Read Pochuri Naga JEREMIA 17 Bible Online

JEREMIA 17 - Pochuri Naga bible

JEREMIA 17

¹Judah kükhiemuo tü amürü kürhüvü, sakhu thsopo nüh luoveh lokhie rügi vü, thi mari kükhurüpera rütsüri rügi vü khrüke saveh,

²mari tsari nüh mari kükhurüperi thi mari Asherim, athsoh rhu kümzhi aveh, thi küzhiho kümsieri kümshepe vü,

³anyu alie aküzhiri vü. Noh künyirhieri thi noh meri aveh hi nüh nohri natonahuori aveh vü nohri kükhie ame kümjie vünüh zhechieküvi saküzem naveh.

⁴Hi nüh nohri vü kütsü azhieh akaküvi vünüh hi nüh nohri ake lejamtü naveh, thi noh ri nüh müküthsü azhih vü nohri mükünongüra kütsü küüsam naveh, küpakenühnyunü eh rüküshu vünüh sasana küveh kenüh.

⁵VÜWA nüh hakümjie küza veh: “Anyi thawa nüh anyiri vü alehno thi asazüh vi ma kükhra satse nüh, thi VÜWA vünüh ma luoveh sühle teküwa watü, müzümthuoh.

⁶Ma tü küpohu vü apra küsü kümjie wie, thi kümhie küsü nga küru künguwa nyu. Matü reza achüji azhieri vü kürho sanaveh, mükürhie amütsü zhih küsü vü rho naveh.

⁷Thawa nüh VÜWA vü alehno veh ünüh, VÜWA vü lehkünowa tü kümngatsawa.

⁸Ma tü ajuh kütuoh vü athso küsü shie küsa kümjie, jüma tü akuza kütuoh vü arüzohri shi küüzewa wiethuoh, thi aküsa küru vü nga mükrü, küpakenühnyunü ma nyawari tü müzhi küpeh huo kenüh, thi atso mkürü vü nga mütsaza, ma tü avi küpe müküütuo kenüh,” ti küza.

⁹Azanyo aveh nyieh vü aluoveh tü amizhi kümsütsawa, thi küütsaküsüh nü müsümü; thawa nüh jüma thsümshira na lo?

¹⁰Hi VÜWA tü amüshe rühtso thi luoveh müte, anyiri aveh vü nga ma lehkhujiwa müzhe nü tsü nta, ma nüh küsa avi küperi müzhe nü tsü nta, ti küza.

¹¹Amüla nüh ma nüh mükühie azah küsazhuh kümjie, nyi küsü nüh aleh mükünyu vünüh küngu tü jüüta wie; ma rülo aphala vünüh jü mari tü ma jam naveh, thi ma kürho sehkhe vü thuoüji ma zanyo mküthsüri küsü samna thuoh.

¹²Atükhu vünüh kümsie rügivü kütholathovü kükajipe küsakewa tü hiri kümtsezheh azhiewa.

¹³O VÜWA, tü Israel küluozhewa, noh kükuleri aveh tü küzükrü vü thsem naveh; noh vünüh sühle teküwari thuoüji azhih vü rhüke sanaveh, küpakenühnyunü mari tü VÜWA kulekümthuoh kenüh, rhoküpeh juh küwazhu wa.

¹⁴Hi sakümhietsüluo, O VÜWA, jüta thuoüji hi tü sakümhiem na thuoh; hi külole luo, jüta thuoüji hi tü külolem na thuoh; küpakenühnyunü noh tü eh küsiakewa küsa kenüh.

¹⁵Halie, mari nüh hi vü, “VÜWA zhü tü khiela pehveh lo? Jümatü küüru luo,” ti küza.

¹⁶Kümsüwa küze üti hi nüh noh müküchü, nyutü müngukümsü rülo mümngu, noh nüh thsü veh; eh po vünüh shu küruwa tü noh nyieh atüvü pehveh.

¹⁷Hi vü samküümzhoh tümluo; kümsüwa rülo vü noh tü kümnyipewa.

¹⁸Hi kümnomna kütsüri tü küzükrü thsem luo, thitü hi nü küzükrü vü müthse tümluo; mari tü luoveh küüzam luo, thitü hinü luovehmküüzah tümluo; mari rügi vü rülo kümsüwa viru luo; künyikeri küzorie nüh mari zoriem luo.

¹⁹VÜWA nüh hakümjie hi vü küza: wa nü Benjamin kheri vü tsie luo, jüma vünüh Judah kajiri tü tu thi shuwa ti sasati, thi Jerusalem kheri aveh vünüh,

²⁰jütisanü, VÜWA zhü künaluo, nohri Judah kajiri thi Judah aveh, thi Jerusalem vü arhieri aveh, akhiri hamari vünüh küturi.

²¹ Noh kürhori kenüh kükhe luo, thi kümnyirülo vü akhuo küsü nga müvü tüm nyutü Jerusalem kheriri vünüh vi küturu müsa tümluo.

²² Kümnyirülo vü noh zhehlori vünüh akhuo küsü nga küvü zhu müsa tüm, nyutü küüroh küsü nga müsa tüm, thitü kümnyirülo tü kümtse saluo, hi nüh noh pari vü azhükütsü üta.

²³Tü mari tü müküna, nyutü mari khüna mümrheke, thitü mari aku khroke, jüta küsa vünüh mari tü müküna nüh sa thi küsüphie mü vi.

²⁴“Thitü VÜWA nüh, nohri nüh eh zhüküna, kümnyirülo vü anyuji hamawa kheriri vünüh akhuo vü müturu nüh sataji kümnyi rülo wa kümtse sa thi jüma rülo vü küüroh küsü nga müsa,

²⁵ti thuoüji David kükajipe rügi vü shuküpeh ri tü anyuji hama kheriri vünüh mari nga, mari kajitsari, Judah nyiri, thi Jerusalem vü arieri ti rawuh khekari thi arawuhri rügi vünüh turu naveh; thi anyuji hama tü küsuokürho rhiepehm na thuoh.

²⁶Jütisanüh anyiri tü Judah nyujiri vünüh, Jerusalem nato nahuo azhieri vünüh, Benjamin azhih vünüh, Shefela vünüh, küzhiho anyu vünüh, Negeb vünüh kütso kükhururi thi küsahthuori, atha vinü kükhurüri thi rheküünguri, thi kümnakütsü kükhurüri vi nü VÜWA zheh vü ru naveh.

²⁷Thitü nohri nüh eh zhü müküna thi kümnyi rülo wa kümtse müsa, thi kümnyirülo vü Jerusalem kheriri vü akhuo vü nü müturu ra küsa müküna ti thuoüji hi nüh ma kheriri vü anyih tsoküze naveh, jütisanü jüma nüh Jerusalem kajizheri aveh küüzorie naveh thi pemküne nüh sanaveh,” ti küza üta, küza.