Read Pochuri Naga JEREMIA 2 Bible Online

JEREMIA 2 - Pochuri Naga bible

JEREMIA 2

¹VÜWA zhü tü hi vü ru nüh,

²Wa nü Jerusalem küünara vünüh zhüchüh luo, VÜWA nüh hakümjie küzaveh, hi nüh noh küviza kütsotü müsheke veh, noh külo kümnyutevüh üta, noh mokümjie areza vü eh semüzhe nüh, zhuh müküsa azhih vü.

³Israel tü VÜWA vü mütha, ma nüh kümahwie avi apokhuwa; Mavi kütsari aveh tü teru, ta VÜWA nüh küza.

⁴VÜWA zhü küüna luo, O Jacob zhehlori, thi Israel zhehlo tharuo aveh nga.

⁵VÜWA nü hakümjie küza veh: “Noh pari tü hi vü mowa nü küleh nga nü mari tü hi vü nüh kietuote wa thuoh lo, thi momaküsa asevü nyitewa nü momaküsa samthuoh lo?

⁶Mari tü, Egypt zhih vü nüh hiri sie zhuküru VÜWA tü khiela peh lo, reza vünüh hiri lehkhuji küjokütsü wa, küpohu thi küpieke zhih vünüh, atso mkürüzhih vü thi küzo müthsüthsü azhih vü, nyi küsü nga tseshukari müküsa, nyiküsü nga mükürhope vünüh hiri siezhu küruwa tü khiela pehveh lo,” ta müküza ülo?

⁷Thi nohri tü ma viri thi ma zanyo kümhieri vi küülora nti khielota küzhi azhih vü sieru Thitü nohri nüh küturu vü nohri nüh eh zhihwa sakümnomüna tü thi eh rhie tü akükre küsü küsam.

⁸Nasari nüh, “VÜWA tü khiela pehvehlo” ta müküna. Khonyo küüjehri tü hi müthsü nüh sam; tarüri nüh hi küphrürie sam; setsaküthsü nüh Baal vünüh setsaküthsü zhü phram, thi akünyia mükünyie zanyo ri ase müzhe te wa.

⁹“Jükenüh khinyi nga hi tü nohri siekürükhrü luo veh,” ta VÜWA nüh küza, thi hi tü nohri atsa tsa küjie kürü khrüüluo naveh.

¹⁰Küpakenühnyunü Saipras azhih kari nü noluo, nyutü Kedar vü küze nü azhüküzhü ti noluo; mükütüküzü jüüta küsa zanyo pehveh ünü nyu nüh noluo.

¹¹Akuohjiri tü mari nyiaza khaprüm thuonü nyu nüh, Thitü eh nyiri thuoüji mari kutholathovü vi akünyia mükünyie müzhimthuoh.

¹²No nü krüluo, O atülüri, hamawa vü, ngothse luo, küüzoküza sasheh luo, ta VÜWA nüh küza,

¹³Küpakenühnyunü eh nyiri nüh kümsü künyi sakümthuoh kenüh: mari nüh hi kulemthuoh, kürho juhri küwuzhuwa, thi mari mpa makeri’a nüh ajuhku phie, ajuhku küpie, ajuh müküüjora.

¹⁴Israel tü tükha küsie ülo? Ma tü azheh lovü nüh küwuo küsü ülo? Thinü ma tü mokenüh kütsakütseri küsü sam lo?

¹⁵Amiewuori nüh ma vü khumthuoh, mari tü zie nü khumthuoh, mari nüh ma zhih tü jaküm küsü samthuoh; ma nyujiri tü küferie vü pehmthuoh, mürhie nüh.

¹⁶Jü mpa mükünyu, Memfis thi Tahpanhes nyiri tü nohri kajilüwa zokhuomtüthuoh.

¹⁷Aleh vü ma nüh noh küjo siekütse vü VÜWA noh Saküüwuowa kükule vü nüh nohri mpa nüh hama vi noh rügi vü müru ülo?

¹⁸Noh tü Egypt vü küwa vünüh mowa nyie ralo, Nile juh zhu nti wa ülo? Nyutü Assiria vü küwa vünüh mowa nyie ra lo, Eufrates juh zhu nti wa ülo?

¹⁹Noh kümsüküsanüh noh phrasosie naveh, thi noh hi ja nü teküwa vü nüh noh küjo naveh. Noh kenüh VÜWA noh Saküüwuowa kule na küsa tü kümsü thi akükho ti küsa thsü thi nga luo; hi kükrü tü noh vü tüm veh, ta VÜWA Saküüwuowa nüh küza veh.

²⁰Khana vünüh noh tü noh thsoh khuonyiwa zokhuom nü noh küphehteri zothuom; thinü noh nüh, “Hi nü akütsü küsawa nyu”, ta küza. Ah, küzhiho kürügi aveh vü thi athsoh kümzhi kükhu aveh vü küüphroküphrie ri üta küngie tsuo.

²¹Tü hi nüh noh tü rhelivi rhu kürüka küsü sanü shie, atha kümjie küsü vünüh. Thinü mokümjie nüh noh tü müküsho sa thi ato rhelivi küsü samthuoh lo?

²²Noh tü noh mpa nüh akhurhie vinü thsewie ketünga thi amashie khielota vi khrü wie nga, noh künakhie mkümtse tü eh tüvü pehm wie thuoh, ta VÜWA Saküüwuowa nüh küza.

²³Noh tü mokümjie vünüh, hi nü samkümne, hi tü Baalri ase nyi müwa, ta phrahte ra na lo? anyuo vü noh leh noküze luo; noh nüh mowa samthuoh ünüh thsüluo, kuosuosa azeh kümro küsü nüh ma jinyipe kümthsümphuo üta,

²⁴ato rawuhküzawa reza vü kütse üta, ma satsa küsa vü amürhü kürhenü. Thawa nüh ma kümngu khetera na lo? Ma müviji mkümhie phahküwari nyi küsü nga münotemwa; ma sa vü mari tü ma phara naveh.

²⁵Noh mphaju müküsa tümluo thi noh khuru tü küürieh vünüh müpeh tümluo. Thitü noh nüh, jümatü momaküsa, küpakenühnyunü hi tü anyitheri loküm thuoh kenüh, thi hi tü mari a senyi tewa na thuoh; ta küza.

²⁶Kürühuri küsü nüh rera thuoüji küzükrü üta, Israel zhehlori tü zükrü wie na thuoh: mari nga, mari kajiri nga, mari kajitsari nga, mari navüri nga, thi mari setsaküthsüri nga,

²⁷mari nüh athsorhie küsü vü, noh tü hiri apa; ta küza, thi aloh vü, noh nüh hi wuotsü; ta küza, küpakenühnyunü mari tü mari seru hi vü küprükekümthuoh kenüh, mari anyieh thuoüji hi vü müküprüke. Thitü mari küsüro tsotho vü thuoüji mari nüh, “Süra nü hiri külole luo,” taküza.

²⁸Thitü noh mpa nohke nüh saküsa noh nyiazari tü khievü tewa thuoh lo? Mari tü küüsüraluo, mükütüküzü mari nüh noh külolera naveh üji, noh küsüro tsotho vü; küpakenühnyunü noh nyiji küzake nüh noh nyiaza nga jüake nü, O Judah.

²⁹Noh tü mokenüh hi vü jakhujazhiveh lo? nohri tü aveh eh zhü mküna nüh sam, ta VÜWA müh küza.

³⁰Hi nüh müjuju vünüh noh tsari fethe, mari tü saküümsho müvi nü sam; nohri nyusuowa mpa nüh noh setsaküthsüri rethem amiewuo kümüsüwa küsü kümjie.

³¹Thi noh, O awulehri VÜWA zhü vü tsake luo, Hi tü Israel kenüh areza küsü sa ülo, nyutü mokenüh eh nyiri tü, ‘Hiri nü rüzimthuoh; ta küza vehlo, hiri nü noh vü kürulewa nyuthuoh, ta küza veh lo’?

³²Rülavü küsü tü ma süriesüvo küma mhie veh ülo, nyutü kümnyutevüh küsü nüh ma süriesüvo küma mhie veh ülo? Tü eh nyiri thuoüji arülo müküürüh rhüra hi kümamthuoh.

³³Noh tü küzakele mühie nü noh küjo vitaji akülori phah nti lo! Jüti sanü noh nüh noh lehkhujiri vi kükhurükhurüvüri sosiem thuoh.

³⁴Jüsevü nga mükünakhie kümkhuora kürhozüh noh thsüri vü nüh ngura thuoh; Noh tü jümari nü rühuküveh müngu. Hata wie ketü nga

³⁵noh nüh, ‘Hi tü mküle münyie; ma rüküshu tü hi vünüh süte wa thuoh; ta küza. Halie, hi nü mükhiemuo,’ ta küza kenüh hi nüh ashih vü sieru naveh.

³⁶Noh tü mokümjie nüh noh lehkhuji khaphrü nü müphieshe taji kelekeze tse lo! Assiriari nüh noh saküüzükrü üta noh tü Egyptri nüh noh saküzükrü naveh.

³⁷Jümawa vünüh noh tü noh ke noh lü rügivü sanü tewa wienaveh, küpakenühnyunü VÜWA tü noh nüh aleh küno wa kulejakümthuoh kenüh, noh tü jümari vünüh mütsarhiera.