Read Pochuri Naga JEREMIA 22 Bible Online

JEREMIA 22 - Pochuri Naga bible

JEREMIA 22

¹VÜWA nüh hakümjie küza veh: Judah kajiwa zhehlo vü tsuo nü jüla azhü hama küza luo,

²David kükajipe rügi vü shuküpehwa O kajiwa Judah, noh, thi noh sieperi thi noh nyiri akheri hamari lovü küturi VÜWA zhü künaluo.

³VÜWA nüh hakümjie küza veh: Kümsho thi künyitsa vünüh satsü nü mürateküwari kümrüra ke vünüh vizhu luo. Thi anyilieri, mürari, thi tünyivühri vü müküleh nyutü küvürie müsa tüm, nyutü azhie hama vü mükünakhie azhüh müküthü tümluo.

⁴Küpakenühnyunü mükütüküzü nohri nüh azhü hama küna thuoüji azhe hama akheriri vünüh David kükajipe rügi vü shu küpeh kajiri rawuh kheka thi rawuh rügi vü shupeh nü mari nga, mari sieperi nga thi mari nyiri nga ti tu naveh.

⁵ Thitü mükütüküzü nohri nüh azhü hamari vü mükheke thuoüji hi nüh hama tü jaküüzoküzam naveh, ta VÜWA nüh küza,

⁶küpakenühnyunü Judah kajiwa zhehlori kenüh VÜWA nüh hakümjie küza veh: Noh tü hi vü Gilead kümjie thuoh, Lebanon küzhihotsuwa kümjie; thitü hi nüh noh tü küpohu küsü küsam naveh ti küshie mthuoh, mükürhie nyuji küsü sam naveh.

⁷Hi nüh noh küzorie küche naveh, mari senyusevi aveh vi nü; mari nüh noh müsethsuo kümhietsari shüchiem nü anyih lovü thsem naveh.

⁸Akuohji hozake anyuji hama rukari wa naveh, thi mari tü küsü nüh küsü vü, VÜWA tü mokenüh anyuji hamawa vü hakümjie vünüh sam lo? ta sanaveh.

⁹Thi mari nüh, “Küpakenühnyunü mari nüh VÜWA mari Saküüwuowa kütsathuoh zhüwa kulem nü nyiaza küpari khurü thi mari kütsü sa küm thuoh kenüh ta,” küza.

¹⁰Sükümwa kenüh mükrie tümluo, nyutü ma kenüh lo mrütümluo; jüüta nyunü kuoteküwa kenüh krie luo, küpakenühnyunü ma tü ma totsa azhih wa no nta küsühle wa nyu thuoh,

¹¹ küpakenühnyunü VÜWA nüh Judah kajiwa tsa Shallum, ma pa Josiah müthoh vünüh küturu wa, azhie hala nüh teküwa wa kenüh küüza: Ma tü hala shele kürulewa nyuthuoh,

¹²thitü mari nüh khievü ma revitewa thuoh ünüh jüla nüh ma tü süm nathuoh, thi ma tü azhih hama piketü küngu lewa nyu thuoh.

¹³Mükünyitsa vünüh ma zheh küsawa vü, thi mükümsho vünüh ma zhe kürieke küsawa vü, zanyo küsü nga mükünyu vünüh ma zhephruri küünoh nü mari kümlie mükütsüwa tü kümhie küsara küthsüna;

¹⁴ma nüh, hi nüh eh kenüh kümsie aküji azheh küsü sanaveh, ta küzaveh nüh, thi ma nüh jüma mürhielepie zophie, müsethsoh vi nü saküüzhu, thi thseküümru sa.

¹⁵Noh tü müsethso nüh sara ti küsa kenüh noh tü kajiri küsü ülo? Noh pa tü tsa thi zhu nü kümsho thi künyitsa müsa ülo? Jüta thuoüji ma tü mühiemthuoh.

¹⁶Ma nüh kümkhuori thi küthotsari müshekükatotsü; thi jüma tü mühieküm sa. Hamatü hi thsü na küsa nyu ülo? ta VÜWA nüh küza.

¹⁷Thitü noh notha thi aluoveh tü noh müküchiekürho künyie mpa wie, mükünakhiera züh küüthü kenüh, thi kümrü thi küvürie küüroh kenüh wie.

¹⁸ Jükenüh Josiah Judah atsa kajiwa Johoiakim kenüh VÜWA nüh hakümjie küza: mari tü ma kenüh kürümuowa nyu, mari nüh, ‘Ah eh jie!’ nyutü ‘Ah eh nü!’ ta sanaveh. Mari tü ma kenüh kürümuowa nyu, mari nüh, “Ah vüwa nyutü ma kümsiewa,” ta sanaveh.

¹⁹Ma tü rawuhküzawa küchowupe vü chowu naveh, Jerusalem akherivi tuwuovü newa nü alievü jam naveh.

²⁰Lebanon vü khru nü zie luo, thi Bashan vü rietsiluo; Abarim vünüh zie luo, küpakenühnyunü noh külori aveh tü nehnya kümthuoh kenüh.

²¹Hi nüh noh kütsarhie kenüh küza, thitü noh nüh, “Hi nü küüna wa nyu,” ta küza. Hamatü noh küviza vünüh noh lehkhuji sateru, küpakenühnyunü noh nüh hi müküna nüh sateküru kenüh.

²²Amürhü nüh noh nyihnyihkühuori tü huonaveh, thi noh külori tü reviteküwa vü tewa naveh; jütisanü noh tü zükrüm naveh thi luovehzam naveh noh kümüsü aveh kenüh.

²³O Lebanon vü arhieri, amüse azhie vü aphra samthuoh, noh vü zi ta küru vü noh tü küzakele lüche na lo, krevühri atsaküwuo küna üta küru vü!

²⁴ Hi nüh rhoküveh üta, ma mpa nüh mükütüküzü Jehoiakim Judah atsa kajiwa Konia tü eh ke azhie wuovü tsüke tüjükhe sa wie ketünga hi nüh jüla nüh noh shoriem wie naveh,

²⁵thi noh vi noh kürho phahkütsewa ke vü, noh nüh kükrüra ke vü, jümpa mükünyu Babilon kajiwa Nebukhadnezzar thi Khaldeara ke vü nga thsem naveh.

²⁶Hi nüh noh zah noh küwuowa vi noh müküwuope nyuji vü thejam naveh, jüla nüh noh sü tü süm naveh.

²⁷Thitü mari tü nüh sheleru nta kümngu azhihwa vü shele mürura.

²⁸Konia hamatü kuleküm küfü kükuo küsü ülo, nyi küsü nga müküvingü ahuokhu küsü ülo? Mokenüh ma thi ma tsatori tü thejam thi mari nüh müküthsü azhih küsü vü zhejam lo?

²⁹O azhih wa, azhihwa, azhihwa, VÜWA zhü küna mo!

³⁰VÜWA nüh hakümjie küza veh. Anyi hamatü atsamkünyiewa ti zhüke luo, ma rülo vü müküsara anyi wa; küpakenühnyunü ma tsatorira nyiküsü nga David kükajipe vü küperi küsara wa nyu, thi Judah vü takrü küsawanyu.