Read Pochuri Naga JEREMIA 18 Bible Online

JEREMIA 18 - Pochuri Naga bible

JEREMIA 18

¹VÜWA vünüh Jeremia vüküru azhü:

²“Süra nü küfüküsa wa vü tsuo luo, hi nüh noh tü jüla eh zhü küüna naveh ünüh,” ti küza.

³Jükenüh hi tü küfüküsawa zheh vü tsuo, thinü ma tü ma shohküzhevüh nüh küroh la.

⁴Jüti küsa vü anyisa nüh aküjü saküvehwa tü küfüküsawa ke vünüh samsüm, thi ma tü aküjü küpa sa le, jüta küsa tü ma küfüküsawa kenüh kümpha üta küsa kenüh.

⁵Thinü VÜWA zhü tü hi vü ru taji:

⁶“O Israel zhehlowa, hi tü küfüküsawa nüh küsa üta noh vü müsa ra ülo? ta VÜWA nüh küza veh. Halie, anyisa nüh küfüküsa wa kevü küpeh kümjie noh tü eh kevü pehveh, O Israel zhehlowa.

⁷Mükütüküzü tsotho muomuo vü nga hi nüh akuoküji küsü kenüh nyutü kajipe küsü kenüh hi mütathuo, zoshi thi zorie nta küzazhu,

⁸mükütüküzü hi nüh küphrazhuwa kuohji nüh ma kümsüwa vünüh sühle thuoüji hi nüh kümsü sa nta küsa vünüh khaphrü naveh.

⁹Thi mükütüküzü atstho muomuo vü nga hi nüh akuoküji küsü kenüh nyutü kajipe küsü sake thi shie nta hi nüh küzazhu thuoüji,

¹⁰thi mükütüküzü jüma tü eh jikhi müküna nüh eh notha vü kümsü sam thuoüji, hi nüh kümhie sa nta kümshewa khaphrüm naveh.

¹¹Khinyi jükenüh, Judah nyiri thi Jerusalem arhieri vü; VÜWA nüh hakümjie küza veh, Halie, hi nüh noh vü kümsüwa rhieke veh thi noh vü kürüzhe küsü msheveh. Sühle luo, anyiri aveh nga papara kümsü aleh vünüh, thi noh lehkhujiri thi noh nüh küsari vünüh khaphrü luo,” ti küza.

¹²Thitü mari nüh, ‘Jümatü müjuju wie! Hiri tü hiri mpa hiri kürüzhe müzhe naveh, thi anyiri aveh nga papara luoveh kümsüwa müküzike müzhe nü sa wie naveh,’ ta küza.

¹³“Jükenüh VÜWA nüh hakümjie küza veh: akuoküjira azhie vü künaluo, thawa nüh hama kümjie künarathuo lo? Israel mükürüsawa nüh zanyo kükrüküngo samthuoh

¹⁴Lebanon müra tü Sirion küzhiho jam naveh ülo? Aküzhiwa juh tü küweh tewa veh ülo? küüji liküvehwa tü keweh tewa veh ülo?

¹⁵Thitü eh nyiri tü hi kümamthuoh, mari tü mari nyiazari vü sierhe tsotsü; mari tü mari lehkhujiri vünüh müshümthuoh, lanyira lehri vünüh, thi alerü vü müwa nüh samthuoh,

¹⁶mari zhih tü küüzophake küsü samthuoh, küsuokürho küzaküümsü zanyo küsü samthuoh, jüma rukari küwa aveh tü küükrüküngom thuoh thi alü küzemthuoh.

¹⁷Mükünongüra tüvü hi nüh zhieshu mürhü kümjie sariem naveh. Hi nüh mari vü eh nyieh nyunü eh seru kütsanaveh, mari kümsü rülo vü,” ti küza.

¹⁸Thinü mari nüh, “Raluo, hiri kürü Jeremia vü aro kümsü sanüh, aküthsüwa vünüh küzhüphiewa tü küüpokahwa nyu, nyutü azhüwa tü setsaküthsüwa vünüh küüpokah wa nyu, Raluo, hiri azhü vünüh ma sie kürünyuo ünüh, thi ma zhü küsü vü nga mükükhe nüh sa ünüh,” ti küza.

¹⁹Hi vü tsake luo, O VÜWA, thi eh kükhuo künatsüluo.

²⁰Kümsüwa tü kümhie kenüh noshe veh ülo? Mari tü eh kürho küphieke küsü chühmthuoh. Mari kenüh kümhie küza nti hi nüh noh tüvü mokümjie tsie nüh müsheke luo, mari vünüh noh rükümtho sühletewa na küsa kenüh.

²¹Jükenüh kümkhuoji vü ma tsari vizhuwaluo; mari vi anyuchuwa kükhra vü tsüm luo, ma vüvühri tü atsa kümkuhm luo thi kütünyim luo, ma nyiri tü künakükho aküsü kümtu luo, ma küvizari tü arie vünüh anyuchu nüh küürehthem luo.

²²Ma zhehri vünüh aküzie küüna raluo, zhürüluo mari vü arieri küru vü! küpakenühnyunü hi re nta mari nüh küphieke küsü chüküm thuoh kenüh, thi eh jih kenüh küjurü sakhesa.

²³Tü, noh nüh, O VÜWA, hi rethe nta küsa mari aroküphah aveh thsü veh. Mari künakhie nomja tümluo, nyutü noh notha vünüh mari kükhiemuo kürüzhu müja tümluo. Mari mpa noh tüvü küüvijakem luo; noh rüküzhu tsotho vü mari vü saluo.