Read Pochuri Naga JEREMIA 20 Bible Online

JEREMIA 20 - Pochuri Naga bible

JEREMIA 20

¹Jüti küsa vü Immer atsa navüwa Pashur, VÜWA zheh vü levü küjiwa tü Jeremia nüh zanyo hamari setsaküthsüzhüphra veh ta küsa küna ra.

²Thi nüh Pashur tü setsaküthsüwa Jeremia fe nü VÜWA zheh Benjamin kheri wiehwa küphete lovü thsem.

³Rülo künyiawa Pashur nüh küphete vünüh Jeremia küshieküm vü, Jeremia nüh ma vü, “VÜWA nüh noh nyo tü Pashur ta müji, thitü aveh vü nüh Müzoh ta ji naveh,

⁴küpakenühnyunü VÜWA nüh hakümjie küza veh: Halie, hi nüh noh tü noh mpa noh wie nga thi noh jüri aveh vü nga kümzhohm na küveh kenüh. Mari tü noh nüh mari noküveh vünüh mari mükünongüra nyuchuwa vünüh Judah külum na küveh kenüh. Thi hi nüh Judah aveh vi Babilon kajiwa ke vü thsem naveh; thi ma nüh mari revi Babilon vü wa nü anyuchuwa vi nü mari rehthem na küveh kenüh.

⁵Jümanyie vü nga, hi nüh anyujiwa künyirhie aveh, ma nüh künyiera aveh, ma nüh kürhe tsokrü aveh, thi Judah kajira künyirhieri aveh vi mari mükünongüra ke vü thsem naveh, jümari nüh mari müzhüvü, thi mari retevi nü mari sie Babilon vü tewa naveh.

⁶Thi noh, Pashur, thi noh zheh vü kürhori aveh tü reviteküwa Babilon vü nohri tü tewa na thuoh; jülanü nohri tü süm nü noh thi noh füri aveh, noh sie nü rie taji setsaküthsüzhü küphrari aveh jüla nüh chohwum naveh,” ti küza.

⁷O VÜWA, noh tü hi müramzhim thuoh, thi hi tü müramüzhiküm samthuo; noh tü eh nyieh vünüh müzho, thi noh nüh cham thuoh, hi tü arülo aveh vü riesaküükhri küsü samthuoh; nyiri aveh nga hi riesarienyim thuoh,

⁸küpakenühnyunü hi nüh azhüküphra vü hi tü zie taji, “Küvürie thi küzorie,” ta zia! küpakenühnyunü VÜWA zhü tü eh kenüh rülo aveh vü saküüzükrü thi küriesa küsü sakümthuoh kenüh.

⁹Mükütüküzü hi nüh, “Hitü ma nyo küphratewa nyu, nyutü ma nyo vünüh küphrahte lewa nyuthuoh,” ta küza wie ketünga, eh luoveh lovü tü anyih tsoküveh kümjie eh rüri lovü nüh sotem, thi hi nüh jüma tü alovü nüh müküzhira thuoh, hi nüh jüma tü müsara wie thuoh,

¹⁰küpakenühnyunü anyi hozake nüh zhüwe küveh hi küünara kenüh. Awuowuo kükrüküngo peh! “Ma jamüluo! Hiri ma jamüluo nüh raluo,” ta eh küthsüluori aveh nüh küza, mari tü hi küülu nopeh. “Ma tü müra mzhi mühiem nü, jütathuoüji hiri tü ma nyiehvü wa ra naveh, thi ma lüvü hiri shewi sara na küveh kenüh.”

¹¹Thitü VÜWA tü arieküsari nokükrü nyiri kümjie eh lovü tü veh; jükenüh hi küm, nomna sakütsüri tü müshüm naveh, mari tü eh nyievü müwa ra, mari tü zükrü shehm naveh, küpakenühnyunü mari tü müsara nüh sam na küveh kenüh. Mari küsükürho müküchiekürhe tü piketü küümawa nyu.

¹²O shuohjira VÜWA, künyitsa kümtewa, luoveh thi amüshe künyuwa, noh nüh mari vü amüthoh küsawa hi küüngu luo, küpakenühnyunü hi nüh eh kürho noh vü phrake kümthuoh kenüh.

¹³VÜWA vü azah satsüluo; VÜWA siakeluo! küpakenühnyunü ma nüh kümsüküsari ake vünüh küthotsari kürho vizhu kümthuoh kenüh.

¹⁴Hi küwuo rülo wa tü kümzüwa saluo! Eh zah nüh hi küwuo rülowa tü, akütsia müküüngu tümluo!

¹⁵Eh pa vü zhüthe vi küru anyiwa tü kümzüwa saluo, “Atsa nyimpari küsü noh vü wuotsüthuoh,” ma losaküwie sheh taji.

¹⁶Anyi jüma tü VÜWA nüh norüthaküna münyie wiethuoh nüh anyujiri vijaküm kümjie sam luo; matü arüne vü aküzie küünaraluo thi arülovü küüjükülo küüna raluo,

¹⁷küpakenühnyunü ma nüh eh zah volo vüh hi müküzothe kenüh; jüta sanü eh zah tü eh rüku sanü ma vo tü küsuokürho mükürho müküüji nüh.

¹⁸Hi tü kümnomna thi luoveh küna küüno nta mokenüh avo lovü nüh shuru lo, thi küzükrü vünüh eh rülori tü küze veh lo?