Read Pochuri Naga JEREMIA 23 Bible Online

JEREMIA 23 - Pochuri Naga bible

JEREMIA 23

¹Nyihzhükühuori anyihzhü kümrhuopevü pehküvehri zorie thi saküvorie ti küsari kümhiera kütsüna! ta VÜWA nüh küza.

²Jükenüh VÜWA Israel Saküüwuowa nüh nyihzhükühuori eh nyiri kühuori kenüh hakümjie küza veh: Nohri nüh eh nyihnyihri zheküvorie mthuoh, thi zhejamthuoh, thi nohri nüh mari müno nüh samthuoh. Jükenüh hi nüh nohri kümsüküsa kenüh nohri vü ru naveh, ta VÜWA nüh küza.

³Tinü hi mpa nüh eh nyihnyihri khiekhievü zhejamthuo ünüh kümtori sazhuh naveh, thi mari siekhuo vü sie ru naveh, jütisanü mari tü avipesheh thi zhiwa naveh.

⁴Mari huo na küsa akühuori nüh vizhu naveh, thi mari tü kükrülewa nyuthuoh, nyutü luoveh küzawa nyuthuoh, nyutü küsü nga küümiewa nyuthuoh, ta VÜWA nüh küza.

⁵ Hi nüh David kenüh künyitsa tsuona küsü vizhu na küsa, thi kaji küsü kümjie kaji sanü zanyothsü taji sanaveh, thi azhih wa vü kümsho thi künyitsanüh küronaveh ta küsa rülowa tü tsetsa wiethuoh, ta VÜWA nüh küza.

⁶Ma rülo vü Judah tü külole naveh thi Israel tü kütote vü rhora naveh. Thi ma tü anyo hama vünüh ji naveh: “VÜWA tü hiri künyitsa wa,” ta ji naveh.

⁷Jükenüh, “VÜWA nüh rhoküveh üta thawa nüh Egypt zhih vü nüh Israel nyiri sie zhuru lo,” ta müküphrate rülo tü tetsetsa wiethuoh, ta VÜWA nüh küza,

⁸thinü, “VÜWA nüh rhoküveh üta Israel azhehlora tsatori tü thawa nüh zhietü azhih thi ma nüh zhejaküm azhih aveh vü nüh küjosieru lo.” Jütisanü mari tü mari mpa ma zhihri vü rho na thuoh.

⁹Setsaküthsüri kenüh: Eh lovü nüh eh luoveh tü sanyahmthuoh, eh rü aveh küzhüveh thuoh; hi tü kümsheri küsü kümjie samthuo, akhah nüh ketekümri küsü üta, VÜWA thi ma zhü kümtsewa kenüh,

¹⁰küpakenühnyunü azhihwa tü nyimza nyimpa küsari proküm kenüh; kümzü kenüh azhihwa tü küluveh thuoh, thi tsamasa vü kümrhuoperi tü küwehmthuoh. Mari kürho tü müsümthuoh,

¹¹Setsaküthsüri nga thi anavüri nga münyitsa thuoh; eh zheh vü wie nga hi nüh mari kümsüküsa ngu, ta Vüwa nüh küza.

¹²Jükenüh mari lehkhuji tü makeri nüh aküzo vü lekhuji vü küücho kümjie sam nathuoh, mari tü jüla zhejaküze nü küülum n athuoh; küpakenühnyunü mari kümnomna mahvi vü hi nüh mari vü kümsü viru na küveh kenüh, ta VÜWA nüh küza.

¹³Samaria setsaküthsüri vü hi nüh mkükato zanyo ngu: mari tü Baal vünüh setsaküthsüzhü phra nü eh nyi Israelri lehkhuji küjozih mthuoh.

¹⁴ Thitü Jerusalem setsaküthsüri vü thuoüji aküngo zanyo ngu: mari tü küüphroküphrie sanü akürie vü tse; mari tü kümsüküsara ke sakükhratsütsüti, jütisanü nyi küsü nga kümüsü vünüh müshelera nüh sasati; mari aveh nga hi vü Sodom kümjie samthuoh, thi ma zhieri tü Gomorrah küjieh samthuoh.

¹⁵Jükenüh setsaküthsüri kenüh thopahiri VÜWA nüh hakümjie küza veh: “Hi nüh mari tü amürü küütsanaveh, thi mari vü kümzhi juh tsü küüzhu naveh; küpakenühnyunü Jerusalem setsaküthsüri vünüh azhih jüla aveh vü mükünyitsa zhuhnyuo tekuwa thuoh kenüh,” ti küza.

¹⁶Kükhratsawa VÜWA nüh hakümjie küza veh: Setsaküthsüri nüh nohri vü setsaküthsüzhü phra küveh müküna tümluo; mari tü nohri küluozhe kürütso vi nü nori tsüveh. Mari tü mari mpa mari kümshe kümohtsa phra küveh wie, VÜWA po vünüh nyu.

¹⁷Mari nüh VÜWA zhü kükuleri vü, “Jümatü nohkeri nüh müchie naveh,” ta küza peh huoti; thi müzike wie thuoh nüh sanü mari müküzike luoveh müzhe nü kütseri vü, “Kütsasü küsü nga nohri vü küruwa nyu,” ta küza tsetseti,

¹⁸küpakenühnyunü thawa nüh ma zhü thsünta thi küna nta VÜWA tü vü tsie lo? nyutü thawa nüh ma zhü vi zhüchüh nta ma zhü vü tsake lo?

¹⁹VÜWA tsomrhü küsa noluo! Arükümtho tü kuoshuwathuoh ünüh, nyiazamrhü küsü; jüma tü kümsüküsara lü rügi vünüh naveh.

²⁰VÜWA rüküshu tü ma müshe küvehwa müjie thi müjieküsaju nü asevü küsühlewa nyu. Arülo asevü nüh nohri tü jüma thsümshi mütsera naveh.

²¹Hi nüh setsaküthsüri tü müküze, tü mari mpa nüh zhütewa; hi nüh mari vü müküza, tü mari mpa nüh setsaküthsüzhü phra.

²²Thitü mari tü hi nüh küüza vü kütsie tüla, mari nüh eh nyiri vü eh zhü vi zhüchüh na nü, thi mari nüh mari tü mari kümsü leh vünüh mari saküüsühle na nü, thi mari nüh kümsü saküveh vünüh mari saküüsühle ma nü.

²³Hitü küshenyi vü küpeh Saküüwuowa ülo, thi kületsuo vü küpele Saküüwuowa nyu ülo? ta VÜWA nüh küza veh.

²⁴Thari nüh küüzhe azhieri vü küthi nü hi nüh mari mükünguwa sa na lo? ta VÜWA nüh küza. Hi tü atülü thi azhih vü pro müveh ülo? ta VÜWA nüh küza.

²⁵Setsaküthsüri nüh rie nü eh nyo vünüh setsaküthsüzhü phra küveh hi nüh küna ra thuoh, mari nüh, “Hi nüh amoh mohthuoh,” ta küza veh.

²⁶Küthake na lo? Setsaküthsüra luoveh tü, akürie setsaküthsüzhü küphrari, thi rieriekhri nü mari mpa mari luoveh setsaküthsüzhü küphrari tü asevü müsühle nüh sa wie nathuoh ülo?

²⁷Mari tü khanavü ma küshukürari nüh Baal kenüh eh nyo kümaküm üta mari amoh küsü nüh küsü vü phrahte taji eh nyiri tü eh nyo küüma nta rüzhe veh.

²⁸Setsaküthsü thawa nüh amoh pehveh ünüh küüphrahtem luo, thitü thawa nüh eh zhü pehveh ünüh zhütsa nyitsa nü küüphratem luo. Amaguo tü hiemtha vikümjie na küsa mowa kümhie pehveh lo? ta VÜWA nüh küza.

²⁹Eh zhü tü anyih nyutü atsüvü kümjie nyu ülo, thi alokrü fekhuoram veh ülo? ta VÜWA nüh küza.

³⁰Kükenüh no luo, hi tü setsaküthsüri sie ruohuom wiethuoh, mari tü küsü nüh küsü vünüh eh zhü rühuluom, ta VÜWA nüh küza.

³¹Noluo, hi tü setsaküthsüri, mari mizhi vi nü, “VÜWA nüh jüüta küza veh,” ta küüza ri sie ruoluomthuoh, ta VÜWA nüh küza.

³²No luo, hi tü akürie moh setsakütshüzhü küphrari sie ruoluomthuoh, ta VÜWA nüh küza, thi thari nüh mari vü küza, thi mari eh nyira lehkhuji küjoziri, hi nüh mari müküze nyutü mari müchieke wie ketünga, tinü mari tü anyi hamari vü zakütsa zanyoküsü nga samtsüra, ta VÜWA nüh küza.

³³Anyi hamari nüh, nyutü setsaküthsüri küsü nüh, nyutü navüri küsü nüh noh vü, “VÜWA akhuo tü mowa lo?” ta küna thuoüji, noh nüh mari vü, “Nohri tü ma khuo, thi hi nüh nohri vijam nathuoh, ta VÜWA nüh küza veh,” ti küza üti küza.

³⁴Thi setsaküthsüri kenüh nyutü anavüwa, nyutü anyiri nüh, VÜWA akhuo, ta küza thuoüji, hi nüh mari thi mari zhehlori kümnomna tsünaveh.

³⁵Nohri mpa noh zhieri vünüh hakümjie küsü nüh vü küza naveh, “VÜWA nüh mowa rületsü lo?” nyutü “VÜWA nüh mowa phrate lo?” ta sanaveh.

³⁶Thitü VÜWA khuo ta küsanü küphratelewa nyuthuoh, küpakenühnyunü akhuo tü papara zhü küsa kenüh, kükenüh nohri nüh rhoküveh Saküüwuowa, akuoküjira VÜWA hiri Saküüwuowa zhüri küürelemthuoh.

³⁷Noh nüh hakümjie vü nüh setsaküthsüwa vü küna naveh, “VÜWA nüh noh vü mowa rüle lo?” nyutü, “VÜWA nüh mowa phrate lo?” ta küna naveh.

³⁸Thitü nohri nüh, “VÜWA khuo,” ta küzathuoüji, VÜWA nüh hakümjie küza veh: Nohri nüh azhü, “VÜWA khuo,” ta phraküm kenüh, hi nüh nohri vü küüze nü, nohri tü, “VÜWA khuo,” ti müküza tüm üti küza küze,

³⁹Jükenüh hi nüh nohri vizhujam wie naveh thi nohri nga thi hi nüh nohri vü kütsü anyujiwa noh küthsoküzhiri ti eh shütü vünüh vijam naveh.

⁴⁰Thi hi nüh, küsükürho nohri vü saküzükrü thi müküütuo küzükrü nohri vü viru naveh, jüma tü mükümara wiethuoh.