Read Pochuri Naga JEREMIA 24 Bible Online

JEREMIA 24 - Pochuri Naga bible

JEREMIA 24

¹ VÜWA nüh ampah khuo künyi VÜWA kükhurüzheh atüvü sa küveh hi vü kütsa. Hamatü Babilon kajiwa Nebukhadnezzar nüh Jehoiakim Judah wa atsa Jerusalem kajiwa Jekoniah, Judah küjiri, zazhüri, amürü küsari siezhu nü Babilon vü vite küru asevü nüh.

²Akhuo küsü lovü thuoüji ampah kühie tü veh, ampah avi küne khuwa kümjie, thitü akhuo küsüwa lovü thuoüji kümsü tü veh, müsü nü mükütsara tü veh.

³Jütiküsa vü VÜWA nüh hi vü, “Jeremia noh tü mowa ngu veh lo?” ti küna. Hi nüh, “Ampah ngu veh, ampah kümhieri thuoüji mühie shehm, thi kümsüri thuoüji müsü sheh nü mükütsara sam,” ti rületsü.

⁴Thinü VÜWA zhü hi vü ru taji:

⁵Israel Saküüwuowa, VÜWA nüh hakümjie küza veh: Ampah kümhie hamari kümjie, hi nüh Judah vünüh Khaldeara zhih vü küzem nü siete küwari tü ampah kümhieri kümjie hi nüh chieke naveh.

⁶Kümhie kenüh hi nüh eh notha mari vü sanaveh, thi hi nüh mari sie azhih hala ru le naveh. Hi nüh mari sake le naveh thi phrüküja wa nyu thuoh; hi nüh mari shie naveh, thi loküjawa nyuthuoh.

⁷Hi tü VÜWA ta küsa küthsüra luoveh küsü vi mari tsü naveh; thi mari tü eh nyisanü hi nüh mari Saküüwuowa sa naveh, küpakenühnyunü mari tü mari luoveh ajü vü nü hi vü süjhle na küveh kenüh.

⁸Thitü VÜWA nüh hakümjie küza veh: Ampah kümsü müsü sheh nü mükütsarari kümjie hi nüh Judah kajiwa Zedekiah, ma küjiri azhih hala pehküveh Jerusalem vü kümtori, thi Egypt zhih vü rhokü vehri vü sie mtu naveh.

⁹Hi nüh mari tü küümzhoh phake küsü satsü naveh, hi nüh azhie aveh vü mari theküjawa vü zanyo kümsü küsü, azhih vü kajiperi aveh vü, saküüzükrü küsü küüzhünyuo küsü, küriesa küsü, thi kümzü küsü satsü naveh.

¹⁰Thi hi nüh azhih vi mari thi küshukürari vü kütsüwa vünüh mari müjie zorie kümkheh küju nü hi nüh anyuchuwa, kümkhuoji thi sanakükho mari vü küze naveh.