Read Pochuri Naga JEREMIA 26 Bible Online

JEREMIA 26 - Pochuri Naga bible

JEREMIA 26

¹ Josiah Judahwa tsa kajiwa Jehoiakim kükaji küsate vü, VÜWA vünüh azhü hama ru,

²VÜWA nüh hakümjie küza veh: VÜWA zheh nyula vü tsie Judah anyujiri aveh vü VÜWA zheh vü nüh khurü nta kütseri aveh vü küza luo, hi nüh noh vüh azhükütsüri aveh vi mari vü küza luo; azhü küsü nga müküükhe tümluo.

³Jümatü mari aveh nga künatü mümshi, thi mari kümsü lehkhuji vünüh sühle tü mümshi, mari kümsü küüro kenüh mari vü kümsü viru nti küsa hi nüh khaphrüle mhieveh.

⁴Noh nü mari vü: VÜWA nüh hakümjie küza veh: Mükütüküzü nohri nüh eh zhü müvi thuoüji, hi nüh nohri tü eh khonyo sasaküvehwa vü mütseji mümühie,

⁵thi nohri nüh mütsake wie ketünga hi nüh pre nüh setsaküthsüwa küüze eh siepewa zhüri vü mütsake ti thuoüji,

⁶ hi nüh azhah hama tü Shilo kümjie satsü naveh, thi hi nüh thopahiri hamari tü azhih aveh kenüh kümzü küsü sam na thuo.

⁷Anavüri thi setsaküthsüri thi anyiri aveh Jeremia nüh azhü hamari VÜWA zheh vünüh küphrate künara.

⁸VÜWA nüh anyiri aveh vü phrate üta azhükütsü aveh Jeremia nüh phrate jum ünü anavüri, setsaküthsüri thi anyiri aveh nüh ma shohphoke taji, noh tü sü wie naveh!

⁹Noh tü mokenüh VÜWA nyo vünüh setsaküthsüzhü phra veh lo, ti sanü, azheh hamatü Shilo kümjie sa naveh, thi anyuji hamatü mükürhie nüh küüzojam nathuoh ülo? ti küza. Jütisanü anyiri tü VÜWA zheh vünüh Jeremia mükieshe peh.

¹⁰Judah küjiri nüh hama kütshüra vü kajiwa zheh vünüh VÜWA zheh vü shuru nü, VÜWA zheh kheri kürüthewa lehpie vü shepeh.

¹¹Thi ünü anavüri thi setsaküthsüri nüh aküjiri thi anyiri aveh vü, “Nohri nüh küünara üta anyi hamatü aküsü münguveh thuoh, ma nüh anyuji hama vü setsaküthsüzhü küphrahte kenüh,” ti küza.

¹²Thinü Jeremia nüh aküjiri thi anyiri aveh vü, “Azhü nohri nüh küünara aveh tü azheh hama vü thi anyuji hama setsaküthsüzhü phra üta hi küze.

¹³Jükenüh khinyi nohri lehkhuji thi nohri nüh küsari sakürüthele luo, thi VÜWA nohri Saküüwuowa jikhi künaluo, jüta thuoüji ma nüh phrahtezhu küsa kümsüwa vünüh VÜWA tü ma müshe kham naveh.

¹⁴Thitü hi thuoüji hi tü nohri ake vü pehveh. Hi vü mowa nü mühie veh thi kato veh nüh saluo.

¹⁵Thitü müthsütoh üji mükümhie thuoüji mükütüküzü nohri nüh hi küsü thuoüji nohri mapa nüh nohri vü thi anyuji hama vü thi ma rhieri vü vi küru wiethuoh; küzhütsa vünüh wiethuoh nü azhü hamari aveh nohri khünavü phraketsü üta VÜWA nüh hi küüze wie,” ti küza.

¹⁶Jüti küsa vü aküjiri thi anyiri aveh nüh anavüri thi setsaküthsüri vü, “Anyi hamatü aküsü müngu müveh thuoh, küpakenühnyunü ma nüh VÜWA hiri Saküüwuowa nyo vünüh hiri vü küüzathuoh kenüh,” ti küza.

¹⁷Thinü azhih jüla kükhruori wuori tü sühra nü anyiri sehzhu küveh aveh vü,

¹⁸ “Moresheth Mika nüh Judah kajiwa Hezekiah rülo vü setsaküthsüzhü küphrate nü Judah nyiri aveh vü küüza: Kümsietsa VÜWA nüh hakümjie küza veh, Zion tü azhuh küsü kümjie rhuotsam naveh; Jerusalem tü ferie küümproke küsü sam naveh, thi azheh wa aküzhi tü aküze kümsie küsü samna thuoh,” ta küza.

¹⁹Judah kajiwa Hezekiah thi Judah aveh tü maküüsü tsam ülo? Ma tü VÜWA mükrü ülo thi VÜWA küütso mükhopeke ülo, thi VÜWA nüh kümsü küphratezhuwa vünüh ma luoveh mükhaphrü ülo? Thitü hiri mpa nüh kümsü aküji hiri vü viru na sa vehthuoh, ti küza!

²⁰Kiriath jearim vünüh Shemaia atsa Uriah ti küsa anyi küpa küsü nga VÜWA nyo vünüh setsaküthsüzhü phra. Ma nga Jeremia azhü khem ti küsa vi nü anyuji hama thi azhih hama vü setsaküthsüzhü phra.

²¹Kajiwa Jehoiakim, ma rieküsari thi aküjiri aveh ti ma zhü küna ra, thinü kajiwa tü ma küsü nti phah, thitü Uriah nüh jüma küünara vü ma tü krü nü jotewa nü Egypt vü mürie te wa.

²²Jüti küsa vü kajiwa Jehoiakim nüh Akhbor atsa Elnathan thi anyiri ti ma sie nü Egypt vü küze,

²³mari tü Egypt vünüh Uriah sie nü kajiwa Jehoiakim vü ru, ma nüh anyuchu vi ma kürhiethem nü ma kümo viwa nü nyiri küchowu azhievü jam.

²⁴Thitü Shafan atsa Ahikam ake tü Jerusalem sie kütse kenüh ma vi müküüsü.