepawa jikhi, thi kümnyutevühwa jikhi ti küükhetem na küveh kenüh.

¹⁰Thi nohri nüh azhü hamari aveh vi anyi hamari vü küza nü mari nüh nohvü, “VÜWA tü mokenüh hiri vü kümsü küji hama phrateketsü nalo? Hiri künakhie mowa lo? VÜWA hiri Saküüwuowa vü hiri tü mowa kükhiemuo sam lo?” ta thuoüji,

¹¹noh nüh mari vü: “Noh pari nüh hi kuleküm kenüh thi nyiaza küpara sevü tewa nü mari kütsü sanü mari khurü, hi kulem nü eh khonyo mükümzhe kenüh, ta VÜWA nüh küza

¹²thi nohri nüh noh pari nyieh vünüh kümsütsawa saküm kenüh, halie, nohri nyi küsüsü nga papara müküzike kümsü müzhe taji hi müküna nta sa;

¹³jükenüh hi nüh azhih hala nüh nohri nga thi noh pari nga müküthsü azhih vü thejam naveh, jütisanü jüla nüh nohri tü rüza rüne nyiaza küpara kütsü sapeh naveh, küpakenühnyunü hi nüh nohri vü küütso müküütsawa nüh sana küvehthuoh kenüh,” ti küza.

¹⁴jükenüh, halie, “VÜWA Israel nyiri Egypt zhih vünüh siezhu küruwa rhoküveh üta,” ta müküüza le arülori tü tetsethuoh, ta VÜWA nüh küza,

¹⁵thitü “Zhietü nyuji wuovü nüh thi ma nüh mari zhejaküm nyuji ri aveh wuovü nüh Israel nyiri sie zhu küru VÜWA rhoküveh üta,” küpakenühnyunü hi nüh ma pari vü kütsü mari mpa zhih vü sieshele ru na küvehkenüh.

¹⁶Halie, hi nüh anga kütieri hozake küze vehthuoh; thi mari nüh jümari re naveh; thi jüma sevü thuoüji hi nüh asa küüzhuri hozake küze naveh, jütisanü mari nüh aküzhi aveh vü, küzhiho aveh vü thi alokhu vü nüh ti mari küzhuphah naveh,

¹⁷küpakenühnyunü eh notha, tü mari aleh aveh vü pehveh; mari tü hi vünüh küthi müsa, nyutü mari künakhie tü eh notha vünüh mü küzhüwu.

¹⁸Thi hi nüh nori künakhie thi kükhiemuo tü künyikeri keluotsü naveh, küpakenühnyunü mari nüh mari anguo kürhorha kümori vi nü eh zhih sakümne kümthuoh kenüh, thi mari kükreri vi nü eh ka saküpromthuoh, ta küza.

¹⁹O VÜWA, eh kükhrawa thi eh kütotewa, küsüro rülo vü eh kümnyipe, azhih küpote vünüh akuoküjiri noh vü ru nü: “Eh pari nüh kürie küchie nüh küpa mviru, azah mkütsa ame mkünyie zanyori aka saru.

²⁰Anyiri tü mampa ma kenüh nyiaza saranaveh ülo? jümari tü nyiazari nyu,” ta küza naveh.

²¹“Jükenüh, halie, hi nüh saküüthsü naveh, hi nüh eh kümzho thi eh kükhra saküüthsü naveh, thi mari nüh eh nyo tü VÜWA ta küsa thsü naveh,” ti küza.