Read Pochuri Naga JEREMIA 25 Bible Online

JEREMIA 25 - Pochuri Naga bible

JEREMIA 25

¹ Judah nyiri aveh kenüh, Josiah Judahwa tsa kajiwa Jehoiakim mahvi amüzüawa vü (Jümatü Babilon vü kajiwa Nebukhadnezzar mahvi apokhuwa) vü Jeremia vü azhü ru,

²jüma tü setsaküthsüwa Jeremia nüh Judah nyiri aveh vü thi Jerusalem vü arhieri aveh vü küza kheh:

³Mahvi mükeke nü küche kenüh, Amon Judah wa tsa kajiwa Josiah mahvi türaküche vünüh nosü küju VÜWA zhü tü hi vü ruvehthuoh, thi hi nüh nohri vü mtsatso nüh küzathuoh, thitü nohri nüh müvi.

⁴VÜWA nüh mtsatso wie thuoh nüh nohri vü ma siepe setsaküthsüri küzewie ketünga nüh müküna nyutü küna nta noh khünari nga mükümrheke,

⁵mari nüh, “Nohri aveh nohri kümsü lehkhuji vünüh thi kümsüküsa küsa vü nüh khinyi sühle luo, jüta thuoüji VÜWA nüh nohri vü thi nohri küshiekürari vü khana vünüh thi küsuokürho tsükümazhihwa vü pehra naveh;

⁶nyiaza küpara kütsü sa nti thi mari khurü nti mari se nyitemüwa tümluo, nohri ake nüh küsa vi eh rüsaküüshu müsa tüm. Jüta thuoüji hi nüh nohri vü kümnomna küsü nga küsa wa nyu,” ti küza.

⁷Tü nohri tü eh zhümvi, thi noh keri nüh küüroh vi nü eh rüsaküshu thuoüji nohri mpa nohri küpoka wie thuoh, ta VÜWA nüh küza.

⁸Jükenüh akuoküjira VÜWA nüh hakümjie küza veh: Nohri nüh eh zhüri müvi nüh sakümthuoh kenüh,

⁹hi nüh zhietü wuovü akuoh aveh küze naveh, eh siepewa, Babilon kajiwa Nebukhadnezzar wie nga küze naveh, hi nüh mari sieru nü azhih hama thi ma rhieri aveh, thi akuoküji rhomkie le küvehri aveh sie küüsaluo naveh; hi nüh mari zorie kümkhehm naveh, thi hi nüh mari tü saküümzhoh phake thi eshih ta küsa zanyo küsü, thi küsükürho saküüzükrü küsü satsü naveh.

¹⁰Thi hi nüh mari vünüh külozheloku khi thi aloküwie khi, kümnyutepawa thi kümnyutevühwa jikhi, lohsuokhre khi thi lasi küwie vijam naveh,

¹¹ Azhih hama ajü tü feriem thi jaküm küsü sam na thuoh, thi akuoküji hamari tü mahvi rürake Babilon kajiwa akütsü sam nathuoh.

¹²Jütisanü mahvi rürake jum thuoüji Babilon kajiwa thi jüma kuohji Khaldeari azhih ti mari künakhie kenüh hi nüh kümnomna tsü naveh, thi küsükürho azhihwa tü küümsüjam naveh, ta VÜWA nüh küza.

¹³Azhih jümawa vü hi nüh ma vü ma vü phrahtezhu küsa aveh, lasipha hama lovü rhüküsari Jeremia nüh thopahiri aveh vü setsaküthsüzhü phrate küsari viru naveh,

¹⁴küpakenühnyunü akuoküji hozake thi kaji aküjiri nga jümara tükha sana küveh kenüh; hi nüh mari nüh küsa thi ma keri nüh küüroh müzhe nü mari thuotsüle naveh.

¹⁵küpakenühnyunü VÜWA, Israel Saküüwuowa nüh hakümjie hi vü küza: Eh kevü nüh arükümtho akhah ahuo hama vi nü hi nüh akuoküji noh vü küüze ri aveh küüzhu luo.

¹⁶Mari tü zhu nü puolepuoza taji mari müshe lovü mütü nüh sam naveh, küpakenühnyunü hi nüh anyuchuwa mari azavü küüzewa kenüh.

¹⁷Jükenüh hi nüh ahuowa VÜWA ke vü nüh vi nü hi wa taji küüzhu üta küsa akuoh küjiri aveh küüzhu kheh:

¹⁸Jerusalem thi Judah nyujiri, ma kajiri thi aküjiri, küüzo thi jaküsü küsü küsa nti, eh shih thi kümzü zanyo küüsa nti, nosü mari mokümjie ünüh jükümjie satsü nti;

¹⁹Egypt kajiwa Faroah, ma sieperi, ma küjiri, thi ma nyiri;

²⁰wurükürhonyiri aveh; Uz azhih vü kajiri aveh; Filistin azhih vü kajiri aveh; Ashkelon, Gaza, Ekron, thi Ashdod kümtori;

²¹Edom, Moab, Ammon tsari,

²²Tyre kajiri aveh, Sidom kajiri aveh, thi juhküji kariwa nü küpe kajiri

²³Dedan, tema, Buz, thi natowuo seküvüri aveh;

²⁴Arab vü kajiri aveh thi wurükürho kajiri shünyiza vü kürho aveh,

²⁵Zimri kajiri aveh, Elam kajiri aveh, Media kajiri aveh,

²⁶zhietü vü küsuo thi küshenyi, küsü nüh küsü ase vü ti küsa kajiri aveh, thi azhih nyieh vü kajiperi aveh. Thi jümari sevü thuoüji Sheshakh kajiwa nüh zhu naveh.

²⁷Jütiküsa vü noh nüh mari vü, akuoküjira VÜWA, Israel Saküüwuowa nüh hakümjie küza veh: Zhuluo, thi müshe nü küwuo taji külu nü müsürara le tüm luo, anyuchuwa hi nüh noh zari vü küzeküvehwa kenüh.

²⁸Thi mükütüküzü mari tü noh ke vü nüh ahuowa vi taji müzhu nta thuoüji noh nüh vü: Kükhratsawa VÜWA nüh küza veh nü nohri tü müzhu wie üji mümhie wie!

²⁹Noluo, eh nyo vünüh küji anyujiwa vü hi nüh alüküsü vi ru nta sate vehthuoh, thi noh tü mokümjie kümnomna msa thuo nüh rura naveh lo? Nohri tü müünomna tü külewanyu, küpakenühnyunü hi nüh azhih aveh vü arhieri siesaluo nti anyuchuwa jizhuh küveh thuoh kenüh, ta akuoküjira Vüwa nüh küza veh.

³⁰Noh tü jükenüh azhü hamari aveh mari vü setsaküthsüzhü phra naveh, noh nüh mari vü: VÜWA nüh kümsie vünüh akhikhu naveh, thi ma kümtse arhie vünüh ma jikhi phratezhu naveh; ma nüh ma refüri vü ajikhi khu küjisheh naveh, thi rhelivi kürütseri kümjie zie naveh, azhih nü arhieri aveh vü zie naveh.

³¹Ajikhi tü azhih küpote küju jikhisale naveh, küpakenühnyunü VÜWA tü akuoküjiri vü ashi küsü pehveh; matü kürholiri aveh sie nü ashih vü kuotu, thi künakhiewa tü ma nüh anyuchuri vü thsemnaveh, ta VÜWA nüh küza.

³²Kükhratsawa VÜWA nüh hakümjie küza veh: No luo, kümsü tü akuoküji küsü vünüh akuoküji küsü vü kuonyuoh wathuoh, thi amrhü küji küsü azhih kületsuotsatsa vünüh kuo mrhüwa thuoh!

³³Jüma rülovü VÜWA nüh rehthe kümritü azhih küpote küsü vünüh küpote küpawa vü küju waju wie naveh. Mari tü kürümuowa nyu, nyutü küvizhuhwa nyu, nyutü küchohwuwa nyu; mari tü azhih anyieh vü asü jem naveh.

³⁴Rietsiluo, nohri nyihzhükühuori, thi zie luo; aweji vü küpri luo, nohri nyihnyihriekhuo avüri, küpakenühnyunü nohri kürethe thi nohri küporie rülori tü tekütsethuoh kenüh, thi nohri tü kürüka küfüküsü kümjie tsuotsam naveh.

³⁵Nyihzhükühuori tü joketem wa ra wiethuoh, thi nyihnyihriekhuora avüri tü mürie na küsa müsara wie thuoh.

³⁶Künaluo! Nyihzhükühuora küzie khi, thi nyihzhüriekhuori vü akükrie khi! küpakenühnyunü VÜWA nüh mari kümrhuope samsüküveh thuoh kenüh,

³⁷VÜWA rüküshu kenüh luovehrüzih küvehri zoriemthuoh.

³⁸Amie wuowa küsü kümjie ma tü ma küüthipe jamthuoh; küpakenühnyunü kükutekurü anyuchuwa kenüh mari zhih tü müsüküja küsü samthuoh, thi ma rüküshu küüluole kenüh.